ନୂଆଦିଲ୍ଲୀ, ୧୨ା୫: ବିଶ୍ୱ ସ୍ବାସ୍ଥ୍ୟ ସଙ୍ଗଠନ(ଡବ୍ଲ୍ୟୁଏଚ୍ଓ) ପକ୍ଷରୁ ଭାରତକୁ ପ୍ରଶଂସା କରାଯାଇଛି। ଡବ୍ଲ୍ୟୁଏଚ୍ଓର ମୁଖ୍ୟ ବୈଜ୍ଞାନିକ ସୌମ୍ୟା ସ୍ବାମିନାଥନ୍ ସୋମବାର କହିଛନ୍ତି, ବର୍ତ୍ତମାନ କରୋନା ଭାଇରସ୍ ଯୋଗୁ ଆମେରିକା ଓ ୟୁରୋପୀୟ ଦେଶଗୁଡ଼ିକରେ ସ୍ଥିତି ଜଟିଳ ରହିଛି। ହେଲେ ଭାରତରେ ମୃତ ଓ ଆକ୍ରାନ୍ତଙ୍କ ସଂଖ୍ୟା ଅପେକ୍ଷାକୃତ କମ୍ ରହିଛି। ଏଥିସହ କୋଭିଡ୍-୧୯ ଟିକା ବାହାର କରିବାରେ ଭାରତର ସହଯୋଗ ମହତ୍ତ୍ୱପୂର୍ଣ୍ଣ ଭୂମିକା ଗ୍ରହଣ କରିଛି। କରୋନା ସଂକ୍ରମଣ ନେଇ ସାରା ବିଶ୍ୱ ସତର୍କ ଓ ପ୍ରସ୍ତୁତ ରହିବା ଦରକାର ବୋଲି ସେ କହିଛନ୍ତି। କେବଳ ଟିକା ବିକଶିତ କିମ୍ବା ପରୀକ୍ଷା କଲେ ଚଳିବନି, ଏହାର ସଫଳ ପ୍ରସ୍ତୁତି ଓ ଭୂତାଣୁ ଦୂର ଲାଗି ବିଭିନ୍ନ ପଦକ୍ଷେପ ଗ୍ରହଣ କରିବା ଜରୁରୀ।
ନ୍ୟାଶନାଲ ଟେକ୍ନୋଲୋଜି ଦିବସ ଅବସରରେ ଉଦ୍ବୋଧନ ଦେଇ ସେ କହିଛନ୍ତି, ଭାରତର କରୋନା ସ୍ଥିତିନେଇ ବିଭାଗୀୟ ମନ୍ତ୍ରୀ, କର୍ମକର୍ତ୍ତାଙ୍କୁ ପ୍ରଶଂସା କରିଥିଲେ। ଗୋଷ୍ଠୀ ସଂକ୍ରମଣ ରୋକିବା କ୍ଷେତ୍ରରେ ଭାରତ ସଫଳ ହୋଇଛି। ବିଶ୍ୱରେ ୩୯.୭୬ ଲକ୍ଷ ଲୋକ କରୋନା ସଂକ୍ରମିତ ହୋଇଥିବା ବେଳେ ଭାରତରେ ମାତ୍ର ୬୭ ହଜାର ମାମଲା ଦେଖାଯିବା ଭଲ କଥା। ହେଲେ ସହରାଞ୍ଚଳ ଜନସଂଖ୍ୟା ଘନତ୍ୱ ଯୋଗୁ ସତର୍କ ରହିବାକୁ ସେ ପରାମର୍ଶ ଦେଇଛନ୍ତି। ଦୁର୍ବଳ ସ୍ବାସ୍ଥ୍ୟସେବା, ଦାରିଦ୍ର୍ୟ ପରିସ୍ଥିତିକୁ ବିଗାଡ଼ିପାରେ ବୋଲି ସ୍ବାମିନାଥନ୍ ସତର୍କ କରିଛନ୍ତି।