ଭବିଷ୍ୟତରେ ଟିମ୍‌ ଇଣ୍ଡିଆର କୋଚ୍‌ ପଦ ପାଇଁ ଆବେଦନ କରିବି- ଗାଙ୍ଗୁଲି

କୋଲକାତା,୩।୮- ଆଗାମୀ ଭବିଷ୍ୟତରେ ମୁଁ ଭାରତୀୟ ଦଳର କୋଚ୍‌ ହେବାକୁ ଚାହିଁବି। ହେଲେ ବର୍ତ୍ତମାନ ଏହି ଗୁରୁତ୍ୱପୂର୍ଣ୍ଣ ପଦବୀ ଲାଗି ଇଚ୍ଛା ନାହିଁ ବୋଲି ପୂର୍ବତନ ଅଧିନାୟକ ସୌରଭ ଗାଙ୍ଗୁଲି କହିଛନ୍ତି। ଦାଦା ଭାବେ ପରିଚିତ ୪୭ ବର୍ଷୀୟ ପୂର୍ବତନ କ୍ରିକେଟର ଏବେ କ୍ରିକେଟ ଆସୋସିଏଶନ ଅଫ୍‌ ବେଙ୍ଗଲ (ସିଏବି)ର ସଭାପତି ଅଛନ୍ତି। ଏହା ବ୍ୟତୀତ ଆଇପିଏଲ ଫ୍ରାଞ୍ଚାଇଜ ଦିଲ୍ଲୀ କ୍ୟାପିଟାଲ୍ସ ସହ ଉପଦେଷ୍ଟା ଥିବାବେଳେ କ୍ରିକେଟ ଭାଷ୍ୟକାର ଭାବେ ମଧ୍ୟ କାର୍ଯ୍ୟ କରୁଛନ୍ତି। ଏକ ଇଭେଣ୍ଟରେ ଯୋଗଦେବା ଅବସରରେ ଗାଙ୍ଗୁଲି କହିଛନ୍ତି, ବର୍ତ୍ତମାନ ମୁଁ ଆଇପିଏଲ୍‌, ସିଏବି, ଟିଭି କମେଣ୍ଟ୍ରି ସହ ଜଡ଼ିତ ରହିଛି। ଏଗୁଡ଼ିକୁ ଶେଷ କରିବାକୁ ସମୟ ଦରକାର। ଭବିଷ୍ୟତରେ ମୁଁ ନିଶ୍ଚିତ ଭାରତୀୟ ଦଳର ମୁଖ୍ୟକୋଚ୍‌ ପଦ ଲାଗି ଆବେଦନ କରିବି। ଏହାବାଦ୍‌ କୋଚ୍‌ ଲାଗି ଆବେଦନକାରୀଙ୍କ ମଧ୍ୟରେ ମୁଁ ବଡ଼ ନାମ ଦେଖିପାରୁ ନାହିଁ। ମାହେଲା ଜୟବର୍ଦ୍ଧନେ ଆବେଦନ କରିବେ ବୋଲି ଶୁଣିଥିଲି। କିନ୍ତୁ ସେ କଲେ ନାହିଁ। ଉପଦେଷ୍ଟା କମିଟି କ’ଣ ନିଷ୍ପତ୍ତି ନେବ ମୁଁ ଜାଣି ନାହିଁ। ସେ ରବି ଶାସ୍ତ୍ରୀଙ୍କ କାର୍ଯ୍ୟକାଳ ସମ୍ପର୍କରେ ମତ ଦେବାକୁ ମନା କରିି ଦେଇଛନ୍ତି। ଉଲ୍ଲେଖଥାଉ କି, ଗାଙ୍ଗୁଲିଙ୍କ ଅଧ୍ୟକ୍ଷତାରେ କ୍ରିକେଟ ଉପଦେଷ୍ଟା କମିଟି (ସିଏସି) ଶାସ୍ତ୍ରୀଙ୍କୁ ଟିମ୍‌ ଇଣ୍ଡିଆର କୋଚ୍‌ ପାଇଁ ଚୟନ କରିଥିଲେ। ଏବେ କମିଟି ଅଧ୍ୟକ୍ଷ ପଦରେ କପିଳ ଦେବ ଅଛନ୍ତି। ଏହାର ସଦସ୍ୟ ଅଂଶୁମାନ ଗାଏକ୍ୱାଡ ଓ ଶାନ୍ତା ରଙ୍ଗାସ୍ବାମୀ ନୂଆ କୋଚ୍‌ ଚୟନ କରିବେ।