ନୂଆଦିଲ୍ଲୀ, ୧୭।୭: ଉତ୍ତରାଖଣ୍ଡ ବିଧାୟକ ପ୍ରଣବ ସିଂହ ଚାମ୍ପିଅନ ଦୁଇ ହାତରେ ବନ୍ଧୁକ ଧରି ନାଚୁଥିବା ଦୃଶ୍ୟ ସୋସିଆଲ ମିଡିଆରେ ଭାଇରାଲ ହେବାପରେ ତାଙ୍କୁ ଦଳରୁ ୬ ବର୍ଷ ପାଇଁ ବାସନ୍ଦ କରାଯାଇଛି। ଭିଡିଓରେ ସେ କଳା ଗଞ୍ଜି ଓ ଧଳା ଟ୍ରାଉଜର ପିନ୍ଧିଥିବାବେଳେ ଡାହଣ ହାତରେ ମଦ ପିଇବା ସହିତ ବାମ ହାତରେ ୨ ଟି ବନ୍ଧୁକ ଧରି ହିନ୍ଦୀ ଫିଲ୍ମ ଗୀତ ‘ମୁଝକୋ ରାଣାଜୀ ମାଫ କରନା’ର ତାଳେ ତାଳେ ନିଜ ଘର ଭିତରେ ଆୟୋଜିତ ହାଉସ ପାର୍ଟିରେ ନାଚୁଥିବା ଦେଖିବାକୁ ମିଳଥିଲା ସେହିଭଳି ସେଠାରେ ଉପସ୍ଥିତ ଥିବା ତାଙ୍କର ଜଣେ ସାଥୀଙ୍କୁ ସେ ମଦ ଗ୍ଲାସ ଦେଇ ତାଙ୍କଠାରୁ ଆଉ ଏକ ପିସ୍ତଲ ଡାହାଣ ହାତରେ ଧରୁଛନ୍ତି । ଏପରିକି ଗୋଟିଏ ପିସ୍ତଲକୁ ନିଜ ପାଟିରେ କାମୁଡି କିଛି ସମୟ ଧରିଥିଲେ। ତାଙ୍କ ନିକଟରେ ଆଉ ଦୁଇଜଣ ବ୍ୟକ୍ତିଙ୍କୁ ମଧ୍ୟ ଦେଖିବାକୁ ମିଳିଥିଲା। ସୋସିଆଲ ମିଡିଆରେ ଏହି ଭିଡିଓ ଭାଇରାଲ ହେବା ପରେ ତାକୁ ନେଇ ଭାଜପାରେ ତୀବ୍ର ଅସନ୍ତୋଷ ପ୍ରକାଶ କରିବା ସହ ପ୍ରଣବଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଦାବି କରିଥିଲେ। ସୂଚନାଯୋଗ୍ୟ, ସାମ୍ବାଦିକଙ୍କୁ ଦୁର୍ବ୍ୟବହାର କରିବା ଅଭିଯୋଗରେ ଗତମାସରେ ସିଂହଙ୍କୁ ୩ ମାସ ପାଇଁ ଦଳରୁ ନିଲମ୍ବିତ କରାଯାଇଥିଲା। ଏଥିସହିତ ତାଙ୍କୁ କାରଣ ଦର୍ଶାଅ ନୋଟିସ ମଧ୍ୟ ଜାରି କରାଯାଇଥିଲା। ସିଂହ ଖାନପୁରର ବାସିନ୍ଦା ହୋଇଥିଲା ବେଳେ ହରିଦ୍ୱାର ସଂସଦୀୟ କ୍ଷେତ୍ର ଅନ୍ତର୍ଗତ ଲକ୍ସର ବିଧାନସଭା ଆସନରୁ ପ୍ରତନିଧିତ୍ୱ କରୁଛନ୍ତି। ପୂର୍ବରୁ ସେ କଂଗ୍ରେସରେ ଥିଲେ।