ପାଟନା,୭।୭: ପୂର୍ବତନ କଂଗ୍ରେସ ଅଧ୍ୟକ୍ଷ ତଥା ଓ୍ବୟନାଡ ଲୋକ ସଭା ଆସନର ଏମ୍ପି ରାହୁଲ ଗାନ୍ଧୀଙ୍କର ଦୋସା ଖାଇବାର ଏକ ଫଟୋ ଏବେ ଭାଇରାଲ ହେବାରେ ଲାଗିଛି। ସୂଚନାଯୋଗ୍ୟ, ଶନିବାର ରାହୁଲ ଏକ ମାନହାନି ମାମଲାରେ ପାଟନା କୋର୍ଟରେ ହାଜର ହେବାକୁ ଥିବାବେଳେ ସେ ବିହାର ପହଞ୍ଚିଥିଲେ। ସେ ହାଜର ହେବା ପରେ ତାଙ୍କୁ ଜାମିନ ମଧ୍ୟ ମିଳିଯାଇଥିଲା। ଆଉ ଜାମିନ ପାଇ ଫେରି ଆସିବା ବେଳେ ସେ ବସନ୍ତ ବିହାରରେ ଥିବା ଏକ ରେଷ୍ଟୁରାଣ୍ଟରେ ଜଣେ ସାଧାରଣ ଗ୍ରାହକଙ୍କ ଭଳି ପହଞ୍ଚି ଦୋସା ଖାଇବା ସହ କଫି ପିଇଥିଲେ। ଏହାକୁ ଦେଖି ସେଠାରେ ଥିବା ଲୋକେ ରାହୁଲଙ୍କୁ ଏତେ ପାଖରେ ପାଇ ଆଶ୍ଚର୍ଯ୍ୟ ହୋଇ ଯାଇଥିଲେ ଓ ଅନେକ ଲୋକ ମୋବାଇଲରେ ରାହୁଲଙ୍କ ଦୋସା ଖାଇବାର ଫଟୋ ଉଠାଇ ସୋସିଆଲ ମିଡିଆରେ ଅପଲୋଡ କରିବା ପରେ ଏବେ ଏହା ଭାଇରାଲ ହେବାରେ ଲାଗିଛି।
