ଭାପୁର,୨୬।୬(ଡି.ଏନ.ଏ.) – ଦୁଇବର୍ଷ ହେଲା ଆରପାରିରେ ସ୍ବାମୀ। ଘରେ ୨ ଝିଅ, ଜଣେ ପୁଅ। ମୂଲମଜୁରି ଲାଗିଲେ ସେମାନଙ୍କ ପେଟକୁ ଦାନା ଯୋଗାଡ଼ ହେଉଛି। ଭଙ୍ଗା କୁଡ଼ିଆରେ ମୁଣ୍ଡ ଗୁଞ୍ଜିଛୁ। ସରକାର ୩୦ କେଜି ଚାଉଳ ଦେଉଛନ୍ତି। ସେତକରେ ଦୁଃଖକଷ୍ଟରେ ଚଳୁଛୁ। ବର୍ଷେ ହେଲା ଆବେଦନ କରି ଭତ୍ତାକୁ ଅନାଇଛି। ଗୁହାରି ଶୁଣିବାକୁ କେହିନାହିଁ। ଆମ ଦୁଃଖ କାହା ଆଖିରେ ପଡୁନି ବୋଲି କ୍ଷୋଭର ସହ କହିଛନ୍ତି ଢେଙ୍କାନାଳ ଜିଲା ଓଡ଼ାପଡ଼ା ବ୍ଲକ କଳାଙ୍ଗ ପଞ୍ଚାୟତ ଭୁବନପୁର ଗୋଡ଼ିସାହିର ଉତ୍ତରା ପଧାନ (୪୬)।
ଦୁର୍ବଳ ବାଉଁଶ ଖୁଣ୍ଟ ଉପରେ ଠିଆ ହୋଇଛି ଉତ୍ତରାଙ୍କ ଦରଭଙ୍ଗା ଛାଟିମାଟି ଘର। ଘରେ ପଶିଲେ ମୁଣ୍ଡରେ ବାଜୁଛି ତାଳବରଡ଼ା ଛପର। କବାଟ ନାହିଁ କି କାନ୍ଥରେ ଭଲରେ ନେସା ହୋଇନି ମାଟି। ଏଥିରୁ ବାରି ହୋଇପଡୁଛି ପରିବାରର ଆର୍ଥିକ ସ୍ଥିତି। ଉତ୍ତରାଙ୍କ କହିବା କଥା, ‘ଫନୀ’ ବାତ୍ୟାରେ ଘର ନଷ୍ଟ ହୋଇଯାଇଥିଲା। ଦେଢ଼ ମାସ ପରେ ବି ସହାୟତା ମିଳିଲାନାହିଁ। ବାତ୍ୟା ପରେ କେମିତି ଅଛୁ, କେହି ପଚାରିଲେନି। କେତେ ଦିନ ଆଉ ଭଙ୍ଗାଘରେ ରହିଥାନ୍ତୁ। ସବୁ ଆଶା ତୁଟାଇ ନିଜ ଚେଷ୍ଟାରେ କାଠ, ବାଉଁଶ ସଂଗ୍ରହ କରି ଭଙ୍ଗା କୁଡ଼ିଆକୁ ଠିଆ କରିବାକୁ ଚେଷ୍ଟା କରୁଥିବା କହିଛନ୍ତି ଉତ୍ତରା। ଭତ୍ତା ପାଇଁ ଓ୍ବାର୍ଡମେମ୍ବରଙ୍କ ସହାୟତାରେ ସରପଞ୍ଚଙ୍କ ନିକଟରେ ବର୍ଷେ ତଳେ ଆବେଦନ କରିଥିଲେ। ହେଲେ ଏ ଯାଏ ତାହା ମଞ୍ଜୁର ହୋଇ ନ ଥିବା ଉତ୍ତରା କହିଛନ୍ତି।
ଏ ନେଇ ସରପଞ୍ଚ ବାସନ୍ତୀ ଭୋଇ କୁହନ୍ତି, ଭତ୍ତା ଆବେଦନପତ୍ର ବ୍ଲକ କାର୍ଯ୍ୟାଳୟକୁ ପଠାଇ ଦିଆଯାଇଛି। ନିର୍ବାଚନ ଥିବାରୁ ମଞ୍ଜୁରୀରେ ବିଳମ୍ବ ହେଉଛି। ମହିଳାଙ୍କ ସମସ୍ୟାର ଗୁରୁତ୍ୱ ବୁଝି ଶୀଘ୍ର ଭତ୍ତା ଦେବାକୁ ବିଭାଗୀୟ ଅଧିକାରୀଙ୍କୁ ଅବଗତ କରାଯିବ। ଏ ନେଇ ବିଡିଓ ଉତ୍କଳ ରଞ୍ଜନ ଆଚାର୍ଯ୍ୟ କୁହନ୍ତି, ଆବେଦନକାରୀଙ୍କୁ ପର୍ଯ୍ୟାୟକ୍ରମେ ଭତ୍ତା ପ୍ରଦାନ କରାଯିବ। କିନ୍ତୁ ହିତାଧିକାରୀଙ୍କ ନାମରେ ଘରଡିହ ନ ଥିଲେ ବାସଗୃହ ମିଳିପାରିବ ନାହିଁ ବୋଲି ବିଡିଓ ସୂଚନା ଦେଇଛନ୍ତି।