କଲମ୍ବୋ, ୧୪ା୫(ପି.ଟି.): ଭାରତ ଓ ବାଂଲାଦେଶ କ୍ରିକେଟ ଦଳ ଚଳିତ ସପ୍ତାହର ପରବର୍ତ୍ତୀ ଭାଗରେ ଶ୍ରୀଲଙ୍କା ଗସ୍ତରେ ଯିବେ କି ନା ତାହା ଚଳିତ ସପ୍ତାହ ଶେଷ ଭାଗରେ ସ୍ପଷ୍ଟ ହେବ। କ୍ରିକେଟ ଶ୍ରୀଲଙ୍କା (ସିଏଲ୍ସି) ପକ୍ଷରୁ ବୁଧବାର ଏହା ପ୍ରକାଶ କରାଯାଇଛି। ଦୁଇ କ୍ରିକେଟ ବୋର୍ଡ (ବିସିସିଆଇ ଓ ବିସିବି) କରୋନାଭାଇରସ୍ ଜନିତ ପରିସ୍ଥିତିର ଅନୁଧ୍ୟାନ ପାଇଁ ମେ ୧୫ ତାରିଖ ପର୍ଯ୍ୟନ୍ତ ସମୟ ନେଇଛନ୍ତି। ଚଳିତ ସପ୍ତାହ ଶେଷ ସୁଦ୍ଧା ଆମେ ମିଳିତ ଭାବେ ଯାହା ନିଷ୍ପତ୍ତି ନେବୁ ବୋଲି ଏସ୍ଏଲସି ମୁଖ୍ୟ କାର୍ଯ୍ୟନିର୍ବାହୀ ଆଶ୍ଲେ ଡି’ ସିଲ୍ଭା ପ୍ରକାଶ କରିଛନ୍ତି। ଭାରତ ଜୁନ୍-ଜୁଲାଇରେ ଶ୍ରୀଲଙ୍କା ଟୁର୍ରେ ଯାଇ ସେଠାରେ ୩ ଅନ୍ତର୍ଜାତୀୟ ଦିନିକିଆ ଏବଂ ସମାନ ସଂଖ୍ୟକ ଟି୨୦ ମ୍ୟାଚ ଖେଳିବାର କାର୍ଯ୍ୟକ୍ରମ ରହିଛି। ସେହିପରି ବାଂଲାଦେଶ ଜୁଲାଇ-ଅଗଷ୍ଟରେ ଶ୍ରୀଲଙ୍କା ଗସ୍ତ କରିବାର କାର୍ଯ୍ୟକ୍ରମ ରହିଛି। ଏହି ଅବସରରେ ଦଳ ଆଇସିସି ଓ୍ବାଲର୍ଡ ଟେଷ୍ଟ ଚାମ୍ପିୟନଶିପ୍ର ଅଂଶବିଶେଷ ସ୍ବରୂପ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବ। ଯଦି ଶ୍ରୀଲଙ୍କା ସିରିଜ କାର୍ଯ୍ୟକାରୀ ନ ହୁଏ ତେବେ କୋଭିଡ୍-୧୯ ମହାମାରୀ କାରଣରୁ ଶ୍ରୀଲଙ୍କାର ତୃତୀୟ ଘରୋଇ ସିରିଜ ବାତିଲ ହେବ। ପୂର୍ବରୁ ଇଂଲଣ୍ଡ ୩ ମ୍ୟାଚ ବିଶିଷ୍ଟ ଟେଷ୍ଟ ସିରିଜ ଖେଳିବା ଲାଗି ଶ୍ରୀଲଙ୍କା ଗସ୍ତରେ ଯାଇଥିଲା। ମାତ୍ର ମହାମାରୀ ଯୋଗୁ ଦ୍ୱିତୀୟ ଓ୍ବାର୍ମଅପ୍ ମ୍ୟାଚ ମଧ୍ୟ ଭାଗରୁ ଟୁର୍କୁ ବାତିଲ କରାଯାଇଥିଲା। କରୋନା ଭାଇରସ ସଂକ୍ରମଣକୁ ରୋକିବା ଲାଗି ଶ୍ରୀଲଙ୍କାରେ ମାର୍ଚ୍ଚ ୨୦ରୁ ଲକ୍ଡାଉନ୍ ଲାଗୁ କରାଯାଇଥିଲା। ଚଳିତ ସପ୍ତାହରେ ଏଥିରେ କୋହଳ କରାଯାଇଛି। ଶ୍ରୀଲଙ୍କାରେ ଏପର୍ଯ୍ୟନ୍ତ ସୁଦ୍ଧା ୮୭୫ କରୋନାଭାଇରସ୍ ଦ୍ୱାରା ସଂକ୍ରମିତ ହୋଇଥିବାବେଳେ ୯ଜଣ ମୃତ୍ୟୁ ବରଣ କରିସାରିଛନ୍ତି।