ନୂଆଦିଲ୍ଲୀ,୧୧।୬: ଭାରତୀୟ ଅର୍ଥ ବ୍ୟବସ୍ଥାକୁ ନେଇ ବର୍ତ୍ତମାନ ଅନେକ ନକାରାତ୍ମକ ରିପୋର୍ଟ ସାମ୍ନାକୁ ଆସୁଛି। ୟା’ମଧ୍ୟରେ ଏକ ଭଲ ଖବର ଆସିଥିବା ଜଣାପଡିଛି। ଆସନ୍ତା ଆର୍ଥତ୍କ ବର୍ଷ ଭାରତୀୟ ଅର୍ଥ ବ୍ୟବସ୍ଥା ଲାଗି ଭଲ ରହିବ ବୋଲି ରେଟିଂ ଏଜେନ୍ସି ଫିଚ୍ ବୁଧବାର କହିଛି। ଆର୍ଥତ୍କ ବର୍ଷ ୨୦୨୧-୨୨ରେ ଭାରତର ଅଭିବୃଦ୍ଧି ହାର ୯.୫% ରହିପାରେ ବୋଲି ଏହି ଏଜେନ୍ସି ଅନୁମାନ ଲଗାଇଛି। ୨୦୨୦-୨୧ରେ ଦେଶର ଅର୍ଥ ବ୍ୟବସ୍ଥା ୫% ତଳକୁ ଖସିବା ନେଇ ଅନେକ ଏଜେନ୍ସି ଅନୁମାନ ଲଗାଇଛନ୍ତି। ବୁଧବାର ଫିଚ୍ ପକ୍ଷରୁ ଜାରି କରାଯାଇଥିବା ଏକ ରିପୋର୍ଟରେ କୁହାଯାଇଛି ଯେ, କରୋନା ଜନିତ ଲକ୍ଡାଉନ ଘୋଷଣା ହେବା ପୂର୍ବରୁ ଭାରତୀୟ ଅର୍ଥ ବ୍ୟବସ୍ଥା ମାନ୍ଦାବସ୍ଥା ଦେଇ ଗତି କରୁଥିଲା। ଏହି ରେଟିଂ ଏଜେନ୍ସି ଏସିଆ ପ୍ରଶାନ୍ତ ମହାସାଗରୀୟ ଅଞ୍ଚଳର କ୍ରେଡିଟ ଆଉଟଲୁକ ସମ୍ପର୍କରେ ସୂଚନା ଦେଇଛି। ଏଥିରେ କୁହାଯାଇଛି ଯେ, କରୋନା ଦେଶର ଅଭିବୃଦ୍ଧିକୁ ଧୀମା କରିଦେଇଛି। ସରକାରଙ୍କ ଉପରେ ଋଣ ଚାପ ରହିଥିବାରୁ ଏହା ଚ୍ୟାଲେଞ୍ଜିଂ ସ୍ଥିତି ସୃଷ୍ଟି କରିବ। ମହାମାରୀର ପ୍ରଭାବ ବଜାର ଉପରୁ ଯିବା ପରେ ଅଭିବୃଦ୍ଧି ଧାରା ପୁଣି ଥରେ ଟ୍ରାକ୍କୁ ଫେରିବା ନେଇ ଏହା ଆଶାବାଦୀ ଥିବା କହିଛି। ଏହା ଉଚ୍ଚ ସ୍ତର ଛୁଇଁବା ନେଇ ମଧ୍ୟ ଅନୁମାନ ଲଗାଯାଇଛି। ଏଣୁ ଆସନ୍ତା ଆର୍ଥତ୍କ ବର୍ଷ ଏହା ୯.୫% ହାରରେ ଅଭିବୃଦ୍ଧି କରିବା ନେଇ ଅନୁମାନ ଲଗାଯାଇଛି। ବିବିବି ରେଟିଂ ବର୍ଗରେ ଏହା ଅଧିକ ହେବ ବୋଲି କୁହାଯାଇଛି।