ନୂଆଦିଲ୍ଲୀ,୧୨ା୩(ପି.ଟି.): ଆସନ୍ତା ୨୬ରେ ୧୭ ରାଜ୍ୟର ୫୫ ରାଜ୍ୟ ସଭା ଆସନ ପାଇଁ ନିର୍ବାଚନ ହେବ। ଏଥିଲାଗି ଭାଜପା ପକ୍ଷରୁ ବୁଧବାର ସନ୍ଧ୍ୟାରେ ୯ ଜଣିଆ ପ୍ରାର୍ଥୀ ତାଲିକା ଘୋଷଣା କରାଯାଇଛି। କଂଗ୍ରେସ ଛାଡ଼ି ଭାଜପାରେ ସଦ୍ୟ ଯୋଗଦେଇଥିବା ଜ୍ୟୋତିରାଦିତ୍ୟ ସିନ୍ଧିଆଙ୍କ ନାମ ଏହି ତାଲିକାରେ ରହିଛି। ଅନ୍ୟ ୮ ପ୍ରାର୍ଥୀ ହେଲେ ଆସାମରୁ ଭୁବନେଶ୍ୱର କାଲିତା, ବିହାରରୁ ବିବେକ ଠାକୁର, ଗୁଜରାଟରୁ ଅଭୟ ଭରଦ୍ୱାଜ ଓ ରମିଲାବେନ ବାରା, ଝାଡ଼ଖଣ୍ଡରୁ ଦୀପକ ପ୍ରକାଶ, ମଣିପୁରରୁ ଲିଏସେମ୍ବା ମହାରାଜା, ମହାରାଷ୍ଟ୍ରରୁ ଉଦୟରାଜେ ଭୋସଲେ ଏବଂ ରାଜସ୍ଥାନରୁ ରାଜେନ୍ଦ୍ର ଗେହଲଟ। ଅନ୍ୟପକ୍ଷରେ କେନ୍ଦ୍ରମନ୍ତ୍ରୀ ତଥା ଆର୍ପିଆଇ ମୁଖ୍ୟ ରାମଦାସ ଅଠାଓ୍ବଲେଙ୍କୁ ମହାରାଷ୍ଟ୍ରରୁ ପୁନଃ ନିର୍ବାଚିତ ହେବା ପାଇଁ ଭାଜପା ଗୋଟିଏ ଆସନ ଛାଡ଼ିଦେଇଛି। ସେହିପରି ଆସାମରୁ ବିଶ୍ୱଜିତ ଦାଇମାରିଙ୍କୁ ବୋଡୋଲାଣ୍ଡ ପିପୁଲ୍ସ ଫ୍ରଣ୍ଟ ଟିକେଟରୁ ରାଜ୍ୟ ସଭା ନିର୍ବାଚନ ଲଢ଼ିବା ପାଇଁ ମଧ୍ୟ ଭାଜପା ଅନ୍ୟ ଏକ ଆସନ ଛାଡ଼ିଦେଇଛି। ଉପରୋକ୍ତ ରାଜ୍ୟ ବିଧାନସଭାରେ ଭାଜପାର ସଂଖ୍ୟାବଳ ଥିବାରୁ ଏହି ପ୍ରାର୍ଥୀମାନେ ବିଜୟୀ ହେବା ଏପ୍ରକାର ନିଶ୍ଚିତ ହୋଇଛି।