ନୂଆଦିଲ୍ଲୀ, ୨୧ା୮ (ପି.ଟି.): କୋଭିଡ୍-୧୯ ଟେଷ୍ଟରେ ଭାରତର ୨୦୧୭ ଫିଫା ବିଶ୍ୱକପ୍ ଦଳର ଅନ୍ୟତମ ସଦସ୍ୟ ବୋରିସ୍ ସିଂ ଥଙ୍ଗ୍ଜମ୍ଙ୍କର ପଜିଟିଭ୍ ଆସିଛି। କରୋନାରେ ସଂକ୍ରମିତ ହେବାରେ ସେ ଦେଶର ପ୍ରଥମ ସକ୍ରିୟ ଫୁଟବଲ ଖେଳାଳି। ବୋରିସ୍ ହେଉଛନ୍ତି ମଣିପୁରର ଇମ୍ଫାଲ ବାସିନ୍ଦା। ବର୍ତ୍ତମାନ ସେ କ୍ୱାରାଣ୍ଟାଇନ୍ରେ ଅଛନ୍ତି। ୨୦ ବର୍ଷୀୟ ଏହି ଖେଳାଳି ରାଇଟ୍ ବ୍ୟାକ୍ ପୋଜିଶନରେ ଖେଳିଥାନ୍ତି। ୨୦୧୭ରେ ଭାରତ ୧୭ବର୍ଷରୁ କମ୍ ଫିଫା ବିଶ୍ୱକପ୍ ଆୟୋଜନ କରିଥିଲା। ଏଥିରେ ଭାରତର ଖେଳିଥିବା ୩ଟି ମ୍ୟାଚ ମଧ୍ୟରୁ ସେ ଦୁଇଟିରେ ଖେଳିଥିଲେ। ବୋରିସ ବର୍ତ୍ତମାନ ଇଣ୍ଡିଆନ ସୁପର ଲିଗ୍(ଆଇଏସ୍ଏଲ) ଦଳ ଏଟିକେ ମୋହନବାଗନର ସଦସ୍ୟ। ଅଲ୍ ଇଣ୍ଡିଆ ଫୁଟ୍ବଲ ଫେଡେରେଶନର ଡେଭଲପ୍ମେଣ୍ଟାଲ ଦଳ ଇଣ୍ଡିଆନ ଏରୋଜ୍ ସହିତ ୨ବର୍ଷ ଅତିବାହିତ କରିବା ପରେ ୨୦୧୮ରେ ଏଟିକେ ସହିତ ଚୁକ୍ତି କରିଥିଲେ। ୨୦୧୮ରେ ସ୍ପେନ୍ରେ ଅନୁଷ୍ଠିତ କୋଟିଫ୍ ଟୁର୍ନାମେଣ୍ଟରେ ଆର୍ଜେଣ୍ଟିନା ବିପକ୍ଷ ୨-୧ଗୋଲ ବିଜୟ ମ୍ୟାଚରେ ସେ ଭାରତର ୨୦ବର୍ଷରୁ କମ୍ ଦଳର ଅନ୍ୟତମ ସଦସ୍ୟ ଥିଲେ।