ଭଦ୍ରକ ଅଫିସ, ୧୧।୪ – କରୋନା ମୁକାବିଲା ପାଇଁ ଭଦ୍ରକ ଜିଲାରେ ୨,୦୯,୦୦୦ ପରିବାରକୁ ମାସିକ ଗୋଟିଏ କରି ତିନୋଟି ଏଲ୍ପିଜିର ଦାମ୍ ସରକାରଙ୍କ ପକ୍ଷରୁ ମିଳିବ। ଅର୍ଥାତ ଏହି ହିତାଧିକାରୀଙ୍କୁ ମାଗଣାରେ ଗ୍ୟାସ ମିଳିବ। ଏପ୍ରିଲ, ଜୁନ ଓ ମେ ମାସ ପାଇଁ ଏହା ପ୍ରଦାନ କରାଯିବ । ମହାମାରୀ ସମୟରେ ନିଜ ଜୀବନକୁ ବାଜି ଲଗାଇ ଘରେ ଘରେ ଗ୍ୟାସ୍ ବିତରଣ କରୁଥିବା କର୍ମଚାରୀଙ୍କୁ ମଧ୍ୟ ୫ ଲକ୍ଷ ଟଙ୍କାର ବୀମା ପ୍ରଦାନ କରାଯିବ ବୋଲି ଭଦ୍ରକ ଜିଲା ନୋଡାଲ ଅଫିସର୍ କାର୍ତ୍ତିକ ଚନ୍ଦ୍ର ଜେନା ଜଣାଇଛନ୍ତି।
କରୋନା ମୁକାବିଲା ପାଇଁ ଭାରତ ବର୍ଷରେ ଲକ ଡାଉନ ଘୋଷଣା କରାଯାଇଛି । ସରକାରଙ୍କ ପକ୍ଷରୁ ଅତ୍ୟାବଶ୍ୟକ ସାମଗ୍ରୀ ଯୋଗାଣ ପାଇଁ ଅଗ୍ରାଧିକାର ଭିତ୍ତିରେ ମାଗଣା ଏଲ୍ପିଜି ଯୋଗାଣ ପଦକ୍ଷେପ ଗ୍ରହଣ କରାଯାଉଛି। ଆର୍ଥିକ ଅନଗ୍ରସର ବର୍ଗର ଲୋକଙ୍କୁ ଚୟନ କରାଯାଇଥିବା ଉଜ୍ଜଳା ହିତାଧିକାରୀଙ୍କୁ କେନ୍ଦ୍ର ସରକାରଙ୍କ ତରଫରୁ ମାଗଣାରେ ତିନି ମାସ ଗ୍ୟାସ ଦେବା ପାଇଁ ଯୋଜନା କରାଯାଇଛି । ଏହିି ଗ୍ୟାସ ପାଇଁ ସରକାର ପ୍ରଥମେ ଉପଭୋକ୍ତାଙ୍କ ବ୍ୟାଙ୍କ ଆକାଉଣ୍ଟକୁ ଅର୍ଥ ପ୍ରଦାନ କରିବେ। ଉପଭୋକ୍ତାମାନେ ସେହି ଅର୍ଥରେ ବିତରକଙ୍କଠାରୁ ଗ୍ୟାସ କ୍ରୟ କରିବେ। ଗ୍ୟାସ ପାଇବାର ୧୫ ଦିନ ପରେ ଉପଭୋକ୍ତା ମାନେ ଆଉ ଗୋଟିଏ ବୁକିଂ କରିପାରିବେ । ପ୍ରତ୍ୟେକ ମାସର ପ୍ରଥମ ସପ୍ତାହରେ ଉପଭୋକ୍ତାଙ୍କ ଆକାଉଣ୍ଟକୁ ଅର୍ଥ ଆସିବ। ଏପ୍ରିଲ ମାସ ପାଇଁ କେନ୍ଦ୍ର ସରକାର ଅର୍ଥ ପଠାଇ ସାରିଛନ୍ତି। କିଛି ଉପଭୋକ୍ତା ଏହାର ବ୍ୟବହାର ମଧ୍ୟ ଆରମ୍ଭ କରିସାରିଲେଣି।
ସୂଚନା ଯୋଗ୍ୟ, ଭଦ୍ରକ ଜିଲାରେ ଇଣ୍ଡେନ ଗ୍ୟାସ୍ରେ ପାଖାପାଖି ୫୮ ହଜାର ଉପଭୋକ୍ତା ଥିବା ବେଳେ ଏଚ୍ପିିର ୪୩ ହଜାର ଓ ଭାରତ ଗ୍ୟାସର ୧ ଲକ୍ଷ ୭ ହଜାର ଉପଭୋକ୍ତା ଅଛନ୍ତି । ସମସ୍ତଙ୍କୁ ଏହି ସୁବିଧା ମିଳିବ ।