କୋଚି,୧।୩: ଭାରତରେ କରୋନା ଭାଇରସ ସଂକ୍ରମିତଙ୍କ ଚିହ୍ନଟ ବହୁ ପୂର୍ବରୁ କରାଯାଇଛି। ହେଲେ ଶୁକ୍ରବାର ବିଳମ୍ବିତ ରାତିରେ ଜଣେ ୩୬ ବର୍ଷ ଯୁବକଙ୍କ ଏର୍ନାକୁଲମ ସରକାରୀ ମେଡିକାଲ କଲେଜରେ ମୃତ୍ୟୁ ହେବା ପରେ ଏହା ଭାରତର କରୋନା ଭାଇରସ ସଂକ୍ରମିତ ପ୍ରଥମ ମୃତ୍ୟୁ ବୋଲି ଅନୁମାନ କରାଯାଉଛି। ଯୁବକ ଜଣଙ୍କ କିଛିଦିନ ତଳେ ମାଲେସିଆରୁ ଫେରିଥିବା ବେଳେ ତାଙ୍କ ନିକଟରେ କରୋନା ଭାଇରସର ଲକ୍ଷର ଦେଖାଯାଇଥିଲା। ହେଲେ ପରୀକ୍ଷା ପରେ ତାଙ୍କର ପ୍ରଥମ ରିପୋର୍ଟ ନେଗେଟିଭ ଆସିଥିଲା। ଏବେ ତାଙ୍କର ମୃତ୍ୟୁ କରୋନା ଭାଇରସ ପାଇଁ ହୋଇଛି କି ଅନ୍ୟ କିଛି କାରଣ ଅଛି ସେ ନେଇ ଡାକ୍ତର ପରୀକ୍ଷା ନିରିକ୍ଷା ଆରମ୍ଭ କରିଛନ୍ତି। ଅଲାପୁଜାର ନ୍ୟାଶନାଲ ଇନଷ୍ଟିଚ୍ୟୁଟ ଅଫ୍ ଭିରୋଲୋଜି(ଏନ୍ଆଇଭି)ର ପ୍ରଥମ ରିପୋର୍ଟ ଅନୁଯାୟୀ, ଯୁବକଙ୍କ ନିକଟରେ କରୋନା ଭାଇରସ ନ ଥିଲା। ତେଣୁ ବିଶ୍ୱ ସ୍ବାସ୍ଥ୍ୟ ସଙ୍ଗଠନର ପ୍ରୋଟୋକଲ ଅନୁସାରେ କରୋନା ଭାଇରସ ସମ୍ପର୍କିତ କୌଣସି ନିଷ୍ପତ୍ତି ଦ୍ୱିତୀୟ ରିପୋର୍ଟ ପରେ ହିଁ ନିଆଯାଇ ପରିବ। ତେଣୁ ଯୁବକଙ୍କ ମୃତ୍ୟୁ ଶୁକ୍ରବାର ବିଳମ୍ବିତ ରାତିରେ ହୋଇଥିବା ବେଳେ ଏପର୍ଯ୍ୟନ୍ତ ତାଙ୍କ ମୃତଦେହକୁ ସଂରକ୍ଷିତ କରି ରଖାଯାଇଛି। ଏହାସହ ଦ୍ୱିତୀୟ ରିପୋର୍ଟ ପାଇଁ କିଛି ସାମ୍ପଲ ଏନ୍ଆଇଭି ପଠାଯାଇଥିବା ସୂଚନା ରହିଛି।