ସୋରଡ଼ା,୬ା୧(ଡି.ଏନ.ଏ.)-ସ୍ଥାନୀୟ ଋଷିକୁଲ୍ୟା ଉଚ୍ଚ ମାଧ୍ୟମିକ ବିଦ୍ୟାଳୟର ବିଜ୍ଞାନ ଅଧ୍ୟାପକ ରାମଚନ୍ଦ୍ର ବିଷୋୟୀ ୧୦୭ତମ ଭାରତୀୟ ବିଜ୍ଞାନ କଂଗ୍ରେସ କାର୍ଯ୍ୟକ୍ରମରେ ଯୋଗ ଦେଇଛନ୍ତି। ଚଳିତ ମାସ ୩ରୁ ୭ ପର୍ଯ୍ୟନ୍ତ ବାଙ୍ଗାଲୋର କୃଷି ବିଜ୍ଞାନ ବିଶ୍ୱବିଦ୍ୟାଳୟ ପରିସରରେ ଚାଲିଥିବା ବିଜ୍ଞାନ କଂଗ୍ରେସରେ ଭାରତର ବିଭିନ୍ନ ପ୍ରାନ୍ତ ସମେତ ଚିନ୍, ଋଷିଆ, ଜାପାନ, ଆମେରିକା, ଚେକ୍ ରିପବ୍ଲିକ୍, ଜର୍ମାନ, ଅଷ୍ଟ୍ରେଲିଆ ସମେତ ବହୁ ଦେଶର ବୈଜ୍ଞାନିକ, ପଲିସିମେକର, ଆବିସ୍କାରକ, ଏକାଡ଼େମିଆନ, ରିସର୍ଚ୍ଚ ସ୍କଲାରମାନେ ଯୋଗଦେଇ ବିଭିନ୍ନ ବିଷୟର ସନ୍ଦର୍ଭ ଉପସ୍ଥାପନ କରିଛନ୍ତି। ଅଧ୍ୟାପକ ରାମଚନ୍ଦ୍ର ବିଷୋୟୀ ତଥା ସେଞ୍ଚୁରିଆନ ବିଶ୍ୱବିଦ୍ୟାଳୟର ଜୀବ ବିଜ୍ଞାନ ବିଭାଗର ରିସର୍ଚ୍ଚ ସ୍କଲାର ହିସାବରେ ତାଙ୍କର ସନ୍ଦର୍ଭ ବାଲିପଦର ଅଞ୍ଚଳର କୃଷ୍ଣସାର ଉପରେ ଅଧ୍ୟୟନକୁ ଉପସ୍ଥିତ ବିଶ୍ୱସ୍ତରର ଅଂଶଗ୍ରହଣକାରୀମାନଙ୍କ ସମ୍ମୁଖରେ ଶନିବାର ଉପସ୍ଥାପନ କରିଥିଲେ। ତାଙ୍କ ସାଥିରେ ଗାଇଡ଼ ଭାବେ ଋଷିକୁଲ୍ୟା ଉଚ୍ଚ ମାଧ୍ୟମିକ ବିଦ୍ୟାଳୟର ପୂର୍ବତନ ଅଧ୍ୟକ୍ଷ ଡ଼. ଦେବୀ ପ୍ରସାଦ ସାମନ୍ତ ଯୋଗ ଦେଇଛନ୍ତି। ବିଜ୍ଞାନ କାରିଗରି ଓ ଗ୍ରାମ୍ୟ ଉନ୍ନୟନ ଉପରେ ୧୦୭ ବିଜ୍ଞାନ କଂଗ୍ରେସ ଫୋକସ ରଖିଥିବାବେଳେ ଅଞ୍ଚଳର ପ୍ରଥମକରି ଜଣେ ଅଧ୍ୟାପକଙ୍କ ଏଥିରେ ଯୋଗଦାନ କରିବା ସମସ୍ତଙ୍କ ପାଇଁ ଖୁସି ଆଣିଦେଇଛି।
ସୂଚନାଯୋଗ୍ୟ ଯେ, ବିଷୋୟୀଙ୍କ ଅଧ୍ୟୟନ ସନ୍ଦର୍ଭ ସେଞ୍ଚୁରିଆନ ବିଶ୍ୱବିଦ୍ୟାଳୟରେ ଉପସ୍ଥାପନ ପରେ ତାହା ମେଘାଳୟ ଇମ୍ଫାଲସ୍ଥିତ କେନ୍ଦ୍ରୀୟ କୃଷି ବିଶ୍ୱବିଦ୍ୟାଳୟ ଦ୍ୱାରା ଆଦୃତ ହୋଇଥିଲା ଏବଂ ଭାରତୀୟ ବିଜ୍ଞାନ କଂଗ୍ରେସ ତରଫରୁ ଡ଼ାକରାରେ ସେ ଯୋଗ ଦେଇଛନ୍ତି।