କେନ୍ଦୁଝର, ୯ା୩: (ସ୍ବ.ପ୍ର.):ଜଙ୍ଗଲଜାତ ଆଳୁ ଖୋଳିବାକୁ ଜଣେ ଯୁବକ ଯାଇଥିବା ବେଳେ ଭାଲୁ ହାବୁଡ଼ରେ ପଡ଼ି ଗୁରୁତର ହୋଇଛନ୍ତି। ଉକ୍ତ ଯୁବକ ହେଲେ ହରିଚ଼ନ୍ଦନପୁର ବ୍ଲକ ଦୈତାରୀ ଥାନା ତାଳପଦା ଗ୍ରାମର ରମେଶ ଜୁଆଙ୍ଗ। ସେ ରବିବାର ମଧ୍ୟାହ୍ନ ୧୨ଟା ବେଳେ ଗ୍ରାମ ନିକଟସ୍ଥ ସାପୁନାଥ ଜଙ୍ଗଲକୁ ଆଳୁ ଖୋଳିବାକୁ ଯାଇଥିଲେ। ମାଟିତଳୁ ଆଳୁ ଖୋଳୁଥିବା ବେଳେ ଏକ ଭାଲୁ ତାଙ୍କୁ ଆକ୍ରମଣ କରି ତାଙ୍କର ହାତର ଶିର କାମୁଡ଼ି ଛିଡ଼ାଇ ଦେଇଥିଲା। ଯୁବକଜଣଙ୍କ ସାହାସର ସହ ମୁକାବିଲା କରି ଭାଲୁର ଦୁଇ ଗୋଡକୁ ଧରି କଚ଼ାଡ଼ି ଦେଇଥିଲେ। ଯୁବକ ଜଣଙ୍କ ସାଥିରେ ଯାଇଥିବା ଦୁଇଟି ଗାଁ କୁକୁର ଚ଼ିତ୍କାର କରି ଆକ୍ରମଣ କରିବାରୁ ସେଠାରୁ ଭାଲୁ ପଳାଇଥିଲା। ପ୍ରଥମେ ରମେଶଙ୍କୁ ଦୈତାରୀ ଡ଼ାକ୍ତରଖାନାରେ ଭର୍ତ୍ତି କରାଯାଇଥିଲା। ପରେ ତାଙ୍କ ଅବସ୍ଥା ଗୁରୁତର ହେବାରୁ ୧୦୮ଆମ୍ବୁଲାନ୍ସ ଯୋଗେ କେନ୍ଦୁଝର ମୁଖ୍ୟ ଚ଼ିକିତ୍ସାଳୟରେ ଭର୍ତ୍ତି କରାଯାଇଛି।