ଭୁବନେଶ୍ୱର,୩।୫(ବ୍ୟୁରୋ): କରୋନା ସହ ଲଢ଼େଇରେ ପ୍ରମୁଖ ଭୂମିକା ଗ୍ରହଣ କରିଛନ୍ତି ସ୍ବାସ୍ଥ୍ୟକର୍ମୀ, ପୋଲିସ ଏବଂ ସ୍ବେଚ୍ଛାସେବୀମାନେ। ବିଶେଷକରି ସ୍ବାସ୍ଥ୍ୟକର୍ମୀମାନେ ପ୍ରତ୍ୟକ୍ଷ ଭାବେ ଏହି ଲଢ଼େଇକୁ ସାମ୍ନା କରୁଛନ୍ତି। ଏହାକୁ ନେଇ ସେମାନଙ୍କୁ ‘କରୋନା ଯୋଦ୍ଧା’ ଭାବେ ଅଭିହିତ କରାଯାଇଛି। ଦେଶରେ କରୋନା ଯୋଦ୍ଧାଙ୍କୁ ଭାରତୀୟ ସେନା ପକ୍ଷରୁ ରବିବାର ସମ୍ମାନ ପ୍ରଦର୍ଶନ କରାଯାଉଛି। ଏହାକୁ ନେଇ ପ୍ରଥମେ ଦିଲ୍ଲୀସ୍ଥିତ ରାଷ୍ଟ୍ରୀୟ ପୋଲିସ ସ୍ମାରକୀରେ ପୁଷ୍ପ ବର୍ଷା କରାଯାଇଥିଲା। ୩ ସେନା ମୁଖ୍ୟଙ୍କ ସମେତ ବିଭିନ୍ନ ନେତୃବୃନ୍ଦ ପୁଷ୍ପ ଅର୍ପଣ କରିଥିଲେ। ପରେ ଦେଶର ବିଭିନ୍ନ କୋଭିଡ୍ ହସ୍ପିଟାଲରେ ବାୟୁସେନା ପକ୍ଷରୁ ପୁଷ୍ପବୃଷ୍ଟି କରାଯାଇଛି। ଏହି କ୍ରମରେ ଭୁବନେଶ୍ୱରରେ କୋଭିଡ୍ ହସ୍ପିଟାଲରେ ମଧ୍ୟ ହେଲିକାପ୍ଟରରୁ ପୁଷ୍ପ ବର୍ଷା କରାଯାଇଛି। ଏଥିପାଇଁ ହସ୍ପିଟାଲର ସମସ୍ତ କର୍ମଚାରୀ ବାହାରକୁ ଆସିଥିଲେ। ତେବେ କୋଭିଡ ଯୋଦ୍ଧାଙ୍କୁ ସମ୍ମାନ ଜଣାଇବାକୁ ବିଭିନ୍ନ ସ୍ଥାନରେ ଏଭଳି ସ୍ବତନ୍ତ୍ର ଆୟୋଜନ କରାଯାଇଛି। ଏହାଦ୍ୱାରା ଆଗଧାଡ଼ିରେ ଛିଡ଼ା ହୋଇଥିବା ଯୋଦ୍ଧାଙ୍କ ମନୋବଳ ଦୃଢ଼ ହେବ ବୋଲି କୁହାଯାଉଛି।