ନୂଆଦିଲ୍ଲୀ: ସାରା ବିଶ୍ୱରେ କେଉଁ ଦେଶର ଲୋକେ ରାତିରେ ଭଲରେ ଶୋଉଛନ୍ତି ଯଦି ପ୍ରଶ୍ନ ପଚରାଯାଏ ତେବେ ଭାରତୀୟଙ୍କ ନାଁ ପ୍ରଥମରେ ଆସିବ। ଏହା ପଛକୁ ସାଉଦି ଆରବ ଓ ତା’ ପଛକୁ ରହିଛି ଚାଇନା। ଫିଲିପ୍ସ ପକ୍ଷରୁ ଗ୍ଲୋବାଲ୍ ମାର୍କେଟ ରିସର୍ଚ୍ଚ ଫାର୍ମ କେ.ଜେ.ଟି ଦ୍ୱାରା କରାଯାଇଥିବା ଏକ ଅନ୍ଲାଇନ ସ୍ଲିପ୍ ସର୍ଭେରୁ ଏହା ଜଣାପଡିଛି । ୧୨ଟି ଦେଶର ୧୮ ଓ ଏହାଠାରୁ ବେଶି ବର୍ଷ ବୟସର ଲୋକମାନଙ୍କୁ ନେଇ ଏକ ସର୍ଭେ କରାଯାଇଥିଲା। ଦକ୍ଷିଣ କୋରିଆରେ ସବୁଠାରୁ ବେଶି ଲୋକ ଭଲରେ ଶୋଇପାରନ୍ତିନାହିଁ ଓ ଏହା ପଛକୁ ରହିଛି ଜାପାନ । ପ୍ରତିଦିନ ୮ ଘଣ୍ଟା ଶୋଇବାକୁ ସ୍ବାସ୍ଥ୍ୟ ବିଶେଷଜ୍ଞମାନେ ମତ ଦେଉଥିବାବେଳେ କେବଳ ସାପ୍ତାହିକ ଛୁଟିରେ ଏହାଠାରୁ ବେଶି ସମୟ ଶୋଉଥିବା ଜଣାପଡିଛି। ଏହି ସର୍ଭେରେ ସ୍ବଷ୍ଟ କରାଯାଇଛି ଯେ, କାନାଡା ଓ ସିଙ୍ଗାପୋରରେ ବିଷାଦ ଓ ବ୍ୟସ୍ତତା ଯୋଗୁ ଶୋଇବାରେ ବ୍ୟାଘାତ ଘଟୁଛି। ସର୍ଭେରେ ଆଉ କିଛି ତଥ୍ୟ ମଧ୍ୟ ସାମ୍ନାକୁ ଆସିଛି। କୁହାଯାଇଛି ଯେ, ୩୫ ପ୍ରତିଶତ ମହିଳା ଘୁଙ୍ଗୁଡିି ମାରୁଥିବା ସ୍ବାମୀଙ୍କ ପାଖରେ ବେଳେବେଳେ ନିଦରେ ଶୋଇପାରନ୍ତି କିମ୍ବା ସେମାନଙ୍କୁ ଆଦୌ ନିଦହୁଏନାହିଁ। ୬୭ ପ୍ରତିଶତ ଲୋକଙ୍କର ରାତିରେ ଥରେ ନିଦ ଭାଙ୍ଗେ ବୋଲି ସର୍ଭେରୁ ଜଣାପଡିଛି। ଏହା ମଧ୍ୟ କୁହାଯାଇଛି ଯେ,ଆମେରିକାରେ ୩୦ ପ୍ରତିଶତ ଓ ଭାରତରେ ୩୬ ପ୍ରତିଶତ ବୟସ୍କ ପେଟ୍ ସହ ଶୋଇବାକୁ ଭଲ ପାଆନ୍ତି।