ନୂଆଦିଲ୍ଲୀ,୨୯।୪: ସାରା ଦେଶରେ ଲକ୍ଡାଉନ ଏବଂ ଚାହିଦା ହ୍ରାସ ଭଳି ସମସ୍ୟା ସହ ଦେଶର ଅଟୋ କମ୍ପାନୀଗୁଡ଼ିକ ଜୁଝିହେଉଛନ୍ତି। ମାନ୍ଦାବସ୍ଥା ଲାଗି ଗତ ଗୋଟିଏ ବର୍ଷ ହେବ ଦେଶର ଅଟୋ କମ୍ପାନୀ ସମସ୍ୟାରେ ଅଛନ୍ତି। ବର୍ତ୍ତମାନର କୋଭିଡ୍-୧୯ ସ୍ଥିତି କମ୍ପାନୀଗୁଡିକର ଚିନ୍ତାକୁ ଆହୁରି ବଢ଼ାଇଛି। ଲକ୍ଡାଉନ ବଢିଥିବାରୁ ଏହି ସମୟରେ ଗାଡ଼ି ଶୋ’ରୁମ୍ଗୁଡିକ ବନ୍ଦ ରହିଛି। ଚାହିଦା ଫେରାଇ ଆଣିବା ଦିଗରେ ସ୍ବତନ୍ତ୍ର ଯୋଜନା ହାତକୁ ନେବାର ଆବଶ୍ୟକତା ରହିଛି ବୋଲି ଇଣ୍ଡିଆ ରେଟିଂସ ପକ୍ଷରୁ ମତପ୍ରକାଶ ପାଇଛି। କୋଭିଡ୍-୧୯ ପୂର୍ବରୁ ଅଟୋମୋବାଇଲ କମ୍ପାନୀଗୁଡ଼ିକର ବିକ୍ରିରେ ୧୫ରୁ ୨୦% ହ୍ରାସ ଦେଖାଯାଇଥିଲା। ରପ୍ତାନି ଉପରେ ମଧ୍ୟ ଚାପ ରହିଥିବାରୁ କମ୍ପାନୀଗୁଡିକର ଚିନ୍ତା ବଢିଛି। ଗୋଟିଏ ପକ୍ଷେ କହିବାକୁ ଗଲେ ଅଟୋ କମ୍ପାନୀଗୁଡିକ ଆଗାମୀ ଦିନକୁ ନେଇ ଚିନ୍ତିତ ହୋଇ ପଡ଼ିଛନ୍ତି। ଭବିଷ୍ୟତରେ ବିକ୍ରି ଧାରାର ରୂପରେଖ କିଭଳି ରହିବ ତାକୁ ନେଇ ଶିଳ୍ପ ପକ୍ଷରୁ ଠିକ୍ ଆକଳନ କରାଯାଇପାରି ନାହିଁ।
ପ୍ରମୁଖ କାର ନିର୍ମାଣକାରୀ କମ୍ପାନୀ ମାରୁତି ସୁଜୁକି ଇଣ୍ଡିଆର ମାର୍ଚ୍ଚରେ ଅଟୋଡିଲରଙ୍କ ପାଖକୁ ଗାଡି ପ୍ରେରଣ ପ୍ରାୟ ୪୭% ଖସିଛି। ସେହିଭଳି ୨୦୧୯ ମାର୍ଚ୍ଚ ତୁଳନାରେ ଚଳିତ ବର୍ଷ ମାର୍ଚ୍ଚରେ ଗାଡି ଡେସ୍ପାଚ୍ ପ୍ରାୟ ୩୦ରୁ ୯୦% ଖସିଥିବା କମ୍ପାନୀଗୁଡିକ କହିଛନ୍ତି। ଆଗାମୀ ୨ ତ୍ରୈମାସ ଲାଗି ଗାଡ଼ି ରପ୍ତାନି ପ୍ରଭାବିତ ରହିବ ବୋଲି ଇକ୍ରା ପକ୍ଷରୁ ଆଶଙ୍କା କରାଯାଇଛି। ପ୍ରମୁଖ କମ୍ପାନୀଗୁଡିକ ୨୦ରୁ ୫୦% ରପ୍ତାନି ହ୍ରାସର ସାମ୍ନା କରିପାରନ୍ତି। ଶିଳ୍ପ କେବେ ସ୍ଥିତାବସ୍ଥାକୁ ଫେରିବ ସେ ନେଇ କହି ହେବ ନାହିଁ ବୋଲି ଚକନ ଭିତ୍ତିକ ଜଣେ ଅଟୋ କମ୍ପୋନେଣ୍ଟ ମାନୁଫାଚରର ମତ ଦେଇଛନ୍ତି। ଏହି କ୍ଷେତ୍ରରେ କାମ କରୁଥିବା କ୍ଷୁଦ୍ର ୟୁନିଟଗୁଡିକ ସରକାରଙ୍କ ସହାୟତା ଆଶାରେ ରହିଛନ୍ତି। ଉକ୍ତ କ୍ଷେତ୍ରଗୁଡିକରେ ଚାକିରି ଯିବାର ଆଶଙ୍କା ଉପୁଜିଥିବାରୁ ଟିକସ ରିହାତି ସହ ଅନ୍ୟ ସୁବିଧା ଦେବା ଉପରେ ଶିଳ୍ପ ପକ୍ଷରୁ ଦାବି ଉଠିଛି।