ନୂଆଦିଲ୍ଲୀ,୧୭-୬: ସଂଯୁକ୍ତ ଆରବ ଏମିରେଟ(ୟୁଏଇ) ହର୍ମୁଜ ଜଳ ସନ୍ଧି କ୍ଷେତ୍ରରେ ଦେଖାଦେଇଥିବା ବାଧା ସତ୍ତ୍ୱେ ଭାରତକୁ ଅଶୋଧିତ ତେଲ ଏବଂ ଏଲ୍ପିଜି ଯୋଗାଣ ଅବ୍ୟାହତ ରଖିବ ବୋଲି ପ୍ରତିଶ୍ରୁତି ଦେଇଛି। ପେଟ୍ରୋଲିୟମ ମନ୍ତ୍ରୀ ଧର୍ମେନ୍ଦ୍ର ପ୍ରଧାନ ସୋମବାର ଟୁଇଟ୍ ଜରିଆରେ ଏ ସମ୍ପର୍କରେ ସୂଚନା ଦେଇଛନ୍ତି। ଗତ ସପ୍ତାହରେ ଦୁଇଟି ତେଲ ଟ୍ୟାଙ୍କର ଉପରେ ଆକ୍ରମଣ ହେବା ପରେ ଗଲ୍ଫ ଅଞ୍ଚଳରେ ଉତ୍ତେଜନା ଦେଖାଦେଇଛି। ଏହାକୁ ନେଇ ସେ ୟୁଏଇ ମନ୍ତ୍ରୀ ତଥା ଆବୁଧାବୀ ନ୍ୟାଶନାଲ ଅଏଲ କମ୍ପାନୀ(ଏଡିଏନ୍ଓସି) ଗ୍ରୁପ୍ ସିଇଓ ସୁଲ୍ତାନ ଅହମ୍ମଦ ଅଲ୍ ଜାବେରଙ୍କ ସହ ସୋମବାର ଟେଲିଫୋନ ଯୋଗେ ଆଲୋଚନା କରିଥିବା ପ୍ରଧାନ ଲେଖିଛନ୍ତି।
ହର୍ମୁଜ ଜଳ ସନ୍ଧିରେ ଉପୁଜିଥିବା ବାଧାର କାରଣ ନେଇ ଉଭୟ ପକ୍ଷ ମଧ୍ୟରେ ଆଲୋଚନା ହୋଇଥିଲା। ଏଥିଯୋଗୁ ତେଲ ଓ ଏଲ୍ପିଜି ଯୋଗାଣରେ ବାଧା ଆସିବା ସମ୍ଭାବନାକୁ ନେଇ ଭାରତ ପକ୍ଷରୁ ଚିନ୍ତାବ୍ୟକ୍ତ କରାଯାଇଥିଲା। ତେବେ ସମସ୍ତ ବାଧା ସତ୍ତ୍ୱେ ଭାରତକୁ ତେଲ ଓ ଏଲ୍ପିଜି ଯୋଗାଣ ଲାଗି ୟୁଏଇ ପ୍ରତିଶ୍ରୁତିବଦ୍ଧ ବୋଲି ଜାବେର ଦୋହରାଇଥିବା ପ୍ରଧାନ କହିଛନ୍ତି। ଏହି ଅବସରରେ ପ୍ରଧାନ ଲେଖିଛନ୍ତି ଯେ, ସେ ସୋମବାର ଓପେକ୍ ମହାସଚିବ ମହମ୍ମଦ ବାରକିଣ୍ଡୋଙ୍କ ସହ ଫୋନ ଯୋଗେ ଆଲୋଚନା କରିଛନ୍ତି। ଭାରତ ଓପେକ୍ର ମହତ୍ତ୍ୱପୂର୍ଣ୍ଣ ଅଂଶୀଦାର ବୋଲି ବାରକିଣ୍ଡୋ ତାଙ୍କୁ କହିଛନ୍ତି। ଉଭୟପକ୍ଷ ମଧ୍ୟରେ ସମ୍ପର୍କକୁ ଅଧିକ ସୁଦୃଢ଼ କରାଯିବା ନେଇ ସେ ଆଗ୍ରହ ପ୍ରକାଶ କରିଛନ୍ତି। ପ୍ରଧାନ କହିଛନ୍ତି ଯେ, ଭାରତ ତେଲର ବାସ୍ତବ ମୂଲ୍ୟ ନେଇ ଓପେକ୍ ସହ ନିରନ୍ତର କାମ କରିବ। ଏହା ଉତ୍ପାଦକ ଏବଂ ଉପଭୋକ୍ତା ଦେଶର ହିତସାଧନ କରିବ। ଖୁବଶୀଘ୍ର ଭାରତ-ଓପେକ୍ ଚତୁର୍ଥ ଉଚ୍ଚସ୍ତରୀୟ ବୈଠକ ଆୟୋଜନ କରାଯିବ ବୋଲି ପ୍ରଧାନ ସୂଚନା ଦେଇଛନ୍ତି।