ଜାକର୍ତ୍ତା, ୧୭ା୭ (ପି.ଟି.)-ଭରତର ଦୁଇ ଡବଲ୍ସ ଯୋଡ଼ି ଏଠାରେ ଚାଲିଥିବା ୧,୨୫୦,୦୦୦ ଆମେରିକୀୟ ଡଲାର ପୁରସ୍କାର ବିଶିଷ୍ଟ ବିଡବ୍ଲ୍ୟୁଏଫ୍ ଓ୍ବାଲର୍ଡ ଟୁର୍ ସୁପର ୧୦୦୦ ଟୁର୍ନାମେଣ୍ଟର ଦ୍ୱିତୀୟ ରାଉଣ୍ଡକୁ ଉନ୍ନୀତ ହୋଇଛନ୍ତି। ପୁରୁଷ ଡବଲ୍ସ ଯୋଡ଼ି ସାତ୍ତ୍ୱିିକ ସାଇରାଜ ରାଙ୍କିରେଡ୍ଡୀ ଏବଂ ଚିରାଗ ଶେଟ୍ଟି ସେମାନଙ୍କ ଓପନିଂ ମ୍ୟାଚରେ ଗୋ ସେଜ୍ ଫି ଏବଂ ନୁର ଇଜୁଦ୍ଦିନଙ୍କୁ ୨୧-୧୯, ୧୮-୨୧, ୨୧-୧୯ରେ ପରାସ୍ତ କରିଛନ୍ତି। ଏହି ମ୍ୟାଚ ୧ ଘଣ୍ଟା ଧରି ଚାଲିଥିଲା। ମାଲେସୀୟ ଯୋଡ଼ିଙ୍କ ବିରୋଧରେ ଏହା ଥିଲା ଚତୁର୍ଥ ବିଜୟ। ଗତ ମେ’ରେ ବ୍ରାଜିଲ ଇଣ୍ଟରନ୍ୟାଶନାଲ ଚ୍ୟାଲେଞ୍ଜ ଜିତିଥିବା ବିଶ୍ୱର ୨୦ ନମ୍ବର ମାନ୍ୟତାପ୍ରାପ୍ତ ଏହି ଭାରତୀୟ ଯୋଡ଼ି ଦ୍ୱିତୀୟ ରାଉଣ୍ଡରେ ଇଣ୍ଡୋନେସିଆର ଟପ୍ ସିଡ୍ ମାର୍କସ ଫର୍ନାଲ୍ଡି ଗିଡୋନ୍ ଓ କେଭିନ ସଞ୍ଜୟା ସୁକାମୁଲ୍ଜୋଙ୍କୁ ଭେଟିବେ। ମିକ୍ସଡ ଡବଲ୍ସ ଯୋଡ଼ି ପ୍ରଣବ ଜେରୀ ଚୋପ୍ରା ଏବଂ ଏନ୍ସିକ୍କି ରେଡ୍ଡୀ ମଧ୍ୟ ସେମାନଙ୍କ ମ୍ୟାଚରେ ବିଜୟ ଲାଭ କରିଛନ୍ତି। ଏହି ଯୋଡ଼ି ନେଦରଲାଣ୍ଡ୍ସର ରବିନ୍ ଟାବେଲିଂ ଏବଂ ସେଲେନା ପିକ୍ଙ୍କୁ ୨୫-୨୩, ୧୬-୨୧, ୨୧-୧୯ ସେଟ୍ରେ ପରାସ୍ତ କରିଛନ୍ତି। ପ୍ରଣବ ଓ ସିକ୍କି ପରବର୍ତ୍ତୀ ରାଉଣ୍ଡରେ ଟପ୍ ସିଡ୍ ଚଇନାର ଝେଙ୍ଗ୍ ସି ଓ୍ବି ଓ ହୁଆଙ୍ଗ୍ ୟା କ୍ୱିୟଙ୍ଗଙ୍କୁ ଭେଟିବେ। ମହିଳା ଡବଲ୍ସରେ ରାଜ୍ୟଗୋଷ୍ଠୀ ବ୍ରୋଞ୍ଜ ବିଜେତା ଅଶ୍ୱିନୀ ପୋନାପ୍ପା ଏବଂ ଏନ. ସିକ୍କି ରେଡ୍ଡୀ ସେମାନଙ୍କ ମ୍ୟାଚ ହାରିଯାଇଛନ୍ତି।