ଓ୍ବାଶିଂଟନ,୨୪।୪: କୋଭିଡ୍-୧୯ ଯୋଗୁ ଏବେ ସାରା ବିଶ୍ୱରେ ମାନ୍ଦାବସ୍ଥା ସ୍ଥିତି ଉପୁଜିଛି। ଫଳରେ ବିଦେଶରେ ରହୁଥିବା ଭାରତୀୟମାନଙ୍କ ରେମିଟାନ୍ସ (ପ୍ରେରିତ ଅର୍ଥ) ୨୩% କମିବ ବୋଲି ଆଶଙ୍କା କରାଯାଉଛି। ଗତ ବର୍ଷ ବିଦେଶରେ ରହୁଥିବା ଭାରତୀୟମାନେ ଦେଶକୁ ୮୪ ବିଲିୟନ ଡଲାରର ଅର୍ଥ ପଠାଇଥିଲେ। ଚଳିତ ବର୍ଷ ଏହା କମିବା ସହ ୬୪ ବିଲିୟନ ଡଲାରକୁ ଖସିବ ବୋଲି ବିଶ୍ୱ ବ୍ୟାଙ୍କ ପକ୍ଷରୁ ଏକ ରିପୋର୍ଟରେ କୁହାଯାଇଛି। ବିଶ୍ୱ ବ୍ୟାଙ୍କ ପକ୍ଷରୁ ବୁଧବାର ଜାରି କରାଯାଇଥିବା ରିପୋର୍ଟରେ କୁହାଯାଇଛି ଯେ, ସାରା ବିଶ୍ୱର ରେମିଟାନ୍ସ ପ୍ରାୟ ୨୦% ହ୍ରାସ ଘଟିବ। କରୋନା ଜନିତ ଶଟ୍ଡାଉନ ଲାଗି ବଜାର କ୍ଷତିଗ୍ରସ୍ତ ରହିଛି। ପ୍ରବାସୀ ଶ୍ରମିକଙ୍କ ନିଯୁକ୍ତି ଏବଂ ବେତନ ଉପରେ କରୋନା ଗଭୀର ପ୍ରଭାବ ପକାଇଛି। ଅଭିବୃଦ୍ଧିଶୀଳ ଅର୍ଥ ବ୍ୟବସ୍ଥାଗୁଡିକ ଲାଗି ରେମିଟାନ୍ସକୁ ଆୟର ଏକ ପ୍ରମୁଖ ମାଧ୍ୟମ ବୋଲି ବିଚାର କରାଯାଏ। ବିକଶିତ ଅର୍ଥ ବ୍ୟବସ୍ଥାଗୁଡିକ ଏବେ କ୍ଷତିଗ୍ରସ୍ତ ଥିବାରୁ ସେଠାରେ କାମ କରୁଥିବା ଲୋକମାନଙ୍କ ଉପରେ ମଧ୍ୟ ପ୍ରଭାବ ରହିବ। ସ୍ଥିତି ନ ସୁଧୁରିବା ଯାଏ ଲୋକମାନେ ଏ କ୍ଷେତ୍ରରେ ସମସ୍ୟା ସାମ୍ନା କରିବେ ବୋଲି ଓ୍ବାର୍ଲଡ ବ୍ୟାଙ୍କ ଗ୍ରୁପ୍ ସଭାପତି ଡାଭିଡ୍ ମାଲପାସ୍ କହିଛନ୍ତି। ରିପୋର୍ଟ ମୁତାବକ ୟୁରୋପ ଆଣ୍ଡ ସେଣ୍ଟ୍ରାଲ ଏସିଆର ରେମିଟାନ୍ସ ୨୭.୫%, ସାହାରା ଏବଂ ଆଫ୍ରିକା ୨୩.୧%, ଲାଟିନ ଆମେରିକା-କାରିବିଆନ ୧୯.୩%, ପୂର୍ବ ଏସିଆ-ପାସିଫିକ ୧୩%, ପାକିସ୍ତାନକୁ ୨୩% ଖସିବ ବୋଲି କୁହାଯାଇଛି। ନେପାଳ ଏବଂ ଶ୍ରୀଲଙ୍କାରେ ଏହା ୧୪% ଖସିବାକୁ ଥିବା ବେଳେ ବାଂଲାଦେଶରେ ୨୨% ଖସିଯିବ ବୋଲି କୁହାଯାଇଛି।