ନୂଆଦିଲ୍ଲୀ,୧୯-୭: ଏସିଆନ ଡେଭଲପ୍ମେଣ୍ଟ ବ୍ୟାଙ୍କ(ଏଡିବି) ଚଳିତ ଆର୍ଥିକ ବର୍ଷ ଲାଗି ଭାରତର ମୋଟ ଘରୋଇ ଉତ୍ପାଦ(ଜିଡ଼ିପି) ଅଭିବୃଦ୍ଧି ହାର ଅନୁମାନକୁ ୭.୨ରୁ ୭%କୁ ହ୍ରାସ କରିଛି। ଗୁରୁବାର ଏଡିବି ପକ୍ଷରୁ ଜାରି ରିପୋର୍ଟରେ କୁହାଯାଇଛି ଯେ, ବିକଶିତ ଦେଶଗୁଡ଼ିକର ଆର୍ଥିକ ଅଭିବୃଦ୍ଧି ହ୍ରାସ ପାଇବା କାରଣରୁ ଭାରତର ଜିଡିପି ଅନୁମାନ କମାଯାଉଛି। ଏହାସତ୍ତ୍ୱେ ଭାରତ ବିଶ୍ୱର ସର୍ବାଧିକ ଦ୍ରୁତ ଅଭିବୃଦ୍ଧିଶୀଳ ଅର୍ଥନୀତି ଭାବେ ଆଗେଇ ଯିବ ବୋଲି ଏଡିବି କହିଛି। ଅର୍ଥନୀତି ଅଭିବୃଦ୍ଧି କ୍ଷେତ୍ରରେ ଏହା ଚାଇନାଠାରୁ ଆଗରେ ରହିବ। ଏଡିବି ପକ୍ଷରୁ ଏସିଆର ବିକାଶ ପରିଦୃଶ୍ୟ-୨୦୧୯ ରିପୋର୍ଟରେ କୁହାଯାଇଛି ଯେ, ଆମେରିକା ସହ ଚାଲିଥିବା ବାଣିଜ୍ୟ ଯୁଦ୍ଧ କାରଣରୁ ୨୦୧୯ରେ ଚାଇନାର ଆର୍ଥିକ ଅଭିବୃଦ୍ଧି ହାର ୬.୩% ଏବଂ ୨୦୨୦ରେ ୬.୧% ରହିବ ବୋଲି ଅନୁମାନ କରାଯାଉଛି। ଅନ୍ୟପକ୍ଷରେ ୨୦୨୦-୨୧ରେ ଭାରତର ଜିଡିପି ଅଭିବୃଦ୍ଧି ହାର ୭.୨% ରହିବ ବୋଲି ଏଡିବି ଅନୁମାନ କରିଛି। ଏପ୍ରିଲରେ ଏହା ଚଳିତ ଆର୍ଥିକ ବର୍ଷ ଲାଗି ଭାରତର ଜିଡିପି ଅଭିବୃଦ୍ଧି ହାର ୭.୨% ଏବଂ ୨୦୨୦-୨୧ ଲାଗି ୭.୬% ରହିବ ବୋଲି ଅନୁମାନ କରିଥିଲା।