ଲକ୍ଷ୍ନୌ,୩।୯: ବହୁତ ଦିନର ନୀରବତା ପରେ ସମାଜବାଦୀ ପାର୍ଟି ନେତା ମୁଲାୟମ ସିଂ ଯାଦବ ଗଣମାଧ୍ୟମ ସାମ୍ନାକୁ ଆସିଛନ୍ତି। ଏକ ଖବରଦାତା ସମ୍ମିଳନୀରେ ସେ ରାମପୁର ଏମ୍ପି ଆଜମ୍ ଖାନଙ୍କୁ ପ୍ରଶଂସା କରିଛନ୍ତି। ଭିକ ମାଗି, ଦେଶ-ବିଦେଶରୁ ଚାନ୍ଦା ସଂଗ୍ରହ କରି ଏବଂ ନିଜର ଜମା ପୁଞ୍ଜି ଖଟେଇ ସେ ଜୌହର ବିଶ୍ୱବିଦ୍ୟାଳୟ ନିର୍ମାଣ କରିଥିଲେ କିନ୍ତୁ ସାମାନ୍ୟ କିଛି ଜମି ପାଇଁ ତାଙ୍କ ନାଁରେ ଗମ୍ଭୀର ଆପରାଧିକ ମାମଲା ରୁଜୁ କରାଯାଇଛି, ଯାହା ନିନ୍ଦନୀୟ ବୋଲି ସେ କହିଛନ୍ତି।
ପ୍ରକାଶଯୋଗ୍ୟ ଯେ, ଏସପି ନେତା ତଥା ରାମପୁର ସାଂସଦ ଆଜମ୍ ଖାନ ଜୌହର ବିଶ୍ୱବିଦ୍ୟାଳୟ ନାମରେ କୃଷକଙ୍କ ଜମି ବଳପୂର୍ବକ ଦଖଲକୁ ନେଇଥିବା ଅଭିଯୋଗ ହୋଇଛି। ଏନେଇ କୃଷକମାନେ ରାଜ୍ୟପାଳଙ୍କୁ ଅଭିଯୋଗ କରିଥିଲେ। ଏହାକୁ ନେଇ ରାମପୁର ପ୍ରଶାସନ ରାଜ୍ୟ ସରକାରଙ୍କ ଆଣ୍ଟି-ଭୂ ମାଫିଆ ପୋର୍ଟାଲରେ ଆଜମ୍ ଖାନଙ୍କ ନାମକୁ ତାଲିକାଭୁକ୍ତ କରିଛି। ଏହାଦ୍ୱାରା ଆଜମ୍ ଖାନ ଭୂ-ମାଫିଆ ଘୋଷିତ ହୋଇଛନ୍ତି।