ନୂଆଦିଲ୍ଲୀ,୮।୩: ଶନିବାର ଆଉ ୩ ଜଣଙ୍କଠାରେ କରୋନା ପଜିଟିଭ୍ ଜଣାପଡିବା ପରେ ଦେଶରେ ରୋଗୀ ସଂଖ୍ୟା ୩୪କୁ ବୃଦ୍ଧି ପାଇଛି। ନୂଆ ୩ କରୋନା ସଂକ୍ରମିତଙ୍କ ମଧ୍ୟରୁ ଦୁଇଜଣଙ୍କ ଘର ଲଦାଖରେ ଓ ଜଣେ ତାମିଲନାଡୁର। ଲଦାଖର ଉକ୍ତ ବ୍ୟକ୍ତି ପୂର୍ବରୁ ଇରାନ ଯାଇଥିଲେ। ସେହିପରି ତାମିଲନାଡୁର ସଂକ୍ରମିତ ବ୍ୟକ୍ତିଜଣକ କିଛିଦିନ ତଳେ ଓମାନ ଯାଇଥିଲେ ବୋଲି ସ୍ବାସ୍ଥ୍ୟ ମନ୍ତ୍ରଣାଳୟ ପକ୍ଷରୁ କୁହାଯାଇଛି। ଭୁଟାନରେ କରୋନା ପଜିଟିଭ୍ ଜଣାପଡ଼ିଥିବା ଦୁଇ ଆମେରିକୀୟଙ୍କ ସଂସ୍ପର୍ଶରେ ଆସିଥିବା ୧୫୦ରୁ ଊର୍ଦ୍ଧ୍ୱ ଭାରତ ଆସିଥିବାବେଳେ ସେମାନଙ୍କୁ ପର୍ଯ୍ୟବେକ୍ଷଣରେ ରଖାଯାଇଛି।
କରୋନା ସଂକ୍ରମଣ ହ୍ରାସ ଲାଗି ସରକାର ଶନିବାର ନାଗରିକମାନଙ୍କ ପାଇଁ ସାନି ଭ୍ରମଣ କଟକଣା ଜାରି କରିଛନ୍ତି। ଚାଇନା, ଇରାନ, କୋରିଆ, ଇଟାଲୀ ଓ ଜାପାନ ନ ଯିବା ପାଇଁ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରଣାଳୟ ପକ୍ଷରୁ ପରାମର୍ଶ ଦିଆଯାଇଛି। ସେହିପରି ଜରୁରୀ କାର୍ଯ୍ୟ ନ ଥିଲେ ଅନ୍ୟ ସଂକ୍ରମିତ ଦେଶକୁ ନ ଯିବା ପାଇଁ କୁହାଯାଇଛି। ଅନ୍ୟପକ୍ଷରେ ଭିଜା କ୍ଷେତ୍ରରେ ମଧ୍ୟ କଟକଣା ଜାରି ହୋଇଛି। ଜାପାନ, ଦକ୍ଷିଣ କୋରିଆ, ଇଟାଲୀ, ଇରାନର ନାଗରିକଙ୍କ ପାଇଁ ମାର୍ଚ୍ଚ ୩ ପୂର୍ବରୁ ଜାରି ଭିଜାକୁ ସ୍ଥଗିତ ରଖାଯାଇଛି। ଉପରୋକ୍ତ ଦେଶରୁ କେହି ଜରୁରୀ କାର୍ଯ୍ୟରେ ଭାରତ ଆସିବାକୁ ଥିଲେ ଭାରତୀୟ ଦୂତାବାସ କିମ୍ବା ବାଣିଜି୍ୟକ ଦୂତାବାସରେ ସାନି ଭିଜା ଆବେଦନ କରିବାକୁ କୁହାଯାଇଛି।
ଇରାନର ତେହେରାନରୁ କରୋନା ସନ୍ଦିଗ୍ଧ ଭାରତୀୟଙ୍କ ସ୍ବାବ୍ ନମୁନା ବିମାନ ଯୋଗେ ଅଣାଯାଇଛି। ଶନିବାର ଭୋର ୫ଟା ୩୦ରେ ଉକ୍ତ ବିମାନ ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦରରେ ପହଞ୍ଚତ୍ବା ପରେ ଏଠାରୁ କେତେଜଣ ଇରାନୀ ନାଗରିକଙ୍କୁ ନେଇ ଫେରିଯାଇଛି। ଅଣାଯାଇଥିବା ସ୍ବାବ୍ ନମୁନାକୁ ପୁଣେର ନ୍ୟାଶନାଲ ଇନ୍ଷ୍ଟିଚ୍ୟୁଟ୍ ଅଫ ଭାଇରୋଲୋଜି (ଏନ୍ଆଇଭି)କୁ ପରୀକ୍ଷା ପାଇଁ ପଠାଯିବ। କରୋନା ସଂକ୍ରମିତ ଇରାନରେ ପାଖାପାଖି ୨୦୦୦ ଭାରତୀୟ ରହିଛନ୍ତି। ଏହା ବ୍ୟତୀତ ପାରସ୍ୟ ଉପସାଗରୀୟ ଦେଶରେ ମଧ୍ୟ ସମାନ ସଂଖ୍ୟକ ଭାରତୀୟ ରହିଛନ୍ତି। ସେମାନଙ୍କୁ ଫେରାଇ ଆଣିବା ଲାଗି ଇରାନ କର୍ତ୍ତୃପକ୍ଷଙ୍କ ସହ ସରକାର ଆଲୋଚନା ଚଳାଇଛନ୍ତି। ଏବେ ଭାରତରେ ୫୨ଟି ଲାବରେଟୋରୀରେ ନମୁନା ପରୀକ୍ଷା କରାଯାଉଥିବାବେଳେ ୫୭ ଲାବ୍କୁ ନମୁନା ସଂଗ୍ରହରେ ନିୟୋଜିତ କରାଯାଇଛି। ୬ ତାରିଖ ସୁଦ୍ଧା ମୋଟ ୪୦୫୮ ନମୁନା ପରୀକ୍ଷା କରାଯାଇଛି। ଇଟାଲୀୟ ଦମ୍ପତିଙ୍କୁ ବାଦ୍ ଦେଲେ ରାଜସ୍ଥାନରୁ ସଂଗୃହୀତ ସବୁ ନମୁନା କରୋନା ନେଗେଟିଭ୍ ଥିବା ପରୀକ୍ଷାରୁ ଜଣାପଡିଛି।