ଛେଣ୍ଡିପଦା,୧୯।୯(ସ୍ବ.ପ୍ର.) – କାଠ ମାଫିଆଙ୍କ ଉପରେ ରୋକ ଲଗାଇବାକୁ ଅନୁଗୋଳ ଜିଲା ଛେଣ୍ଡିପଦା ବ୍ଲକ ଜରପଡା ବନାଞ୍ଚଳର ଉଗୀ-ଅନ୍ତୁଳିଆ ରାସ୍ତାରେ ଥିବା ତନଖି ଫାଟକ କାମରେ ଆସୁନି। ବନ ବିଭାଗ ପକ୍ଷରୁ ତିଆରି ହୋଇଥିବା ଏହି ତନଖି ଫାଟକ ଓ ଗୃହ ତଦାରଖ ଅଭାବରୁ ଭାଙ୍ଗିରୁଜି ଗଲାଣି। ଏଠାରେ ନିୟୋଜିତ ବନ ଅଧିକାରୀଙ୍କ ମଧ୍ୟ ସେଠାରେ ଦେଖାମିଳୁନି। ଫଳରେ ଉକ୍ତ ରାସ୍ତା ଦେଇ ମାଫିଆମାନେ ବିନା ଦ୍ୱିଧାରେ ନିକଟସ୍ଥ ଜଙ୍ଗଲ ପଦା କରି କାଠ ଚାଲାଣ କରିବାରେ ଲାଗିଛନ୍ତି। ଏହାକୁ ନେଇ ଅଞ୍ଚଳବାସୀ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି।
ସ୍ଥାନୀୟ ଲୋକଙ୍କ ଅଭିଯୋଗ ମୁତାବକ, ଉକ୍ତ ରାସ୍ତା ଦେଇ ମାଫିଆମାନେ ସହଜରେ ଗଛ କାଟି ବାହାରକୁ କାଠ ଚାଲାଣ କରୁଛନ୍ତି। ଏହି ଚୋରି ରୋକିବାକୁ ସେଠାରେ ବନ ବିଭାଗ ପକ୍ଷରୁ ଏକ ତନଖି ଫାଟକ କରାଯାଇଥିଲା। ଏଥିସହ ଜଣେ ଫରେଷ୍ଟରଙ୍କୁ ଦାୟିତ୍ୱ ପ୍ରଦାନ କରାଯାଇଥିଲେ ହେଁ ଅଧିକାଂଶ ସମୟରେ ସେ ଅନୁପସ୍ଥିତ ରହୁଛନ୍ତି। ଫଳରେ ମାଫିଆମାନେ ସାତକୋଶିଆ, ଅନ୍ତୁଳିଆ, ଟାଇଁସି ଆଦି ସଂରକ୍ଷିତ ଜଙ୍ଗଲରୁ ବହୁ ମୂଲ୍ୟବାନ କାଠ ଚୋରି କରି ଚାଲାଣ କରୁଛନ୍ତି। ଏଥିସହ ଫାଟକ ନିକଟରେ ଥିବା ଚାଳଘରଟି ଭାଙ୍ଗି ରୁଜି ଗଲାଣି। ତୁରନ୍ତ ସେଠାରେ ତନଖି ଫାଟକ କାର୍ଯ୍ୟକ୍ଷମ କରାଯିବାକୁ ଦାବି ହୋଇଛି। ଏ ସମ୍ପର୍କରେ ଜରପଡା ବନାଞ୍ଚଳ ଅଧିକାରୀ ହୃଦାନନ୍ଦ ନାଏକ କୁହନ୍ତି, ଦାୟିତ୍ୱରେ ଥିବା ଫରେଷ୍ଟର ସେଠାକୁ ଆସୁ ନ ଥିବାରୁ ତନଖି ଫାଟକଠାରେ ଥିବା ଘରଟି ନଷ୍ଟ ହୋଇଗଲାଣି। ଏ ନେଇ ବହୁଥର ତାଙ୍କୁ କୈଫତ ମଗାଯାଇଥିଲେ ବି କୌଣସି ପରିବର୍ତ୍ତନ ନାହିଁ। ଏ ସଂକ୍ରାନ୍ତରେ ଉଚ୍ଚ କର୍ତ୍ତୃପକ୍ଷଙ୍କୁ ଜଣାଯିବ।