ମୁମ୍ବାଇ,୧୧।୧୨: ଭାଜପାର ବରିଷ୍ଠ ନେତ୍ରୀ ତଥା ପୂର୍ବତନ ମୁଖ୍ୟମନ୍ତ୍ରୀ ଗୋପୀନାଥ ମୁଣ୍ଡେଙ୍କ ଝିଅ ପଙ୍କଜା ମୁଣ୍ଡେଙ୍କୁ ନେଇ ଏବେ ଚର୍ଚ୍ଚା ଜୋର ଧରିଛି। ସେ ଖୁବ୍ଶୀଘ୍ର ଦଳ ଛାଡିବେ ବୋଲି ଆଲୋଚନା ହେଉଛି। ସେ ମଙ୍ଗଳବାର ଭାଜପା ପକ୍ଷରୁ ଆୟୋଜିତ କୋର୍ କମିଟି ବୈଠକରେ ଯୋଗ ଦେଇନାହାନ୍ତି। ଡିସେମ୍ବର ୧୨ରେ ଗୋପୀନାଥଗଡରେ ଆୟୋଜିତ ହେବାକୁ ଥିବା ସଭା ପାଇଁ ବ୍ୟସ୍ତ ଥିବାରୁ ସେ ବୈଠକରେ ଯୋଗଦେଇ ନ ଥିବା ପଙ୍କଜା ସଫେଇ ଦେଇଛନ୍ତି। ସୂଚନାଯୋଗ୍ୟ, ମହାରାଷ୍ଟ୍ରରେ ତିନି ଦିନରେ ଫଡନବିସ ସରକାର ଭାଙ୍ଗିବା ପରେ ଭାଜପାରେ ବିଦ୍ରୋହ ଦେଖାଦେଇଛି। ଯଦିଓ ସେ ସିଧାସଳଖ ଭାଜପା କିମ୍ବା ଫଡନବିସଙ୍କ ବିରୋଧରେ କିଛି କହି ନାହାନ୍ତି, ହେଲେ ତାଙ୍କ ପଦକ୍ଷେପ ଅନ୍ୟ କିଛି ସଙ୍କେତ ଦେଇଛି। ଡିସେମ୍ବର ୧୨ ତାରିଖରେ ଗୋପୀନାଥ ମୁଣ୍ଡେଙ୍କ ଜନ୍ମଦିନ। ଏହି ଦିନ ପଙ୍କଜା ନିଜ ସମର୍ଥକମାନଙ୍କୁ ଡାକିଛନ୍ତି। ସମର୍ଥକମାନଙ୍କ ସହ ସେ ଆଲୋଚନା କରିବେ। ୧୦ ଦିନ ଭିତରେ ବଡ ନିଷ୍ପତ୍ତି ନେବେ ବୋଲି ପଙ୍କଜା ନିଜ ଫେସବୁକରେ ପୋଷ୍ଟ କରି କହିଥିଲେ। ପଙ୍କଜା ମୁଣ୍ଡେ ଏଥର ନିର୍ବାଚନ ହାରିଛନ୍ତି। ମହାରାଷ୍ଟ୍ର ପରଲି ଆସନରୁ ସେ ନିର୍ବାଚନ ଲିଥିଲେ। ତାଙ୍କ ବିପକ୍ଷରେ ଧନଞ୍ଜୟ ମୁଣ୍ଡେ ଏନସିପିରୁ ପ୍ରାର୍ଥୀ ହୋଇଥିଲେ। ଧନଞ୍ଜୟ ହେଉଛନ୍ତି ପଙ୍କଜାଙ୍କ ଭାଇ। ପଙ୍କଜାଙ୍କୁ ସେ ୩୦ ହଜାରରୁ ଅଧିକ ଭୋଟରେ ପରାଜିତ କରିଥିଲେ।