ନୂଆଦିଲ୍ଲୀ,୨୬-୭: ପେମେଣ୍ଟ ସର୍ଭିସ ପ୍ରଦାନ କ୍ଷେତ୍ରରେ ବଜାରରେ ନିଜର ବ୍ୟବସାୟ କରୁଥିବା ପେଟିଏମ୍, ଗୁଗଲ ପେ, ଭୀମ ଆପ୍, ଫୋନ୍ପେ ଭଳି କମ୍ପାନୀଙ୍କୁ ଟକ୍କର ଦେବା ଲାଗି ଚଳିତ ବର୍ଷ ଭାରତରେ ହ୍ବାଟ୍ସଆପ୍ ନିଜର ପେମେଣ୍ଟ ସର୍ଭିସ ଆରମ୍ଭ କରିବାକୁ ଯାଉଛି। ଭାରତ ଗସ୍ତରେ ଆସିବା ଅବସରରେ ଏକ କାର୍ଯ୍ୟକ୍ରମରେ ଯୋଗ ଦେଇ କମ୍ପାନୀର ଗ୍ଲୋବାଲ ଭାଇସ ପ୍ରେସିଡେଣ୍ଟ ଓ୍ବିଲ୍ କ୍ୟାଥକାର୍ଟ ଏ ସମ୍ପର୍କରେ ଘୋଷଣା କରିଛନ୍ତି। ଏହି ମେସେଜିଂ ଆପ୍ ଗତ ଏକ ବର୍ଷ ହେବ ନିଜର ୧୦ ଲକ୍ଷ ୟୁଜରଙ୍କୁ ସାଥିରେ ନେଇ ପେମେଣ୍ଟ ସର୍ଭିସକୁ ପରୀକ୍ଷାମୂଳକ ଭାବେ ଚଳାଇଛି। ଭାରତରେ ହ୍ବାଟ୍ସଆପ୍ର ପ୍ରାୟ ୪୦ କୋଟି ଓ ସାରା ଦୁନିଆରେ ୧୫୦ କୋଟି ୟୁଜର ରହିଛନ୍ତି। କମ୍ପାନୀ ଭାରତ ବ୍ୟତୀତ ଅନ୍ୟ ଦେଶରେ ମଧ୍ୟ ପେମେଣ୍ଟ ସେବା ଆରମ୍ଭ କରିବାକୁ ଚାହୁଁଛି। ତେବେ ଭାରତରେ ପେମେଣ୍ଟ ସର୍ଭିସ ଆରମ୍ଭ କରିବା ଲାଗି ହ୍ବାଟ୍ସଆପ୍କୁ ଅଥେଣ୍ଟିକେଶନ ଏବଂ ଡାଟା ଷ୍ଟୋରେଜ ଭଳି ସମସ୍ୟାର ସମ୍ମୁଖୀନ ହେବାକୁ ପଡିବ। ଅନ୍ୟପକ୍ଷରେ ପୂର୍ବରୁ ପ୍ରତିଯୋଗିତାରେ ଥିବା ଅନ୍ୟ କମ୍ପାନୀଗୁଡ଼ିକ ପକ୍ଷରୁ ଅଭିଯୋଗ କରାଯାଇଛି ଯେ, ହ୍ବାଟ୍ସଆପ୍ର ପେମେଣ୍ଟ ପ୍ଲାଟଫର୍ମ ଉପଭୋକ୍ତାଙ୍କ ଲାଗି ବିପଦପୂର୍ଣ୍ଣ ହେବ। ଏହା ନିର୍ଦ୍ଧାରିତ ନିୟମ ଅନୁଯାୟୀ ଆରମ୍ଭ ହେବ ନାହିଁ। ସୂଚନାଥାଉ କି, ଆର୍ବିଆଇର ନିୟମ ଅନୁଯାୟୀ ଏହା ପେମେଣ୍ଟ ସମ୍ପର୍କିତ ଡାଟାକୁ ଭାରତରେ ରଖିବା ନେଇ ବ୍ୟବସ୍ଥା କରିସାରିଛି ବୋଲି ହ୍ବାଟ୍ସଆପ୍ ପକ୍ଷରୁ ଗତବର୍ଷ କୁହାଯାଇଛି। ଚଳିତ ବର୍ଷ ମେ’ରେ କମ୍ପାନୀ ପକ୍ଷରୁ ସୁପ୍ରିମକୋର୍ଟରେ କୁହାଯାଇଛି ଯେ, ଜୁଲାଇ ସୁଦ୍ଧା କମ୍ପାନୀର ପରୀକ୍ଷାମୂଳକ ପେମେଣ୍ଟ ସର୍ଭିସ୍ ବ୍ୟବସ୍ଥା ଶେଷ ହୋଇଯିବାର ଆଶାକରାଯାଉଛି। ତେବେ ଏହା ଆର୍ବିଆଇ ନିୟମ ପାଳନ ସମ୍ପୂର୍ଣ୍ଣ ନ ହେବା ଯାଏ ଭାରତରେ ପେମେଣ୍ଟ ସର୍ଭିସ ସିଷ୍ଟମ ଆରମ୍ଭ କରିବ ନାହିଁ ବୋଲି ହ୍ବାଟ୍ସଆପ୍ କହିଛି।
