ମାଞ୍ଚେଷ୍ଟର,୫।୭- ଦକ୍ଷିଣ ଆଫ୍ରିକା ଲେଗ୍ ସ୍ପିନର ଇମ୍ରାନ ତାହିର ଅନ୍ତର୍ଜାତୀୟ ଦିନିକିଆ କ୍ରିକେଟରୁ ସନ୍ନ୍ୟାସ ନେବା ଲାଗି ପ୍ରସ୍ତୁତ। ଶନିବାର ଡିଫେଣ୍ଡିଂ ଚାମ୍ପିୟନ ଅଷ୍ଟ୍ରେଲିଆ ବିପକ୍ଷ ମୁକାବିଲା ତାଙ୍କ କ୍ୟାରିୟରର ୧୦୭ତମ ଓ ଅନ୍ତିମ ଦିନିକିଆ ମ୍ୟାଚ୍ ହେବ। ପାକିସ୍ତାନରେ ଜନ୍ମିତ ତାହିର ଦକ୍ଷିଣ ଆଫ୍ରିକୀୟ ନାଗରିକଙ୍କୁ ବିବାହ କରିଥିଲେ। ଅନ୍ତର୍ଜାତୀୟ ସ୍ତରରେ ପଦାର୍ପଣ ଲାଗି ତାଙ୍କୁ ବହୁ ସଂଘର୍ଷ କରିବାକୁ ପଡ଼ିଥିଲା। ସେ ପ୍ରାୟ ୩୨ ବର୍ଷ ବୟସରେ ୨୦୧୧ ଫେବୃୟାରୀରେ ଅନ୍ତର୍ଜାତୀୟ ଦିନିକିଆରେ ପଦାର୍ପଣ କରିଥିଲେ। ଏବେ ୪୦ ବର୍ଷୀୟ ତାହିର ଦିନିକିଆ ଫର୍ମାଟରେ ଏପର୍ଯ୍ୟନ୍ତ ୧୭୨ ଉଇକେଟ ନେଇସାରିଛନ୍ତି। ଦକ୍ଷିଣ ଆଫ୍ରିକା ଦଳ ଚଳିତ ବିଶ୍ୱକପ୍ରେ ଭଲ ପ୍ରଦର୍ଶନ କରିପାରି ନାହିଁ। ଦଳ ୮ ମ୍ୟାଚ୍ରୁ ମାତ୍ର ୨ ବିଜୟ ସହ ସେମିଫାଇନାଲ ଦୌଡ଼ରୁ ବାଦ୍ ପଡ଼ିସାରିଛି। ଦଳଗତ ଭାବେ ଆମେ ବିଜୟ ସହ ଅଭିଯାନ ଶେଷ କରିବାକୁ ଚାହୁଁ। କିନ୍ତୁ ଏହା ମୋ ପାଇଁ ଦୁଃଖର ବିଷୟ। କାରଣ ମୁଁ ଏବେ ୫୦ ଓଭରିଆ ଫର୍ମାଟ ଛାଡ଼ିବାକୁ ଯାଉଛି। ଅନ୍ତର୍ଜାତୀୟ କ୍ରିକେଟ ଖେଳିବା ମୋ ପାଇଁ ସ୍ବପ୍ନ ଥିଲା। ମୋତେ ସାହାଯ୍ୟ ଓ ସମର୍ଥନ କରିଥିବା ପ୍ରତ୍ୟେକଙ୍କ ଲାଗି ମୁଁ କୃତଜ୍ଞ। ମୁଁ ଯେତେ ଲମ୍ବା କ୍ରିକେଟ ଖେଳିପାରିଥାନ୍ତି, ଖେଳିଛି। ଏବେ ଅଲ୍ବିଦା କହିବାକୁ ସମୟ ଆସିଯାଇଛି। ଏହା ମୋ ପାଇଁ ଦୁଃଖର ବିଷୟ ଓ ଏଥିନେଇ ମୁଁ ପ୍ରସ୍ତୁତ। ଦଳ ଓ ମୁଁ ଅନ୍ତିମ ମ୍ୟାଚ୍ରେ ଭଲ ପ୍ରଦର୍ଶନ କରିପାରିବୁ ବୋଲି ଆଶା କରୁଛି।