ଭଦ୍ରକ ଅଫିସ/ବାଲେଶ୍ୱର ଅଫିସ,୨୧।୩: ରାଜ୍ୟ ସରକାରଙ୍କ ପକ୍ଷରୁ ୫ ଜିଲା ଓ ୮ ସହରରେ ଲକ୍ଡାଉନ୍ ଘୋଷଣା କରାଯିବା ପରେ ଭଦ୍ରକ ଓ ବାଲେଶ୍ୱର ଜିଲା ପ୍ରଶାସନ ପକ୍ଷରୁ କଟକଣା ଜାରି କରାଯାଇଛି। ୨୨ରୁ ୨୯ ତାରିଖ ରାତି ୯ଟା ପର୍ଯ୍ୟନ୍ତ ଭଦ୍ରକ, ବାଲେଶ୍ୱର ସହର ସମେତ ଜିଲାକୁ ଲକ୍ଡାଉନ୍ ଘୋଷଣା କରାଯାଇଛି। ସହରରେ ଅତ୍ୟାବଶ୍ୟକ ସାମଗ୍ରୀ, ତେଜରାତି, ମାଛ, ମାଂସ, ପରିବା ଓ କ୍ଷୀର ଦୋକାନକୁ ବାଦ୍ ଦେଲେ ଅନ୍ୟ ସମସ୍ତ ଦୋକାନ ବନ୍ଦ କରିବା ପାଇଁ ପ୍ରଶାସନ ମାଇକ୍ ଯୋଗେ ପ୍ରଚାର କରିଛି। ଏପରି କି ମାଜିଷ୍ଟ୍ରେଟ ଓ ପୋଲିସ ଉପସ୍ଥିତିରେ ସହରର ସମସ୍ତ ଦୋକାନ ବଜାରରେ ତାଲା ପକାଯାଇଛି। ଏହି ଘୋଷଣାନାମା ପରେ ସହରରେ ଏକ ପ୍ରକାର ଆତଙ୍କ ଖେଳିଯାଇଛି। ଏହାଛଡ଼ା କରୋନା ସଂକ୍ରମଣ ରୋକିବା ପାଇଁ ଅଟୋ ଚଳାଚଳ ଉପରେ ଜିଲା ପରିବହନ ଅଧିକାରୀ ମଧ୍ୟ କଟକଣା ଜାରି କରିଛନ୍ତି। ଗାଡ଼ିର ପଞ୍ଜୀକରଣ ନମ୍ବରକୁ ନେଇ କେଉଁ ତାରିଖରେ ଉକ୍ତ ଗାଡ଼ି ଚଳାଚଳ କରିବ ତାହା ଧାର୍ଯ୍ୟ କରାଯାଇଛି। ଅଡ୍ ଇଭିନ୍ ଫର୍ମୁଲା ମୁତାବକ ଅଟୋ ଚଳାଚଳ କରିବ। ସମସ୍ତ ଅଟୋ ଚାଳକ ନିଜ ଗାଡ଼ିରେ ନିର୍ଦ୍ଧାରିତ ସଂଖ୍ୟାଠାରୁ ଅଧିକ ଯାତ୍ରୀ ନେଇ ଯାଇପାରିବେ ନାହିଁ ବୋଲି ନିର୍ଦ୍ଦେଶନାମା ଜାରି କରାଯାଇଛି। ଏଥିସହିତ ଜିଲା ଭିତରକୁ କାହାକୁ ପ୍ରବେଶ କରିବାକୁ ନ ଦେବା ସହ ଜିଲା ବାହାରକୁ ପ୍ରଶାସନର ବିନା ଅନୁମତିରେ ଛଡ଼ାଯିବ ନାହଁି ବୋଲି ବାଲେଶ୍ୱର ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ସୂଚନା ଦେଇଛନ୍ତି।