ନୂଆଦିଲ୍ଲୀ, ୨ା୪ (ପି.ଟି.) କୋଭିଡ୍-୧୯ ମହାମାରୀ ଯୋଗୁ ଚଳିତ ବର୍ଷର ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)କୁ ଘୁଞ୍ଚାଇ ଦିଆଯାଇଛି। ତେବେ ଏହି ବ୍ୟୟବହୁଳ ଇଭେଣ୍ଟ କେବେ ହେବ ଅବା ସମ୍ପୂର୍ଣ୍ଣ ବାତିଲ କରିଦିଆଯିବ ତାହା ଏପ୍ରିଲ ୧୪ରେ ସ୍ପଷ୍ଟ ହେବ। ଆଗରୁ ଯଦି ଅବା ଏହି ଟି୨୦ ଟୁର୍ନାମେଣ୍ଟ ଆୟୋଜିତ ହୁଏ ମ୍ୟାଚ ସଂଖ୍ୟା ହ୍ରାସ କରାଯାଇ ଏହାର କଳେବରକୁ ସଂକ୍ଷିପ୍ତ କରାଯିବ। ଏହି ପରିସ୍ଥିତିରେ କେବଳ ଭାରତୀୟ ଖେଳାଳିଙ୍କୁ ନେଇ ଆଇପିଏଲ୍ କରିବା ବୁଦ୍ଧିମାନର କାର୍ଯ୍ୟହେବ ବୋଲି ରାଜସ୍ଥାନ ରୟାଲ୍ସ ଫ୍ରାଞ୍ଚାଇଜ୍ର ସିଇଓ ରଣଜିତ୍ ବର୍ଠାକୁର ମତ ଦେଇଛନ୍ତି। କାରଣ କୋଭିଡ୍-୧୯ ପାଇଁ ବିଦେଶୀଙ୍କ ଆଗମନ ଉପରେ କଟକଣା ଜାରି କରାଯାଇଛି ବୋଲି ସେ କହିଛନ୍ତି। ପୂର୍ବ ନିର୍ଦ୍ଧାରିତ କାର୍ଯ୍ୟସୂଚୀ ଅନୁସାରେ ଆଇପିଏଲ୍ର ୧୩ତମ ସଂସ୍କରଣ ମାର୍ଚ୍ଚ ୨୯ରୁ ଖେଳାଯାଇଥାନ୍ତା। ଦେଶରେ କରୋନା ମହାମାରୀ ବ୍ୟାପିବା ଆଶଙ୍କା ଦେଖି ସରକାର ଲକ୍ଡାଉନ୍ ଘୋଷଣା କରିଛନ୍ତି। ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ଯଦି ବିକଳ୍ପ ରାସ୍ତା ଖୋଜି ବାହାର ନ କରେ ତେବେ ଇଭେଣ୍ଟର ଆୟୋଜନ ଅସମ୍ଭବ ମନେହୁଏ ବୋଲି ବର୍ଠାକୁର କହିଛନ୍ତି। ଆଇପିଏଲ କେବଳ ଭାରତୀୟ ଖେଳାଳିଙ୍କୁ ନେଇ ହେଉ ଏକଥା ଆମେ ପୂର୍ବରୁ କେବେ ଚିନ୍ତା କରି ନ ଥିଲୁ। ବର୍ତ୍ତମାନର ପରିସ୍ଥିତି ଆମକୁ ବାଧ୍ୟ କରୁଛି। ଆଇପିଏଲକୁ ବାତିଲ କରା ନ ଯାଇ କେବଳ ଭାରତୀୟ ଖେଳାଳିଙ୍କ ମଧ୍ୟରେ ସୀମିତ ରଖିଲେ ଭଲ। ମାର୍ଚ୍ଚ ମାସରେ କେନ୍ଦ୍ର ସରକାରଙ୍କ ନିର୍ଦ୍ଦେଶକ୍ରମେ ବିସିସିଆଇ ଆଇପିଏଲ୍କୁ ଏପ୍ରିଲ ୧୫ ପର୍ଯ୍ୟନ୍ତ ସ୍ଥଗିତ ରଖିଛି।
