ପର୍ଲା,୧୩।୧୧(ଡି.ଏନ.ଏ.)-କଳାହାଣ୍ଡି ଜିଲା ଦଣ୍ଡପାଟ ଅଂଚଳର ଅନେକ ଗରିବ୍ ଦୁଖି ଭଲ ଘରଖେଁ ଅଭାବୁ ବଡ଼ା ଗୁଲଗୁଲା ହେଇ ଜୀବନ ବିତଉଛନ୍। କିଏ ଝାଟି ମାଟି ଘରେ ତ କିଏ ଦଦରା କୁରିଆରେ ପଲିଥିନ ଢାପି ଜୀବନ୍ ବିତଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ଧର୍ମଗଡ଼ ବ୍ଲକ ଛଞ୍ଚାଣବାହାଳି ପଁଚେତ୍ ଅଧୀନ ବେହେରାଗୁଡ଼ା ଗଁାରେ।
ସୂଚନା ହିସାବେ ବେହେରାଗୁଡ଼ାର ସୂର୍ଯ୍ୟକାନ୍ତି ଧରୁଆ(୪୫)। ଝନେ ନିସାହା ଛାର୍ରି ମହିଲା। ଅନେକ ବଛର ତଲେ ଆପ୍ନେ ତାହାକୁ ଛାଡ଼ି କେନ୍ଆଡ଼େ ପଲେଇ ଗଲେ, ଆଏଜ୍ ତକ୍ ତାକର ଖୋଜଖବର ନଁାଇଁନ। ଏନ୍ତାଥି ସୂର୍ଯ୍ୟକାନ୍ତି ଗୁଟେ ଭଂଗା ଦଦ୍ରା କୁରିଆରେ ୧୫ ବଛର ହେଲା ପଲିଥିନ ଢାପି ଜୀବନ୍ ବିତଉଛନ୍। ସଖାଲ ପାଏଲେ ପେଟ ପାଲବାର ଲାଗି ଆସର ପାସର ଗଁାମାନକେ ଭିଖ୍ ମାଗିଯାଉଛନ୍। ଗଲା ଲଘୁଚାପ ବରଷାରେ ତାକର ଘରଟା ଭାଂଗି ଯାଇ ଅଁାଠେ ପାଏନ୍ ହେଇଥିଲା। ହେଲେ ପରଶାସନ ତରଫୁ ତାହାକୁ ପଲିଥିନ ଖଁଡ଼େ ବି ନାଇଁ ମିଲିଥିବାର ସେ ଅଭିଯୋଗ କରିଛନ୍। ତାକର ଗୁଲଗୁଲା ଦେଖି ଝନେ ସହୁରୁଦ୍ ଲୋକ୍ ତାହାକୁ ପଲିଥିନ ଖଁଡ଼େ ଦେଇଥିଲେ। ଇଆଡ଼େ ସରକାରୀ ସାହାଯ୍ କହେଲେ ସୂର୍ଯ୍ୟକାନ୍ତି ମାସିକ ୫ କେ.ଜି. ଚାଉଲ ପାଉଛନ୍। ହେଲେ ମାସିକ ୫ କେ.ଜି. ଚାଉଲ ନିଅଁଟ ହେଉଛେ। ଯେନ୍ଥିରଲାଗି ସେ ସଖାଲ ପାଏଲେ ଗଁା ଗଁା ଭିଖ୍ ମାଗି ଯାଉଛନ୍। ସରକାରୀ ଯୋଜନାରେ ସମକୁ ଘର ମିଲୁଛେ, ଭଲ ଚଲୁଥିଲା ଲୋକ୍ ମାସିକ ୩୫ କେ.ଜି. ଚାଉଲ ପାଉଥିଲାବେଲେ ମୋତେ ୫ କେ.ଜି. ମିଲୁଛେ। ହେଲେ ମୋର କେହି ନାଇଁ ବଲି ମୋତେ ଘର, ଭତା, ୩୫ କେ.ଜି. ଚାଉଲ ନାଇଁ ମିଲବାର ବଲି ସେ କହିଥିଲେ। ଘରଖଁଡ଼େର ଲାଗି ଓ୍ବାର୍ଡ ମେମରନୁ ସରପଁଚ୍ ଆର ଧର୍ମଗଡ଼ ବିଡିଓ ତକ୍ ଗୁହାରି କରିଛେଁ। ହେଲେ କେହି ମୋର କଥା ନାଇଁ ଶୁନବାର ବଲି ସେ ଅଭିଯୋଗ କରିଛନ୍। ଇ ବାବ୍ଦେ ପଁଚେତ୍ କାର୍ଯ୍ୟ ନିର୍ବାହୀ ଅଧ୍କାରୀକୁଁ ପଚ୍ରାଲାରୁ ଚଲତି ବଛର ତାକର ନଁା ଆବାସ ଯୋଜନାରେ ସାମିଲ କରି ମଂଜୁରି ଲାଗି ପଠାଯାଇଛେ ବଲି ସେ କହିଛନ୍। ସେନ୍ତା ସରପଁଚ୍ ବଳରାମ ପୂଝାରୀକୁଁ ପଚରାଲାରୁ ବିଡିଓକୁଁ କହି ସୂର୍ଯ୍ୟକାନ୍ତିକଁର ଲାଗି ଯେତେ ଜଲଦି ହେବା ଗୁଟେ ଘରର ବେବସ୍ତା କରାଯିବା ବଲି ସେ କହିଛନ୍।