ନୂଆଦିଲ୍ଲୀ,୧୦-୮: ଆମ ଦେଶରେ ଏଲୋପାଥି ମେଡିସିନ୍ ପ୍ରାକ୍ଟିସ୍ କରୁଥିବା ଅଧିକାଂଶ ଡାକ୍ତର କ୍ୱାକ୍(ନକଲି) କି ବୋଲି ପ୍ରଶ୍ନ ଉଠିଛି। ବିଶ୍ୱ ସ୍ବାସ୍ଥ୍ୟ ସଂଗଠନ(ଡବ୍ଲ୍ୟୁଏଚ୍ଓ) ରିପୋର୍ଟରେ ଏହା ଦର୍ଶାଯାଇଛି। ଚକିତ କଲା ଭଳି ଏହି ନିରାଟ ସତ୍ୟକୁ କେନ୍ଦ୍ର ସରକାର ପ୍ରଥମେ ଅସ୍ବୀକାର କରିବା ପରେ ଏବେ ମାନି ନେଇଛନ୍ତି।
ଡବ୍ଲ୍ୟୁଏଚ୍ଓ ପକ୍ଷରୁ ୨୦୧୬ରେ ଭାରତରେ ସ୍ବାସ୍ଥ୍ୟକର୍ମୀଙ୍କ ଉପରେ ଏକ ରିପୋର୍ଟ ପ୍ରସ୍ତୁତ କରାଯାଇଥିଲା। ଏଥିରେ କୁହାଯାଇଥିଲା ଯେ, ଦେଶରେ ଯେତିକି ଏଲୋପାଥିକ ଡାକ୍ତର ପ୍ରାକ୍ଟିସ କରୁଛନ୍ତି, ସେମାନଙ୍କ ମଧ୍ୟରେ ୫୭.୩ ପ୍ରତିଶତଙ୍କ ନିକଟରେ କୌଣସି ମେଡିକାଲ ଡିଗ୍ରୀ ନାହିଁ। ସେତେବେଳେ କେନ୍ଦ୍ର ସରକାର ଏହି ରିପୋର୍ଟକୁ ଖଣ୍ଡନ କରିଥିଲେ। ଜାନୁୟାରୀ ୨୦୧୮ରେ ଲୋକ ସଭାରେ ଏକ ବିବୃତି ପ୍ରଦାନ କରି କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଜେ.ପି.ନଡ୍ଡା ଏହି ରିପୋର୍ଟକୁ ଫାଲ୍ତୁ ବୋଲି ଦର୍ଶାଇଥିଲେ। କିନ୍ତୁ ଏବେ ସେହି ସ୍ବାସ୍ଥ୍ୟ ମନ୍ତ୍ରଣାଳୟ ଡବ୍ଲ୍ୟୁଏଚ୍ଓର ଉକ୍ତ ରିପୋର୍ଟକୁ ଔପଚାରିକ ଭାବେ ଠିକ୍ ବୋଲି ଦର୍ଶାଇଛି।
ନିକଟରେ ଅନୁମୋଦନ ଲାଭ କରିଥିବା ନ୍ୟାଶନାଲ ମେଡିକାଲ କମିଶନ(ଏନ୍ଏମ୍ସି) ଆଇନ ଅଧୀନରେ ଗୋଷ୍ଠୀ ସ୍ବାସ୍ଥ୍ୟ ପେସାଦାର(ସିଏଚ୍ପି)ଙ୍କୁ ଡାକ୍ତର ଭାବେ ପ୍ରାକ୍ଟିସ କରିବାକୁ ଅନୁମତି ଦେବା ଲାଗି ସରକାର ଡବ୍ଲ୍ୟୁଏଚ୍ଓର ସେହି ପୁରୁଣା ରିପୋର୍ଟର ସହାୟତା ନେଇଛନ୍ତି। ଏହି ଆଇନ ସମ୍ପର୍କରେ ଅଗଷ୍ଟ ୬ରେ ଜାରି କରାଯାଇଥିବା ଏକ ଏଫ୍ଏକ୍ୟୁରେ କୁହାଯାଇଛି ଯେ, ବର୍ତ୍ତମାନ ଏଲୋପାଥିକ ମେଡିସିନରେ ପ୍ରାକ୍ଟିସ କରୁଥିବା ୫୭.୩% ଲୋକଙ୍କ ନିକଟରେ ମେଡିକାଲ ଡିଗ୍ରୀ ନାହିଁ। ୨୦୦୧ ଜନଗଣନା ଆଧାରରେ ଡବ୍ଲ୍ୟୁଏଚ୍ଓ ପକ୍ଷରୁ ପ୍ରସ୍ତୁତ ରିପୋର୍ଟ ଅନୁଯାୟୀ, ଭାରତର ଗ୍ରାମାଞ୍ଚଳରେ ପ୍ରାକ୍ଟିସ କରୁଥିବା ମାତ୍ର ୨୦ ପ୍ରତିଶତ ଡାକ୍ତରଙ୍କ ନିକଟରେ ମେଡିକାଲ ଡିଗ୍ରୀ ରହିଛି। ଏଥିରେ ଏହା ମଧ୍ୟ ଦର୍ଶାଯାଇଛି ଯେ, ପ୍ରାକ୍ଟିସ କରୁଥିବା କ୍ୱାକ୍ଙ୍କ ମଧ୍ୟରୁ ୩୧ ପ୍ରତିଶତ ଏଭଳି ଅଛନ୍ତି ଯେଉଁମାନେ କେବଳ ଦ୍ୱାଦଶ ଶ୍ରେଣୀ ପର୍ଯ୍ୟନ୍ତ ପାଠ ପଢ଼ିଛନ୍ତି। ସ୍ବାସ୍ଥ୍ୟ ମନ୍ତ୍ରଣାଳୟ ଦ୍ୱାରା ଜାରି ଏଫ୍ଏକ୍ୟୁରେ କୁହାଯାଇଛି ଯେ, ଭାରତରେ ଅଧିକାଂଶ ଗ୍ରାମୀଣ ଜନତାଙ୍କୁ ଭଲ ସ୍ବାସ୍ଥ୍ୟସେବା ମିଳୁନାହିଁ। ଏହି କାରଣରୁ ସେମାନେ ନକଲି ଡାକ୍ତର ବା କ୍ୱାକ୍ଙ୍କ ଜାଲ୍ରେ ପଡିଯାଉଛନ୍ତି।
ଏହି ଏଫ୍ଏକ୍ୟୁରେ ୨୦୧୬ରେ ଡବ୍ଲ୍ୟୁଏଚ୍ଓ ଦ୍ୱାରା ଜାରି ରିପୋର୍ଟ ସମ୍ପର୍କରେ ଉଲ୍ଲେଖ କରାଯାଇଛି, ଯାହାକୁ ଦେଢ଼ ବର୍ଷ ପୂର୍ବେ ସ୍ବାସ୍ଥ୍ୟ ମନ୍ତ୍ରଣାଳୟ ମାନିବାକୁ ରାଜି ନ ଥିଲେ। ୨୦୧୮ ଜାନୁୟାରୀ ୫ରେ ଲୋକ ସଭାରେ ଏକ ପ୍ରଶ୍ନର ଲିଖିତ ଜବାବରେ ତତ୍କାଳୀନ ସ୍ବାସ୍ଥ୍ୟମନ୍ତ୍ରୀ ନଡ୍ଡା କହିଥିଲେ ଯେ, ଡବ୍ଲ୍ୟୁଏଚ୍ଓର ରିପୋର୍ଟ ଭ୍ରମ ସୃଷ୍ଟି କରୁଛି। ମେଡିକାଲ ପ୍ରାକ୍ଟିସ କରିବା ଲାଗି ପଞ୍ଜୀକରଣ ଆବଶ୍ୟକ ହୋଇଥାଏ, ଯାହା ଏମ୍ବିବିଏସ୍ ଡିଗ୍ରୀ ବିନା ସମ୍ଭବ ନୁହେଁ। ସେ ଏହା ମଧ୍ୟ କହିଥିଲେ ଯେ, ଏଭଳି ନକଲି ଡାକ୍ତର ବା କ୍ୱାକ୍ଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାର ପ୍ରଥମ ଦାୟିତ୍ୱ ରାଜ୍ୟ ସରକାରଗୁଡ଼ିକଙ୍କ ହାତରେ ରହିଛି। ଏହା କହି ସେ କେନ୍ଦ୍ର ସରକାରଙ୍କ ମୁଣ୍ଡରୁ ଦାୟିତ୍ୱ ଖସାଇ ଦେଇଥିଲେ। ଏଫ୍ଏକ୍ୟୁରେ ଦର୍ଶାଯାଇଛି ଯେ, ସହର ଓ ଗ୍ରାମାଞ୍ଚଳରେ ଡାକ୍ତରଙ୍କ ଉପସ୍ଥିତି ସଂଖ୍ୟାରେ ଅନେକ ତାରତମ୍ୟ ରହିଛି। ବର୍ତ୍ତମାନ ଏହି ଅନୁପାତ ୩.୮:୧ ରେ ପହଞ୍ଚତ୍ଛି।