ମେଲବୋର୍ନ,୨୫।୪(ପି.ଟି.): କରୋନା ଭାଇରସ ମହାମାରୀ କାରଣରୁ କ୍ରିକେଟ ଅଷ୍ଟ୍ରେଲିଆ (ସିଏ) ଆର୍ଥିକ ସଙ୍କଟ ଦେଇ ଗତି କରୁଛି। ସିଏ ପାଖାପାଖି ୩୦୦ ମିଲିୟନ ଅଷ୍ଟ୍ରେଲୀୟ ଡଲାର କ୍ଷତି ସହିବ। ତେବେ ଏହି ଆର୍ଥିକ ସଙ୍କଟରୁ ରକ୍ଷା ପାଇବା ପାଇଁ ଅଷ୍ଟ୍ରେଲିଆ ସରକାର ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ନେବାକୁ ଯାଉଛନ୍ତି। ଚଳିତ ବର୍ଷ ଶେଷ ଆଡକୁ ଭାରତୀୟ କ୍ରିକେଟ ଦଳ ଅଷ୍ଟ୍ରେଲିଆ ଗସ୍ତରେ ଯିବାର କାର୍ଯ୍ୟକ୍ରମ ରହିଥିବା ବେଳେ ସରକାର ଧାର୍ଯ୍ୟ କରିଥିବା ଯାତ୍ରା କଟକଣାକୁ କୋହଳ କରିପାରନ୍ତି ବୋଲି ରିପୋର୍ଟ ପ୍ରକାଶ ପାଇଛି।
କରୋନା ଭାଇରସ ପାଇଁ ସାରା ବିଶ୍ୱରେ ଏବେ ଲକ୍ଡାଉନ ଜାରି ରହିଛି। ଫଳରେ କ୍ରିକେଟ ଖେଳା ନ ଯିବା କାରଣରୁ ସିଏ ଏବେ ସଂଘର୍ଷ କରୁଥିବା ବେଳେ ତା’ର ୮୦ ପ୍ରତିଶତ କର୍ମଚାରୀଙ୍କୁ ଚାକିରିରୁ ବିଦା କରିଛି। ଆସନ୍ତା ଡିସେମ୍ବର- ଜାନୁୟାରୀରେ ଭାରତ ୪ଟି ଟେଷ୍ଟ ଖେଳିବାକୁ ଅଷ୍ଟ୍ରେଲିଆ ଗସ୍ତ କରିବ। କିନ୍ତୁ ପୂର୍ବରୁ ଅଷ୍ଟ୍ରେଲିଆ ସେପ୍ଟେମ୍ବର ୩୦ ପର୍ଯ୍ୟନ୍ତ ତା’ର ସୀମା ସିଲ୍ କରିଛି। ପୁଣି ଏହାକୁ ଅଷ୍ଟ୍ରେଲିଆ ଆହୁରି ବଢାଇବାର ସମ୍ଭାବନା ରହିଛି। ଫଳରେ ଅଷ୍ଟ୍ରେଲିଆ ଭାରତୀୟ ଦଳ ପାଇଁ ଯାତ୍ରା କଟକଣାକୁ କୋହଳ କରିବାକୁ ବିଚାର କରୁଛି। ଆର୍ଥିକ ସଙ୍କଟରୁ ରକ୍ଷା ପାଇବା ପାଇଁ ଅଷ୍ଟ୍ରେଲିଆ ଏପରି ନିଷ୍ପତ୍ତି ନେଇପାରେ ବୋଲି କୁହାଯାଇଛି। ଏ ସଂକ୍ରାନ୍ତରେ କ୍ରିକେଟ ଅଷ୍ଟ୍ରେଲିଆକୁ ସରକାର ସବୁଜ ସଙ୍କେତ ଦେଇଛନ୍ତି ବୋଲି ରିପୋର୍ଟରେ କୁହାଯାଇଛି। ପୁଣି ଯଦି ଭାରତୀୟ ଗସ୍ତ ବାତିଲ ହୁଏ ତେବେ ସିଏ ଆହୁରି ଭାରି କ୍ଷତି ସହିବ। ଗତ ଅଷ୍ଟ୍ରେଲିଆ ଗସ୍ତରେ ଭାରତ ୨-୧ରେ ସିରିଜ ଜିତି ଇତିହାସ ସୃଷ୍ଟି କରିଥିଲା। ଅଷ୍ଟ୍ରେଲିଆ ମାଟିରେ ପ୍ରଥମ ଏସୀୟ ଦେଶ ଭାବେ ଭାରତ ଟେଷ୍ଟ ସିରିଜ ୍ଜିତି ରେକର୍ଡ କରିଥିଲା।