ମେଲବୋର୍ନ, ୨୬।୫ (ପି.ଟି.): ଆଗାମୀ ଗ୍ରୀଷ୍ମରେ ଘରୋଇ ସିରିଜରେ ଭାରତ ବିପକ୍ଷରେ ପିଙ୍କ ବଲ୍ ତଥା ଦିବାରାତ୍ର ଟେଷ୍ଟ ଖେଳିବାକୁ ଅଷ୍ଟ୍ରେଲିଆ ଦ୍ରୁତ ବୋଲର ମିଚେଲ ଷ୍ଟାର୍କ ଆଗ୍ରହ ପ୍ରକାଶ କରିଛନ୍ତି। ଫିଙ୍କ ବଲ୍ ଟେଷ୍ଟରେ ଷ୍ଟାର୍କ ରେକର୍ଡ ବେଶ୍ ଭଲ ରହିଛି। ଦିବାରାତ୍ର ଟେଷ୍ଟରେ ଭାରତ ବିପକ୍ଷରେ ବୋଲିଂ କରିବାକୁ ଚାହୁଁଛି ବୋଲି ଷ୍ଟାର୍କ କହିଛନ୍ତି।
ପୂର୍ବରୁ ୨୦୧୮-୧୯ରେ ଅଷ୍ଟ୍ରେଲିଆ ଗସ୍ତରେ ପିଙ୍କ୍ ବଲ୍ ଟେଷ୍ଟ ଖେଳିବାକୁ ପ୍ରସ୍ତାବ ଦିଆଯାଇଥିଲା। ତେବେ ଭାରତ ଏହାକୁ ପ୍ରତ୍ୟାଖ୍ୟାନ କରିଥିଲା। ତେବେ ଗତ ଫେବୃୟାରୀରେ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ (ବିସିସିଆଇ) ସଭାପତି ସୌରଭ ଗାଙ୍ଗୁଲି ଭାରତ ଅଷ୍ଟ୍ରେଲିଆ ଗସ୍ତରେ ଏକ ପିଙ୍କ ବଲ୍ ଟେଷ୍ଟ ଖେଳିବ ବୋଲି ଘୋଷଣା କରିଥିଲେ। ଏହି ସିରିଜରେ ଭାରତ ଓ ଅଷ୍ଟ୍ରେଲିଆ ଦିବାରାତ୍ର ଟେଷ୍ଟ ଖେଳିବା ନିଶ୍ଚିତ ଭାବେ ଏକ ବଡ଼ କଥା ବୋଲି ଷ୍ଟାର୍କ କହିଛନ୍ତି।
ଅଷ୍ଟ୍ରେଲିଆକୁ ଦିବାରାତ୍ର ଟେଷ୍ଟର ଜନକ ବୋଲି କୁହାଯାଏ। ୨୦୧୫ରେ ଅଷ୍ଟ୍ରେଲିଆ ଓ ନ୍ୟୁଜିଲାଣ୍ଡ ମଧ୍ୟରେ ସର୍ବପ୍ରଥମ ଦିବାରାତ୍ର ଟେଷ୍ଟ ଖେଳାଯାଇଥିଲା। ଏପର୍ଯ୍ୟନ୍ତ ଅଷ୍ଟ୍ରେଲିଆ ୭ଟି ଦିବାରାତ୍ର ଟେଷ୍ଟ ଖେଳିଛି ଓ ସବୁଥିରେ ଅପରାଜେୟ ରହିଛି। ଅନ୍ୟପଟେ ଭାରତ ବାଂଲାଦେଶ ବିପକ୍ଷରେ ଏକମାତ୍ର ଦିବାରାତ୍ର ଟେଷ୍ଟ ଖେଳିଛି। ଗତ ନଭେମ୍ବରରେ ଇଡେନ ଗାର୍ଡେନ୍ସରେ ଅନୁଷ୍ଠିତ ଏହି ଐତିହାସିକ ମ୍ୟାଚ୍ରେ ଭାରତ ଅତି ସହଜରେ ବିଜୟ ହାସଲ କରିଥିଲା। ଭାରତ ପାଇଁ ପିଙ୍କ୍ ବଲ ଆଦୌ ନୂଆ ନୁହେଁ ବୋଲି ଷ୍ଟାର୍କ କହିଛନ୍ତି। ତେଣୁ ଆଗାମୀ ସିରିଜରେ ପିଙ୍କ୍ ବଲ୍ ଟେଷ୍ଟ ବେଶ୍ ମଜାଦାର ହେବ ବୋଲି ୩୦ ବର୍ଷୀୟ ଷ୍ଟାର୍କ କହିଛନ୍ତି। ଅଷ୍ଟ୍ରେଲିଆ ତରଫରୁ ଷ୍ଟାର୍କ ସମସ୍ତ ୭ଟି ଯାକ ମ୍ୟାଚ୍ ଖେଳିଛନ୍ତି ଓ ୧୯.୨୩ ହାରରେ ୪୨ଟି ଉଇକେଟ ଅକ୍ତିଆର କରିଛନ୍ତି। ଘରୋଇ ପରିବେଶରେ ଅଷ୍ଟ୍ରେଲିଆ ଅବଶ୍ୟ ଫାଇଦାରେ ରହିବ। କିନ୍ତୁ ଭାରତ ମଧ୍ୟ ଅଷ୍ଟ୍ରେଲିଆରେ ଦିବାରାତ୍ର ଟେଷ୍ଟ ଖେଳି ଫାଇଦାରେ ରହିବ ବୋଲି ଷ୍ଟାର୍କ କହିଛନ୍ତି।