କୁଆଲାଲମ୍ପୁର, ୫।୬-୨୦୨୨ ଏଏଫସି ମହିଳା ଏସିଆନ କପ୍ ଭାରତରେ ଅନୁଷ୍ଠିତ ହେବ। ଏହି ସମ୍ମାନଜନକ ପ୍ରତିଯୋଗିତା ଆୟୋଜନ ପାଇଁ ଭାରତକୁ ଅଧିକାର ମିଳିଛି। ଏହା ୨୦୨୨ ଡିସେମ୍ବରରେ ଆରମ୍ଭ ହୋଇ ୨୦୨୩ ଜାନୁୟାରୀରେ ଶେଷ ହେବା ସମ୍ଭାବନା ରହିଛି। ଏହି ମର୍କ୍ୱି ଇଭେଣ୍ଟ ଆୟୋଜନ ପାଇଁ ସମ୍ଭାବ୍ୟ ଭେନ୍ୟୁ ତାଲିକାରେ ନଭି ମୁମ୍ବାଇ ଓ ଅହମ୍ମଦାବାଦ ନାମ ରହିଛି। ଗତ ଫେବୃୟାରୀରେ ଏଏଫସି ମହିଳା ଫୁଟବଲ କମିଟି ଭାରତକୁ ଆୟୋଜକଭାବେ ବାଛିଥିଲା। ଗୁରୁବାର ଆନୁଷ୍ଠାନିକଭାବେ ଏହା ଅନୁମୋଦିତ ହୋଇଛି। ଆୟୋଜକ ଦେଶଭାବେ ଭାରତ ଏହି ପ୍ରତିଯୋଗିତା ପାଇଁ ଯୋଗ୍ୟତା ଅର୍ଜନ କରିବ। ଭାରତ ସହିତ ଚାଇନିଜ୍ ତାଇପେ ଓ ଉଜବେକିସ୍ତାନ ଏହି ପ୍ରତିଯୋଗିତା ଆୟୋଜନ ଦୌଡ଼ରେ ଥିଲେ। ମାତ୍ର ଶେଷରେ ଭାରତ ଏଥିରେ ବିଜୟଲାଭ କରିଥିଲା।