ନୂଆଦିଲ୍ଲୀ,୨୫।୫: ପୂର୍ବତନ ଅଫ୍ ସ୍ପିନର ହରଭଜନ ସିଂ ପୁଣି ଥରେ ଭାରତ ପାଇଁ ଖେଳିବାକୁ ଇଚ୍ଛା ପ୍ରକାଶ କରିଛନ୍ତି। ଭାରତ ପାଇଁ ପୁଣି ଖେଳିବାକୁ ପ୍ରସ୍ତୁତ ଓ ସମ୍ପୂର୍ଣ୍ଣ ଭାବେ ଫିଟ୍ ଅଛି ବୋଲି ସେ କହିଛନ୍ତି। ଆସନ୍ତା ଜୁଲାଇରେ ସେ ୪୦ ବର୍ଷରେ ପଦାର୍ପଣ କରିବେ। ହରଭଜନ ୨୦୧୬ ଏସିଆ କପ୍ରେ ଶେଷଥର ଭାରତ ପାଇଁ ଖେଳିଥିଲେ। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଭଲ ପ୍ରଦର୍ଶନ କରିପାରୁଛି। ଭାରତ ପାଇଁ ମଧ୍ୟ ଭଲ ପ୍ରଦର୍ଶନ କରିପାରିବି। ଆଇପିଏଲ ଏକ କଷ୍ଟକର ଟୁର୍ନାମେଣ୍ଟ। ଏହି ଟୁର୍ନାମେଣ୍ଟରେ ଅପେକ୍ଷାକୃତ ଛୋଟ ଗ୍ରାଉଣ୍ଡରେ ବିଶ୍ୱସ୍ତରୀୟ କ୍ରିକେଟରମାନଙ୍କ ସହ ଖେଳିବାକୁ ହୋଇଥାଏ। ବିଶ୍ୱର ବିଭିନ୍ନ ଦେଶର ଶ୍ରେଷ୍ଠ ବ୍ୟାଟ୍ସମ୍ୟାନଙ୍କୁ ବୋଲିଂ କରିବା ଏକ ବଡ଼ ଚ୍ୟାଲେଞ୍ଜ। ତେଣୁ ଯଦି ଆଇପିଏଲରେ ଭଲ ପ୍ରଦର୍ଶନ କରୁଛି ତା’ହେଲେ ଅନ୍ତର୍ଜାତୀୟ ଟି୨୦ରେ ମଧ୍ୟ ଭଲ ପ୍ରଦର୍ଶନ କରିପାରିବ ବୋଲି ହରଭଜନ କହିଛନ୍ତି। ଆଇପିଏଲ୍ର ବିଭିନ୍ନ ମ୍ୟାଚ୍ର ପାଓ୍ବାର ପ୍ଲେ ମିଡିଲ ଓଭରରେ ଭଲ ବୋଲିଂ କରିବା ସହ ଉଇକେଟ ହାସଲ କରିବାରେ ସମର୍ଥ ହୋଇଛି। ହରଭଜନ ମୁମ୍ବାଇ ଇଣ୍ଡିଆନ୍ସ ଓ ଚେନ୍ନାଇ ସୁପର କିଙ୍ଗ୍ସ ପାଇଁ ଆଇପିଏଲ ଖେଳିଛନ୍ତି। ଆଇପିଏଲ୍ରେ ଯୁଗ୍ମ ସର୍ବାଧିକ ଉଇକେଟକିପର ହାସଲକାରୀ ବୋଲର ବିବେଚିତ ହୋଇଛନ୍ତି। ତାଙ୍କର ଇକୋନୋମି ରେଟ୍ ମଧ୍ୟ ସେତେ ଅଧିକ ନୁହଁ। ଆଇପିଏଲର ଗତ ୨୦୧୯ ସଂସ୍କରଣରେ ସେ ୧୧ଟି ମ୍ୟାଚ୍ ଖେଳି ୭.୦୯ ଇକୋନୋମି ରେଟ୍ରେ ୧୬ଟି ଉଇକେଟ ହାସଲ କରିଥିଲେ। ଆଇପିଏଲ୍ରେ ସେ ମୋଟ ଉପରେ ଏପର୍ଯ୍ୟନ୍ତ ୧୫୦ ଉଇକେଟ ହାସଲ କରିଛନ୍ତି। ଆଇପିଏଲ୍ରେ ଭଲ ପ୍ରଦର୍ଶନ କରିବା ସତ୍ତ୍ୱେ ଚୟନକର୍ତ୍ତାମାନେ ଅଣଦେଖା କରୁଛନ୍ତି ବୋଲି ହରଭଜନ ଅଭିଯୋଗ ଆଣିଛନ୍ତି। ବୁଢ଼ା ହୋଇଛି ବୋଲି ଚୟନକର୍ତ୍ତାମାନେ ଭାବୁଛନ୍ତି। ଘରୋଇ କ୍ରିକେଟ ଖେଳୁ ନ ଥିବାରୁ ଗତ ୪- ୫ ବର୍ଷ ହେବ ଚୟନକର୍ତ୍ତା ମୋତେ ବିଚାରକୁ ନେଉ ନାହାନ୍ତି ବୋଲି ସେ କହିଛନ୍ତି।