ଭାପୁର/ଖଣ୍ଡପଡା,୧୬ା୬(ଡି.ଏନ.ଏ./ସ୍ବ.ପ୍ର.)-ନୟାଗଡ ଜିଲା ଭାପୁର ବ୍ଲକରେ ଝାଡାବାନ୍ତି ବ୍ୟାପିବାରେ ଲାଗିଛି । ଏହି ରୋଗରେ ୧୦ ଗାଁର ପ୍ରାୟ ୨୫ରୁ ଊର୍ଦ୍ଧ୍ୱଲୋକ ଆକ୍ରାନ୍ତ ହୋଇ ଏବେ ଭାପୁର ଡାକ୍ତରଖାନାରେ ଚିକିତ୍ସତ ହେଉଛନ୍ତି । ପ୍ରବଳ ଗ୍ରୀଷ୍ମ ପ୍ରବାହ ସାଙ୍ଗକୁ ଅସହ୍ୟ ଗୁଳୁଗୁଳି ଯୋଗୁ ଏଥିରେ ଅଧିକରୁ ଅଧିକ ଲୋକ ଆକ୍ରାନ୍ତ ହେଉଥିବା ଜଣାପଡିଛି । ଝାଡାବାନ୍ତିରେ ଭାପୁର ପଞ୍ଚାୟତ ଭାପୁର ଗ୍ରାମର ରମେଶ ଚନ୍ଦ୍ର ବରାଡ(୪୦), ବଡସହରା ପଞ୍ଚାୟତ ନାକଡେଇଁ ଗ୍ରାମର ବାନାମ୍ବର ସାହୁ(୪୪), ମଲ୍ଲିକା ପରିଡା(୬୫), ବିଜିପୁର ପଞ୍ଚାୟତ ମାଳିବେରେଣୀ ଗ୍ରାମର ଚଞ୍ଚଳା ପରିଡା(୬୩), ଅନସୂୟା ପୃଷ୍ଟି(୪୧), ନିମାଣି ପଞ୍ଚାୟତ ନିମାଣି ଗ୍ରାମର ଅହଲ୍ୟା ବେହେରା(୫୦), ଶାଳପଡାଗ୍ରାମର ଅନ୍ନପୂର୍ଣ୍ଣା ପରିଡା(୮୦), ଜହରକୋଟ ଗ୍ରାମର କଇଁଥ ପ୍ରଧାନ(୭୮), ତରବାଲୋ ଗ୍ରାମର ସଂଯୁକ୍ତା ମେକାପ, ମାଳିବେରେଣୀ ଗ୍ରାମର ସିଦ୍ଧାନ୍ତ ପରିଡାଙ୍କ ସମେତ ବହୁ ବ୍ୟକ୍ତି ଆକ୍ରାନ୍ତ ହୋଇ ଭାପୁର ଡାକ୍ତରଖାନାରେ ଚିକିତ୍ସିତ ହେଉଛନ୍ତି ା କେତେଜଣ ଚିକିତ୍ସା ପରେ ସୁସ୍ଥ ହୋଇ ଘରକୁ ଫେରୁଥିବା ବେଳେ ଆଉ କେତେକଙ୍କୁ ଖୋର୍ଦ୍ଧା ଓ ଭୁବନେଶ୍ୱର ସ୍ଥାନାନ୍ତର କରାଯାଉଥିବା ଜଣାପଡିଛି। ଏତେ ସଂଖ୍ୟକ ରୋଗୀ ଏକକାଳୀନ ଡ଼ାକ୍ତରଖାନାରେ ଭର୍ତ୍ତି ହେଉଥିବା ବେଳେ ଡାକ୍ତରଖାନାରେ ଶଯ୍ୟା ନ ଥିବାରୁ ତଳେ ଶୋଇବାକୁ ପଡୁଛି ।ଏ ନେଇ ଭାପୁର ସ୍ବାସ୍ଥ୍ୟକେନ୍ଦ୍ରର ସ୍ବାସ୍ଥ୍ୟାଧିକାରୀଙ୍କୁ ପଚାରିବାରେ ଅତ୍ୟଧିକ ଖରା ଓ ଗୁଳୁଗୁଳି ଯୋଗୁ ଝାଡାବାନ୍ତି ବ୍ୟାପୁଥିବା କହିଥିବା ବେଳେ ଏହାର ପ୍ରତିକାର ପାଇଁ ବିଭାଗୀୟ କର୍ମଚାରୀମାନେ ଚେଷ୍ଟା ଚଳାଇଥିବା ସେ କହିଥିଲେ ।