ନୂଆଦିଲ୍ଲୀ,୨୧।୫: ଆସନ୍ତା ୨୩ ତାରିଖରେ ଲୋକ ସଭା ନିର୍ବାଚନର ଫଳାଫଳ ଘୋଷଣା ହେବାକୁ ଥିବା ବେଳେ ଏବେ ସମସ୍ତଙ୍କ ନଜର ଏକ୍ଜିଟ୍ ପୋଲ୍ ଉପରେ। ଏହି ସମୟରେ ଅନ୍ଲାଇନ୍ ଫୁଡ୍ ଡେଲିଭରି ସିଷ୍ଟମ ଜମାଟୋ ତା’ର ଗ୍ରାହକଙ୍କୁ ଆକର୍ଷିତ କରିବାକୁ ୨୨ ତାରିଖ ପର୍ଯ୍ୟନ୍ତ ଦେଉଛି ଆକର୍ଷଣୀୟ ଅଫର୍। ଯେଉଁମାନଙ୍କର ଭବିଷ୍ୟବାଣୀ ଠିକ୍ ହେବ ସେମାନଙ୍କୁ ଫୁଡ୍ ଅର୍ଡର କଲେ ମିଳିବ କ୍ୟାସବ୍ୟାକ୍ ଅଫର୍। ‘ଜମାଟୋ ଇଲେକ୍ସନ୍ ଲିଗ୍’ ନାମକ ଏହି ଅଫରରେ ଗ୍ରାହକଙ୍କୁ କ୍ୟାସ୍ବ୍ୟାକ୍ ମିଳିବାର ସୁବିଧା ରହିଛି। ତେବେ ଗ୍ରାହକଙ୍କ ପ୍ରତି ଅର୍ଡରରେ ୪୦ ପ୍ରତିଶତ ରିହାତି ମିଳିବା ସହ ଯଦି ଭବିଷ୍ୟବାଣୀ ଠିକ୍ ହେବ ତେବେ ୩୦ ପ୍ରତିଶତ କ୍ୟାସବ୍ୟାକ୍ ମିଳିବ ବୋଲି କମ୍ପାନୀ ଘୋଷଣା କରିଛି। କମ୍ପାନୀ ଆହୁରି ମଧ୍ୟ ସ୍ପଷ୍ଟ କରିଛି ଯେ ଯେମିତି ନୂଆ ପ୍ରଧାନମନ୍ତ୍ରୀ ମନୋନୀତ ହୋଇଯିବେ ଗ୍ରାହକଙ୍କ ଓ୍ବାଲେଟକୁ ଆପଣାଛାଏଁ କ୍ୟାସବ୍ୟାକ୍ ଆସିଯିବ। ସୂଚନା ଅନୁଯାୟୀ, ବର୍ତ୍ତମାନ ସୁଦ୍ଧା ଭାରତର ୨୫୦ ସହରରେ ୩ଲକ୍ଷ ୨୦ ହଜାର ଲୋକ ଏହି ଅଫରରେ ଭାଗ ନେଇ ସାରିଲେଣି। ଏହା ପୂର୍ବରୁ ଜମାଟୋ ପ୍ରିମିୟର ଲିଗ୍ ମାଧ୍ୟମରେ ମଧ୍ୟ ଇଣ୍ଡିଆନ୍ ପ୍ରିମିୟର ଲିଗ୍ର ସଠିକ୍ ବିଜେତା ଟିମ୍ଙ୍କ ନାଁ ଭବିଷ୍ୟବାଣୀ କରି କ୍ୟାସ୍ବ୍ୟାକ୍ ଅଫର୍ ଦେଇଥିଲା।