ଓ୍ବାଶିଂଟନ,୫।୧: ଆମେରିକାର ରକେଟ ମାଡ଼ରେ ଇରାନ ସେନାର କମାଣ୍ଡର ଜେନେରାଲ କାସିମ୍ ସୋଲେମାନୀ ନିହତ ହେବାର ଦିନକ ପରେ ବାଗ୍ଦାଦସ୍ଥିତ ଆମେରିକା ଦୂତାବାସକୁ ଟାର୍ଗେଟ କରାଯାଇଛି। ଏହି ଘଟଣାକୁ ନେଇ ଦୁଇଦେଶ ମଧ୍ୟରେ ଉତ୍ତେଜନା ପ୍ରକାଶ ପାଇଛି। ଏହା ଯୁଦ୍ଧର ରୂପ ନେଇପାରେ ବୋଲି ଅନେକେ ଆଶଙ୍କା କରୁଛନ୍ତି। ତେବେ ଏହା ଯୁଦ୍ଧ ଆରମ୍ଭ କରିବା ପାଇଁ ନୁହେଁ ବରଂ ବନ୍ଦକରିବା ପାଇଁ ବୋଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ କହିଥିଲେ। ଅନ୍ୟ ପକ୍ଷରେ ସେ ଏହି ବିବାଦ ମଧ୍ୟକୁ ଭାରତକୁ ଟାଣିଛନ୍ତି। ନିହତ ସୋଲେମାନୀଙ୍କର ନୂଆଦିଲ୍ଲୀ ଏବଂ ଲଣ୍ଡନରେ ଆତଙ୍କବାଦୀ କାର୍ଯ୍ୟକଳାପ ସହ ସମ୍ପୃକ୍ତି ଥିଲା ବୋଲି ଟ୍ରମ୍ପ୍ କହିଛନ୍ତି। ୨୦୧୨ ଫେବୃୟାରୀ ୧୩ରେ ଦିଲ୍ଲୀରେ ଘଟିଥିବା ବିସ୍ଫୋରଣକୁ ସେ ଇଙ୍ଗିତ କରିଛନ୍ତି। ସୋଲେମାନୀ ହତ୍ୟା ପାଇଁ ଆମେରିକା ନିନ୍ଦିତ ହୋଇଥିବାବେଳେ ଏବେ ଭାରତ ସମେତ ଅନ୍ୟ ଏସୀୟ ରାଷ୍ଟ୍ରଗୁଡ଼ିକରୁ କୂଟନୈତିକ ସମର୍ଥନ ହାସଲ କରିବାକୁ ଟ୍ରମ୍ପ୍ ଏଭଳି ଉଦ୍ୟମ କରୁଥିବା କୁହାଯାଉଛି।
୨୦୧୨ ଫେବୃୟାରୀରେ ନୂଆଦିଲ୍ଲୀସ୍ଥିତ ଇସ୍ରାଏଲୀ ଦୂତାବାସର କୂଟନୀତିଜ୍ଞଙ୍କ ସ୍ତ୍ରୀ ତାଙ୍କ ପିଲାମାନଙ୍କୁ ସ୍କୁଲରୁ ଆଣିବାକୁ ଯାଉଥିବାବେଳେ ତାଙ୍କ କାର ଉପରକୁ ବୋମାମାଡ଼ ହୋଇଥିଲା। ଏହି ବୋମାମାଡ଼ ସହ ସୋଲେମାନୀ ନେତୃତ୍ୱାଧୀନ ଇରାନର ରିଭଲ୍ୟୁଶନାରୀ ଗାର୍ଡସ ସମ୍ପୃକ୍ତ ଥିବା ଦିଲ୍ଲୀ ପୋଲିସ ତଦନ୍ତରୁ ଜାଣିବାକୁ ପାଇଥିଲା। ଏ ସମ୍ପର୍କରେ ନୂଆଦିଲ୍ଲୀ ତେହେରାନକୁ ଚେତାବନୀ ଦେଇଥିଲା। ଇରାନ ବୈଜ୍ଞାନିକଙ୍କ ଉପରେ ଇସ୍ରାଏଲ ଆକ୍ରମଣ କରିଥିବାରୁ ଏହାର ପ୍ରତିଶୋଧ ନେବା ପାଇଁ ସେହି ସମୟରେ ଥାଇଲାଣ୍ଡ ଓ ଜର୍ଜିଆରେ ଥିବା ଇସ୍ରାଏଲ ଦୂତାବାସକୁ ମଧ୍ୟ ଟାର୍ଗେଟ କରି ବୋମାମାଡ଼ ହୋଇଥିଲା।
ସୋଲୋମାନୀ ହତ୍ୟା ଘଟଣାକୁ ବିଭିନ୍ନ ଦେଶ ନିନ୍ଦା କରିଛନ୍ତି। ତେବେ ସୋଲେମାନୀ କେବଳ ଇରାନର କମାଣ୍ଡର ଜେନେରାଲ ନ ଥିଲେ ସେ ଆତଙ୍କବାଦୀ ସଂଗଠନର କମାଣ୍ଡର ଥିଲେ ଏବଂ ଇରାନ ବାହାରେ ଛାୟାଯୁଦ୍ଧ ଚଳାଇଥିଲେ ବୋଲି ଟ୍ରମ୍ପ୍ ଓ ତାଙ୍କ ସହଯୋଗୀମାନେ ଦାବି କରିଛନ୍ତି। ନିରୀହ ଲୋକମାନଙ୍କୁ ହତ୍ୟାକରିବା ସୋଲେମାନୀଙ୍କର ଏକ କୁତ୍ସିତ ମାନସିକତା ଥିଲା। ସେ ଆମେରିକା ସୈନ୍ୟ, ନୌସେନା, ବାୟୁସେନା ଓ କୂଟନୀତିଜ୍ଞମାନଙ୍କୁ ଆକ୍ରମଣ କରିବା ପାଇଁ ଯୋଜନା କରିଥିଲେ। ଏବେ ତାଙ୍କର ଆତଙ୍କବାଦୀ ସାମ୍ରାଜ୍ୟର ଅନ୍ତ ହେଲା ବୋଲି ଟ୍ରମ୍ପ୍ କହିଥିଲେ।