ଢେଙ୍କାନାଳ ଅଫିସ, ୨୭।୫ – ଅନୁସୂଚିତ ଜାତି ଏବଂ ଜନଜାତି ବର୍ଗର ପିଲାମାନଙ୍କୁ ଶିକ୍ଷାରେ ସକ୍ଷମ କରାଇବାକୁ କାର୍ଯ୍ୟକାରୀ ହେଉଛି ଅନେକ ଯୋଜନା। ସେମାନଙ୍କ ହାତରେ ଖଡ଼ି ଧରାଇବାକୁ ଖର୍ଚ୍ଚ କରାଯାଉଛି କୋଟି କୋଟି ଟଙ୍କା। ହେଲେ ଠିକ୍ ସମୟରେ ଅବ୍ୟବସ୍ଥିତ ଯୋଜନା କୋମଳମତି ପିଲାଙ୍କ ଭବିଷ୍ୟତକୁ ଅନ୍ଧକାର ମଧ୍ୟକୁ ଠେଲି ଦେଉଛି। କରୋନା ସଙ୍କଟରେ ଏହାର ଉଦାହରଣ ଦେଖିବାକୁ ମିଳିଛି ଢେଙ୍କାନାଳ ଜିଲାରେ। ଲକ୍ଡାଉନ୍ ସମୟରେ ମଙ୍ଗଳ ବିଭାଗ ପକ୍ଷରୁ ୫,୨୨୭ ଏସ୍ସିଏସ୍ଟି ଛାତ୍ରୀଛାତ୍ରଙ୍କୁ ପାଠପଢ଼ାଇବାକୁ ନିଷ୍ପତ୍ତି ନିଆଯାଇଛି। ହେଲେ ବହୁ ବିଳମ୍ବରେ ଏବଂ ଯୋଜନାହୀନ ଭାବେ ନିଆଯାଇଥିବା ଏପରି ପଦକ୍ଷେପ ଆରମ୍ଭରୁ ହିଁ ବାଟ ହୁଡ଼ିବ ବୋଲି ଆଶଙ୍କା ବ୍ୟକ୍ତ କରିଛନ୍ତି ବୁଦ୍ଧିଜୀବୀ ଏବଂ ଅଭିଭାବକ।
ବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଜିଲା ମଙ୍ଗଳ ବିଭାଗ ଅଧୀନରେ ୩୮ଟି ଅନୁସୂଚିତ ଜାତି ଏବଂ ଜନଜାତି ବିଦ୍ୟାଳୟ ରହିଛି। ଏଠାରେ ୩୨୭ ଗ୍ରାମର ୫,୨୨୭ଜଣ ପିଲା ପାଠ ପଢୁଛନ୍ତି। ଅଧିକାଂଶ ସ୍କୁଲରେ ଛାତ୍ରାବାସ ସୁବିଧା ରହିଛି। କରୋନା ସଂକ୍ରମଣ ବଢ଼ିବା ପରେ ଦୁଇମାସ ହେଲା ସ୍କୁଲ ବନ୍ଦ ରହିଛି। ପିଲାମାନଙ୍କୁ ସେମାନଙ୍କ ଘରକୁ ପଠାଇ ଦିଆଯାଇଛି। ହଷ୍ଟେଲ ଏବଂ ସ୍କୁଲରେ କରୋନା ମୁକାବିଲାରେ ନିୟୋଜିତ ସ୍ବାସ୍ଥ୍ୟକର୍ମୀଙ୍କୁ ରଖାଯାଇଛି। ଜିଲାରେ କରୋନା ମାମଲା ବଢୁଥିବାବେଳେ କେତେଦିନ ଯାଏ ସ୍କୁଲ ବନ୍ଦ ରହିବ ତାହା ମଧ୍ୟ କହିହେଉନାହିଁ। ଅପରପକ୍ଷେ ଇଂଲିଶ ମିଡିୟମ ଏବଂ ଅନ୍ୟ ସରକାରୀ ବିଦ୍ୟାଳୟରେ ଶିକ୍ଷାଭିତ୍ତିକ ଆପ୍ ମାଧ୍ୟମରେ ପାଠପଢ଼ା ଚାଲିଛି। ହେଲେ ଅନୁସୂଚିତ ଜାତି ଓ ଜନଜାତି ସ୍କୁଲରେ ପଢୁଥିବା ଆର୍ଥିକ ଅନଗ୍ରସର ବର୍ଗର ପିଲାଙ୍କ ପାଖରେ ଆଣ୍ଡ୍ରଏଡ୍ ମୋବାଇଲ ନ ଥିବାରୁ ସେମାନେ ଏଥିରୁ ବଞ୍ଚତ୍ତ ହେଉଛନ୍ତି। ସରକାରୀ ସ୍କୁଲରେ ପ୍ରଥମରୁ ୯ମ ଶ୍ରେଣୀ ଯାଏ ସମସ୍ତ ଛାତ୍ରୀଛାତ୍ରଙ୍କୁ ପାସ୍ ବୋଲି ଘୋଷଣା କରାଯାଇଛି। ହେଲେ ତଦନୁଯାୟୀ ମଙ୍ଗଳ ବିଭାଗ ସ୍କୁଲରେ ଆଗୁଆ ଯୋଜନା ପ୍ରସ୍ତୁତ ହୋଇ ନ ଥିବାରୁ ପିଲାଙ୍କ ଭବିଷ୍ୟତକୁ ଚିନ୍ତା ପ୍ରକଟ କରିଛନ୍ତି ଅଭିଭାବକ। ସମ୍ପୃକ୍ତ ଛାତ୍ରୀଛାତ୍ରଙ୍କ ଲାଗି ରାଜ୍ୟ ସରକାରଙ୍କ ପକ୍ଷରୁ ନିର୍ଦ୍ଦିଷ୍ଟ ଯୋଜନା ପ୍ରସ୍ତୁତ କରି ଶିକ୍ଷାଦାନ କରିବାକୁ ସେମାନେ ଦାବି କରିଛନ୍ତି।
ଏ ସଂକ୍ରାନ୍ତରେ ଜିଲା ମଙ୍ଗଳ ଅଧିକାରୀ ମାନସ ରଞ୍ଜନ ମିଶ୍ର କୁହନ୍ତି, ସ୍କୁଲ ଖୋଲିବା ନେଇ ଏବେ ସୁଦ୍ଧା କୌଣସି ନିଷ୍ପତ୍ତି ହୋଇନାହିଁ। ପିଲାମାନଙ୍କୁ ଶିକ୍ଷାଦାନରେ ସହାୟତା କରିବାକୁ ବିଭାଗର ୧୫୪ ଶିକ୍ଷୟିତ୍ରୀଶିକ୍ଷକଙ୍କୁ ନିୟୋଜିତ କରାଯିବାକୁ ଯୋଜନା କରାଯାଇଛି। ସେମାନେ ବିଭିନ୍ନ ଗ୍ରାମକୁ ଯାଇ କମ୍ୟୁନିଟି ସେଣ୍ଟର କିମ୍ବା ନିର୍ବିବାଦୀୟ ସ୍ଥାନରେ ପିଲାଙ୍କୁ ଏକାଠି କରି ମେଣ୍ଟର ଭାବେ ଶିକ୍ଷାଦାନ କରିବେ। ଆପ୍ ମାଧ୍ୟମରେ କିପରି ପାଠ ପଢ଼ିବାକୁ ହେବ ସେ ନେଇ ବୁଝାଇବେ। ପିଲାଙ୍କୁ ବିଧିବଦ୍ଧ ଭାବେ ନୋଟ୍ ଦିଆଯିବ। ବାତ୍ୟା ‘ଅମ୍ଫନ୍’ ପୂର୍ବରୁ ଏହା ହେବାର ଥିଲା। ହେଲେ ବାତ୍ୟା ଯୋଗୁ ଏହାକୁ ସ୍ଥଗିତ ରଖାଯାଇଥିଲା। ଏବେ ହଷ୍ଟେଲ, ବିଦ୍ୟାଳୟରେ କରୋନା ଯୋଦ୍ଧା ରହୁଥିବାରୁ ସ୍କୁଲ ଖୋଲିବା ପରେ ସେଗୁଡ଼ିକୁ ଭଲ ଭାବେ ସାନିଟାଇଜ୍ କରାଯିବ। ଏହାପରେ ପିଲାଙ୍କୁ ଆଣି ବ୍ୟବସ୍ଥିତ ଭାବେ ପାଠପଢ଼ା ଆରମ୍ଭ ହେବ ବୋଲି ସେ ସୂଚନା ଦେଇଛନ୍ତି।