ପୁରୀ ଅଫିସ,୨୬।୫: ୨୦୧୯ ସାଧାରଣ ନିର୍ବାଚନରେ ନରେନ୍ଦ୍ର ମୋଦି ବିପୁଳ ଜନ ସମର୍ଥନ ହାସଲ କରିଛନ୍ତି । ଦ୍ୱିତୀୟ ଥରଲାଗି ସେ ଦେଶର ପ୍ରଧାନମନ୍ତ୍ରୀ ହେବେ। ଏନେଇ ଦେଶସାରା ଉତ୍ସାହର ମାହୋଲ ରହିଛି । କିଏ ବାଣ ଫୁଟାଇ ବିଜୟ ଉତ୍ସବ ପାଳନ କରୁଛନ୍ତି ତ କିଏ ମାନସିକ କରି ୨୪୦ କି.ମି. ସାଇକଲ ଯାତ୍ରା କରି ମହାପ୍ରଭୁଙ୍କ ଦର୍ଶନ କରୁଛନ୍ତି। ଏହିପରି ମୋଦି ଫ୍ୟାନଙ୍କ ମଧ୍ୟରେ ପ୍ରବଳ ଉତ୍ସାହ ଦେଖିବାକୁ ମିଳିଛି । ଏଭଳି ଜଣେ ମୋଦି ଫ୍ୟାନ ହେଉଛନ୍ତି ମୟୂରଭଞ୍ଜ ଜିଲା କପ୍ତିପଦାର ଯୁବଚାଷୀ ସତ୍ୟଜିତ ମହାନ୍ତି। ମୋଦିଙ୍କ ଉଦ୍ଦେଶ୍ୟରେ ସତ୍ୟଜିତ କପ୍ତିପଦାରୁ ଶ୍ରୀକ୍ଷେତ୍ର ସାଇକେଲ ଯାତ୍ରା କରିଛନ୍ତି । ରବିବାର ସକାଳ ୯ଟାରେ ସେ ସିଂହଦ୍ବାର ସମ୍ମୁଖରେ ପହଞ୍ଚି ପତିତପାବନଙ୍କ ଦର୍ଶନ କରିଥିଲେ। ମହୋଦଧି, ଇନ୍ଦ୍ରଦ୍ୟୁମ୍ନ, ଶ୍ବେତଗଙ୍ଗା ଆଦି ତୀର୍ଥରେ ସ୍ନାନ ସାରି ମହାପ୍ରଭୁ ଶ୍ରୀଜଗନ୍ନାଥଙ୍କ ଦର୍ଶନ କରି ମୋଦିଙ୍କ ଦୀର୍ଘାୟୁ କାମନା କରିଥିଲେ। ତାଙ୍କ ନେତୃତ୍ୱରେ ଦେଶର ଉଜ୍ଜ୍ବଳ ଭବିଷ୍ୟତ କାମନା କରିଥିଲେ। ପରେ ଶଙ୍କରାଚାର୍ଯ୍ୟଙ୍କ ଆଶୀର୍ବାଦ ନେଇ ଫେରିଛନ୍ତି।
ଏ ନେଇ ସତ୍ୟଜିତ କହିଛନ୍ତି, ୨୦୦୮ରେ ଗୁଜରାଟରେ ରହିଥିବା ସମୟରେ ମୋଦିଙ୍କ ବିକାଶମୂଳକ କାର୍ଯ୍ୟ, ବଳିଷ୍ଠ ନେତୃତ୍ୱ, ରାଷ୍ଟ୍ରୀୟତା ଭାବରେ ସେ ଅନୁପ୍ରାଣିତ ହୋଇଥିଲେ। ଭବିଷ୍ୟତରେ ସୁଯୋଗ ମିଳିଲେ ମୋଦିଙ୍କୁ ଭେଟି ଶୁଭେଚ୍ଛା ଜଣାଇବେ ବୋଲି ସେ ଆଶା ରଖିଛନ୍ତି। ମୋଦି ଦ୍ବିତୀୟଥର ସଂଖ୍ୟାଗରିଷ୍ଠତା ହାସଲ କଲେ ନିଜ ଗ୍ରାମରୁ ସାଇକେଲ ଯାତ୍ରା କରି ମହାପ୍ରଭୁଙ୍କ ନିକଟରେ ମୋଦିଙ୍କ ମଙ୍ଗଳ କାମନା କରିବେ ବୋଲି ମାନସିକ କରିଥିଲେ ସତ୍ୟଜିତ। ୨୩ ତାରିଖ ଫଳାଫଳ ଘୋଷଣା ପରେ ସେ ଅପରାହ୍ନରେ ମହାପ୍ରଭୁଙ୍କ ଦର୍ଶନ ପାଇଁ ବାହାରିଥିଲେ।