କୋଲକାତା, ୯ା୮ (ପି.ଟି.)-ବିଶ୍ୱ ଆର୍ଚେରି (ଡବ୍ଲ୍ୟୁଆଇ) ଗୁରୁବାର ଭାରତୀୟ ଆର୍ଚେରି ଆସୋସିଏଶନ (ଏଏଆଇ)କୁ ସସ୍ପେଣ୍ଡ କରିଛି। ଏଏଆଇରେ ଦୁଇ ପରସ୍ପର ବିରୋଧୀ ଗୋଷ୍ଠୀ ସମାନ୍ତରାଳ ନିର୍ବାଚନ କରିବା ଦ୍ୱାରା ବିଶ୍ୱ ଆର୍ଚେରିର ଗାଇଡ୍ଲାଇନ୍ ଭଙ୍ଗହୋଇଛି। ନିଷ୍ପତ୍ତି ସୋମବାରଠାରୁ କାର୍ଯ୍ୟକାରୀ ହେବ। କିନ୍ତୁ ଭାରତୀୟ ତୀରନ୍ଦାଜମାନଙ୍କୁ ଅଗଷ୍ଟ ୧୯ରୁ ୨୫ ତାରିଖ ପର୍ଯ୍ୟନ୍ତ ମାଡ୍ରିଡଠାରେ ହେବାକୁଥିବା ଓ୍ବାଲର୍ଡ ଆର୍ଚେରି ୟୁଥ୍ ଚାମ୍ପିୟନଶିପ୍ରେ ଅଂଶଗ୍ରହଣ ପାଇଁ ଅନୁମତି ଦିଆଯାଇଛି। ଓ୍ବାଲର୍ଡ ଆର୍ଚେରି ସାଧାରଣ ସମ୍ପାଦକ ଟମ୍ ଡିଲେନ୍ କହିଛନ୍ତି, ଭାରତୀୟ ଆର୍ଚେରୀ ଆସୋସିଏଶନକୁ ସସ୍ପେଣ୍ଡ କରିବା ଲାଗି ଜୁନ୍ରେ ସ୍ଥିର କରାଯାଇଥିଲା କିନ୍ତୁ କାର୍ଯ୍ୟକାରୀ କରାଯାଇ ନ ଥିଲା। ଜୁଲାଇ ଶେଷ ସୁଦ୍ଧା ବିବାଦର ସମାଧାନ ପାଇଁ କୁହାଯାଇଥିଲା ମାତ୍ର ମାମଲା କୋର୍ଟରେ ବିଚାରାଧୀନ ଥିବାରୁ ଏଏଆଇ ଅଧିକ ଦିନ ସମୟ ଲୋଡିଥିଲା। ମାତ୍ର ତାହା ପ୍ରତ୍ୟାଖ୍ୟାତ ହୋଇଥିଲା। କୌତୂହଳର କଥା ଏହିକିଯେ, କୋର୍ଟ ମାମଲାର ଶୁଣାଣି କରିବାକୁ ଥିବା ବେଳେ ଏହାର ଦିନକ ପୂର୍ବରୁ ଡବ୍ଲ୍ୟୁଆଇ ସସ୍ପେଣ୍ଡ କରିଛି। ସୂଚନାଯୋଗ୍ୟ, ନଭେମ୍ବରରେ ବ୍ୟାଙ୍କକ୍ଠାରେ ଏସିଆନ ଚାମ୍ପିୟନଶିପ୍ ଏବଂ ଏସିଆନ ପାରା ଚାମ୍ପିୟନଶିପ ହେବ। ଏଥିରେ ଅଲିମ୍ପିକ କୋଟାର ବ୍ୟବସ୍ଥା ରହିଛି। ଭାରତର ଇତିମଧ୍ୟରେ ୩ ଜଣ ପୁରୁଷ ତୀରନ୍ଦାଜ ଆସନ୍ତା ଅଲିମ୍ପିକ ପାଇଁ କୋଟା ହାସଲ କରିସାରିଛନ୍ତି। କିନ୍ତୁ ଏପର୍ଯ୍ୟନ୍ତ ଜଣେ ମହିଳା କୋଟା ହାସଲ କରିପାରି ନାହାନ୍ତି। ଅନ୍ୟପକ୍ଷରେ ଇନ୍ଡୋର ଆର୍ଚେରି ଓ୍ବାଲର୍ଢ ସିରିଜରେ ବ୍ୟକ୍ତିଗତ ଆଥଲେଟ୍ମାନେ ଅଂଶଗ୍ରହଣ କରିପାରିବେ କି ନା ତାହା ଓ୍ବାଲର୍ଡ ଆର୍ଚେରି ସ୍ଥିର କରିବ। ଇନ୍ଡୋର ଆର୍ଚେରି ଓ୍ବାଲର୍ଡ ସିରିଜ ଅନ୍ତର୍ଗତ ଟୁର୍ନାମେଣ୍ଟଗୁଡ଼ିକ ନଭେମ୍ବରରୁ ଫେବୃୟାରୀ ମଧ୍ୟରେ ହେବ। ଏଥିରେ ଜାତୀୟ ଦଳ ବ୍ୟତୀତ ତୀରନ୍ଦାଜମାନେ ବ୍ୟକ୍ତିଗତ ଭାବେ ଭାଗ ନେଇପାରିବେ। ମାତ୍ର ତୀରନ୍ଦାଜ ଜଣକ ଜାତୀୟ ମହାସଂଘର ଜଣେ ସଦସ୍ୟ ହୋଇଥିବା ଆବଶ୍ୟକ। ସୂଚନାଯୋଗ୍ୟ, ଜୁନ୍ ୯ରେ ଏକ ସଙ୍ଗରେ ନୂଆଦିଲ୍ଲୀ ଏବଂ ଚଣ୍ଡିଗଡ଼ରେ ପୃଥକ୍ ପୃଥକ୍ ନିର୍ବାଚନ ଅନୁଷ୍ଠିତ ହୋଇଥିଲା। ଏଥିରେ କେନ୍ଦ୍ରମନ୍ତ୍ରୀ ଅର୍ଜୁନ ମୁଣ୍ଡା ଏବଂ ଅବସରପ୍ରାପ୍ତ ଆଇଏଏସ୍ ଅଫିସର ବିଭିପି ରାଓ ଏଏଆଇର ସଭାପତି ଭାବେ ଦୁଇ ଜଣ ନିର୍ବାଚିତ ହୋଇଥିଲେ। ମୁଣ୍ଡାଙ୍କ ପଛରେ ୨୦ ରାଜ୍ୟ ଆସୋସିଏଶନର ସମର୍ଥନ ଥିବାବେଳେ ରାଓଙ୍କୁ ଅନ୍ୟ ୧୦ଟି ରାଜ୍ୟ ଆସୋସିଏଶନ ନିର୍ବାଚିତ କରିଛନ୍ତି।