ଦୁବାଇ,୨୮।୨: ମହିଳା ଟି-୨୦ ବିଶ୍ୱକପ ଶେଷ ହୋଇଛି। କେପଟାଉନରେ ଖେଳାଯାଇଥିବା ଫାଇନାଲରେ ଆୟୋଜକ ଦକ୍ଷିଣ ଆଫ୍ରିକାକୁ ୧୯ ରନରେ ପରାସ୍ତ କରି ଅଷ୍ଟ୍ରେଲିଆ ଟାଇଟଲ ଜିତିଥିଲା। ଅଷ୍ଟ୍ରେଲୀୟ ମହିଳା ଦଳ ଷଷ୍ଠ ଥର ପାଇଁ ଟି-୨୦ ବିଶ୍ୱକପ୍ ଟାଇଟଲ ଜିତିଛି। ବର୍ତ୍ତମାନ ବିଶ୍ୱକପ ପରେ ଆଇସିସି ମୋଷ୍ଟ ଭାଲ୍ୟୁଏବଲ୍ ଟିମ୍ ଘୋଷଣା କରିଛି। ଏହି ଟିମ୍ରେ କେବଳ ଜଣେ ଭାରତୀୟ ଖେଳାଳି ସ୍ଥାନ ପାଇଛନ୍ତି।
ସୋମବାର ଭାରତର ଉଇକେଟ କିପର ବ୍ୟାଟ୍ସମ୍ୟାନ ରିଚା ଘୋଷଙ୍କୁ ଆଇସିସିର ମୋଷ୍ଟ ଭାଲ୍ୟୁଏବଲ୍ ଟିମ୍ରେ ସାମିଲ କରାଯାଇଛି। ୧୯ ବର୍ଷୀୟା ରିଚା ଭାରତକୁ ସେମିଫାଇନାଲରେ ପ୍ରବେଶ କରିବାରେ ସାହାଯ୍ୟ କରିଥିଲେ। ରିଚା କେବଳ ସେମିଫାଇନାଲରେ ଆୟର୍ଲାଣ୍ଡ ଏବଂ ଅଷ୍ଟ୍ରେଲିଆ ବିପକ୍ଷରେ କିଛି ବିଶେଷ କରିପାରି ନ ଥିଲେ। ସେ ପାକିସ୍ତାନ ବିପକ୍ଷରେ ଅପରାଜିତ ୩୧, ୱେଷ୍ଟଇଣ୍ଡିଜ ବିପକ୍ଷରେ ୪୪, ଇଂଲଣ୍ଡ ବିପକ୍ଷରେ ୪୭ ସ୍କୋର କରିଥିଲେ। ସେ ମୋଟ ୧୩୬ ରନ ସହ ଟୁର୍ନାମେଣ୍ଟ ଶେଷ କରିଥିଲେ।
ମୋଷ୍ଟ ଭାଲ୍ୟୁଏବଲ୍ ଟିମ୍ରେ ବିଶ୍ୱ ଚାମ୍ପିୟନ ଅଷ୍ଟ୍ରେଲିଆର ୪ ଜଣ ଖେଳାଳିଙ୍କୁ ସାମିଲ କରାଯାଇଛି। ଏଥିମଧ୍ୟରେ ଉଇକେଟ କିପର ବ୍ୟାଟ୍ସମ୍ୟାନ ଆଲିସା ହେଲି, ଆସଲେ ଗାର୍ଡନର୍, ଡାର୍ସି ବ୍ରାଉନ ଏବଂ ମେଗାନ ସ୍କଟ ଅଛନ୍ତି।
ମହିଳା ଟି-୨୦ ବିଶ୍ୱକପ୍ର ମୋଷ୍ଟ ଭାଲ୍ୟୁଏବଲ୍ ଟିମ୍: ତାଜମିନ ବ୍ରିଟ୍ସ (ଦକ୍ଷିଣ ଆଫ୍ରିକା), ଆଲିସା ହେଲି (ଅଷ୍ଟ୍ରେଲିଆ), ଏଲ ୱୋଲୱାର୍ଡ (ଦକ୍ଷିଣ ଆଫ୍ରିକା), ନାଟ ସ୍କିଭର୍-ବ୍ରଣ୍ଟ (ଅଧିନାୟକ) (ଇଂଲଣ୍ଡ), ଆଶଲି ଗାର୍ଡନର୍ (ଅଷ୍ଟ୍ରେଲିଆ), ରିଚା ଘୋଷ ( ଭାରତ)), ସୋଫି ଏକ୍ଲେଷ୍ଟୋନ (ଇଂଲଣ୍ଡ), କରିସ୍ମା ରାମହାରାକ (ୱେଷ୍ଟଇଣ୍ଡିଜ), ଶବନିମ ଇସମାଇଲ (ଦକ୍ଷିଣ ଆଫ୍ରିକା), ଡାର୍ସି ବ୍ରାଉନ (ଅଷ୍ଟ୍ରେଲିଆ), ମେଗାନ ଶଟ (ଅଷ୍ଟ୍ରେଲିଆ), ଅର୍ଲା ପ୍ରେଣ୍ଡେରଗଷ୍ଟ (ଆୟର୍ଲାଣ୍ଡ)।
