ସିଡ୍ନୀ,୪।୫ (ପି.ଟି.): କୋଭିଡ-୧୯ ମହାମାରୀ ସାରା ବିଶ୍ୱକୁ କବଳିତ କରିଛି। ତେବେ ମହାମାରୀ କାରଣରୁ ଯଦି ଭାରତ ଆଗାମୀ ଅଷ୍ଟ୍ରେଲିଆ ଗସ୍ତରେ ନ ଆସେ ତା’ହେଲେ ଅଷ୍ଟ୍ରେଲିଆ ପାଇଁ ଏହା ନିହାତି ହାନୀକାରକ ହେବ ବୋଲି ଯୁବ ଅଷ୍ଟ୍ରେଲିଆ ବ୍ୟାଟ୍ସମ୍ୟାନ ମାର୍ନସ ଲାବୁସେନ କହିଛନ୍ତି।
ଅକ୍ଟୋବରରେ ଏକ ଟ୨୦ ତ୍ରିରାଷ୍ଟ୍ରୀୟ ସିରିଜ ଖେଳିବା ସହ ଭାରତ ଅଷ୍ଟ୍ରେଲିଆ ଗସ୍ତ ଆରମ୍ଭ କରିବ। ଏହାପରେ ଏକ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜ ଖେଳି ଆଗାମୀ ଡିସେମ୍ବରରେ ଭାରତ ଗସ୍ତ ଶେଷ କରିବ। ତେବେ କୋଭିଡ୍ ୧୯ ମହମାରୀ କାରଣରୁ ଅଷ୍ଟ୍ରେଲିଆରେ ତା’ର ସୀମା ସିଲ୍ କରିଛି। ପୁଣି ଯଦି କରୋନା ଭାଇରସ ସଂକ୍ରମଣକୁ ନିୟନ୍ତ୍ରଣ କରା ଯାଇ ପାରି ନାହିଁ। ଫଳରେ ଭାରତର ଏହି ହାଇପ୍ରୋଫାଇଲ ଗସ୍ତ ନେଇ ଅନିଶ୍ଚିତତା ସୃଷ୍ଟି ହୋଇଛି।
ଯଦି ଭାରତ ଏହି ଗସ୍ତରେ ନ ଆସେ ତାହାଲେ ଅଷ୍ଟ୍ରେଲିଆ, ଅଷ୍ଟ୍ରେଲିଆ ଦଳ ଓ ମୋ ପାଇଁ ଏହା କ୍ଷତିକାରକ ହେବ ବୋଲି ଲାବୁସେନ୍ ଏକ ଅନ୍ଲାଇନ୍ ଖବରଦାତା ସମ୍ମିଳନୀରେ ଏକ ପ୍ରଶ୍ନର ଉତ୍ତର ଦେଇ ସେ କହିଛନ୍ତି। ଭାରତ ଏହି ଗସ୍ତ ମଝିରେ ଅର୍ଥାତ୍ ଅକ୍ଟୋବର ୧୮ରୁ ଟି୨୦ ବିଶ୍ୱକପ୍ ମଧ୍ୟ ଆରମ୍ଭ ହେବାର କାର୍ଯ୍ୟକ୍ରମ ରହିଛି। ତେବେ ବିଶ୍ୱରେ ଚାଲିଥିବା ଏହି ସ୍ବାସ୍ଥ୍ୟ ସଙ୍କଟ ଟି୨୦ ବିଶ୍ୱକପ୍କୁ ମଧ୍ୟ ଅନିଶ୍ଚିତତା ଭିତରକୁ ଠେଲି ଦେଇଛି।
ଇତିମଧ୍ୟରେ ଅଷ୍ଟ୍ରେଲିଆରେ କୋଭିଡ୍-୧୯ ପଜିଟିଭ୍ ମାମଲାରେ ଆଖିଦୃଶିଆ ଅବନତୀ ପରିଲକ୍ଷିତ ହୋଇଛି। ଅଷ୍ଟ୍ରେଲିଆରେ ଏପର୍ଯ୍ୟନ୍ତ ୬,୮୦୦ ଲୋକ ସଂକ୍ରମିତ ହୋଇଛନ୍ତି ଓ ୧୦୦ଜଣଙ୍କର ପ୍ରାଣହାନୀ ହୋଇଛି। ଅଷ୍ଟ୍ରେଲିଆର ସ୍ବାସ୍ଥ୍ୟ ସେବାକୁ ଲାବୁସେନ୍ ବେଶ୍ ପ୍ରଶଂସା କରିଛନ୍ତି। କରୋନା ଭାଇରସ୍ ନିୟନ୍ତ୍ରଣ କରିବାକୁ ପ୍ରୟାସ ଜାରି ରହିଛି। ଯଦି ଏଥିରେ ସଫଳ ହେବୁ ତାହାଲେ ଆଗାମୀ ୩-୪ କିମ୍ବା ୪-୫ ମାସରେ ଆମେ ଭାରତୀୟ ଦଳକୁ ଅଷ୍ଟ୍ରେଲିଆରେ ଦେଖିବୁ ବୋଲି ଲାବୁସେନ ଆଶା ପ୍ରକାଶ କରି କହିଛନ୍ତି। ତେବେ ଯଦି ଭାରତ ଅଷ୍ଟ୍ରେଲିଆ ଗସ୍ତରେ ଆସିପାରିବନି ତାହେଲେ ନିରାଶ ହେବି ବୋଲି ସେ କହିଛନ୍ତି। ଦେଶରେ ଲକ୍ଡାଉନ୍ ଚାଲିଥିବାରୁ ୨୫ ବର୍ଷୀୟ ଲାବୁସେନ୍ ନିଜ ଦକ୍ଷତା ଓ ପ୍ରତିଭାକୁ ଆହୁରି ଶାଣିତ କରିବାକୁ ପ୍ରୟାସ ଜାରି ରଖିଛନ୍ତି। ବୋଲିଂରେ ମଧ୍ୟ ସୁଧାର ଆଣିବାକୁ ସେ ଚେଷ୍ଟା କରୁଛନ୍ତି।
ଏହି ମହାମାରୀ କାରଣରୁ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦିନିକିଆ ମ୍ୟାଚ୍ ଖେଳାଯିବା ପରେ ପୂରା ସିରିଜ ବାତିଲ ହୋଇଥିଲା। ଏଥିସହିତ ସବୁ ଘରୋଇ ଓ ଅନ୍ତର୍ଜାତୀୟ କ୍ରିକେଟକୁ ମଧ୍ୟ ବାତିଲ କରାଯାଇଥିଲା।