ସାକ୍ଷୀଗୋପାଳ, ୧୬।୮(ଡି.ଏନ.ଏ.): ବଢି ପାଣି ଆସିବା ପରେ ପୁରୀ ଜିଲା ସତ୍ୟବାଦୀ ଅଞ୍ଚଳରେ ପ୍ରବାହିତ ଭାର୍ଗବୀ ନଦୀରେ ଜଳ ପତ୍ତନ ବୃଦ୍ଧି ପାଇଛି। ବିପଦପୂର୍ଣ୍ଣ ଅବସ୍ଥାରେ ରହିଥିବା ସାକ୍ଷୀଗୋପାଳ ଜଳସେଚନ ଉପଖଣ୍ଡ ଭାର୍ଗବୀ ଦକ୍ଷିଣ ପର୍ଶ୍ୱ ନଦୀବନ୍ଧର ୬ଟି ସ୍ଥାନରେ ଘଳିଆ ସୃଷ୍ଟି ହୋଇଥିଲା। ଘଳିଆରୁ ପାଣି ଝରି ସେଠାରେ ଘାଇ ହେବା ଆଶଙ୍କାରେ ନଈକୂଳ ଲୋକମାନେ ଆତଙ୍କିତ ହୋଇପଡିଥିଲେ। ଆନନ୍ଦପୁର, ବଳପୁର ହନୁମାନ ବାଙ୍କ ଓ ରଥ ପୁରୁଷୋତ୍ତମପୁରଠାରେ ଜଳସେଚନ ବିଭାଗ ପକ୍ଷରୁ ଗ୍ରାମବାସୀଙ୍କ ସହଯୋଗରେ ବାଲିବସ୍ତାରେ ବନ୍ଧ ପକାଯାଇଥିଲା। ମାତ୍ର ଗୁରୁବାର ବିଳମ୍ବିତ ରାତିରେ ନଦୀ ବନ୍ଧରେ ଛୋଟ ଫାଟ ସୃଷ୍ଟି ହୋଇଥିଲା। ତେବେ ଶୁକ୍ରବାର ସକାଳୁ ଜଳପତ୍ତନ ହ୍ରାସ ପାଇଥିବାରୁ ବିପଦ ଟଳିଯାଇଥିବା ଉପଖଣ୍ଡ ଅଧିକାରୀ ଇଂ. ରଘୁନାଥ ସ୍ବାଇଁ କହିଛନ୍ତି। ବନ୍ୟା ଜଳ ନୂଆ ନଈରେ ଖଲାସ ହେଉଥିବା ସେ କହିଛନ୍ତି।