ଖପ୍ରାଖୋଲ,୧୨।୬(ଡି.ଏନ୍.ଏ.): କେନ୍ଦ୍ର ଆର ରାଏଜ୍ ସରକାର ୬୦ ବଛର୍ରୁ ଅଧ୍କା ବୁଢ଼ାବୁଢ଼ି, ବିଧବା, ଛାର୍ରି, ଦିବ୍ୟାଙ୍ଗମାନକୁ ଇନ୍ଦିରା ଗାନ୍ଧୀ ଆର ମଦୁବାବୁ ପେନସନ ଯୋଜନାରେ ଭତା ଯୁଗେଇ ଦେଉଛନ୍। ହେଲେ ଅନେକ ହକ୍ଦାର ହିତାଧିକାରୀ ଭତାର ଲାଗି ଆବେଦନ କରି ନିରାଶ ହେଉଥିବାର ଅଭିଯୋଗ ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଭାନପୁର ପଁଚେତ୍ ତୁର୍ଲା ଗଁାରେ।
ସୂଚନା ଅନ୍ସାରେ ତୁର୍ଲା ଗଁାର ଲୋଚନା ବରିହା(୭୦)। ଆପ୍ନେ ଚାଲିଯିବାର ଆଏଜ୍କେ ୩୦ ବଛର ବିତିଯାଇଛେ। ହେଲେ ଆଏଜ୍ତକ ସେ ବିଧବା ଭତା ପାଏବାରୁ ବଁଚିତ୍ ଥିବାର ଅଭିଯୋଗ କରିଛନ୍। ଏନ୍ତା କି ଲୋଚନା ଗଁାରେ ହେଇଥିବାର ପଲ୍ଲୀ ସଭା, ଗ୍ରାମ ସଭାରେ ଅନେକ ଥର ଭତାର ଲାଗି ନଁା ଲେଖାବାର ସଂଗେ ଫର୍ମ ପୂରନ୍ କରିଛନ୍। ହେଲେ ତାହାକୁ ସବୁବେଲେ ଭତା ଜାଗାରେ ପରତିଶୁରତି ମିଲୁଛେ। ମୁଡ଼ ରଖ୍ବାର ଲାଗି ତାକରନେ ଭଲ ଘରଖଁଡ଼େ ବି ନଁାଇଁନ, ଯେନ୍ଥିରଲାଗି ଗୁଟେ ଭଂଗା ଦଦ୍ରା ମାଏଟ୍ କୁରିଆରେ ଜୀବନ୍ ବିତଉଛନ୍। ସେ ବଡ଼ା ଦୁଖେ ରହୁଥିଲାବେଲେ ଦିହିପା ଖରାପ ହେଲେ ଅଭାବ ଅନାଟନରୁ ଉଷୋକଷା ଘିନି ନାଇଁପାରବାର। ଭତା ଟଁକା ମିଲୁଥିଲେ ହେଲେ ସେଥ୍ରେ ଉଷୋକଷା ଘିନ୍ତି ବଲି ଲୋଚନା କହିଛନ୍।