ଭିଜିଲାନ୍ସ ଜାଲରେ କୋଟିପତି ଯନ୍ତ୍ରୀ: ୨ କୋଟିରୁ ଊର୍ଦ୍ଧ୍ୱ ଟଙ୍କାର ସମ୍ପତ୍ତି ଠାବ
02 ବାଲେଶ୍ୱର ଅଫିସ, ୧୮।୧୦-ଆୟ ବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ଭିଜିଲାନ୍ସ ଜାଲରେ ଛନ୍ଦି ହୋଇପଡିଛନ୍ତି ବାଲେଶ୍ୱର ଜିଲା ଡ୍ରେନେଜ୍ ଡିଭିଜନ୍ର କାର୍ଯ୍ୟ ନିର୍ବାହୀଯନ୍ତ୍ରୀ ବସନ୍ତ କୁମାର ପଣ୍ଡା। ଶୁକ୍ରବାର ପୂର୍ବାହ୍ନରେ ଏକକାଳୀନ ତାଙ୍କ ଘର, ଅଫିସ୍, ସମ୍ପର୍କୀୟଙ୍କ ଘର ମୋଟ ୭ଟି ସ୍ଥାନରେ ଭିଜିଲାନ୍ସ ପକ୍ଷରୁ ଚଢ଼ାଉ କରାଯାଇଥିଲା। ମୋଟ ୨କୋଟି ୮ଲକ୍ଷ ୮୧ହଜାର ଟଙ୍କାର ଆୟ ବହିର୍ଭୂତ ସମ୍ପତ୍ତି ଠାବ କରାଯାଇଛି। ଏନେଇ ବାଲେଶ୍ୱର ଭିଜିଲାନ୍ସ ଅଫିସରେ ମାମଲା (ନଂ.୯/୧୯) ରୁଜୁ କରାଯାଇ ତଦନ୍ତ ଜାରି ରହଛି।
ଭିଜିଲାନ୍ସ ଏସ୍ପି ସୁନୀଲ କୁମାର ସେନାପତିଙ୍କ ନିର୍ଦ୍ଦେଶରେ ଡିଏସ୍ପି ଦକ୍ଷିଣ ଚରଣ ମୁର୍ମୁ ଓ ଏସ୍ଆଇ ଜସ୍ମିନ ପାଲଙ୍କ ନେତୃତ୍ୱରେ ୭ଟି ଟିମ୍ ଯନ୍ତ୍ରୀ ପଣ୍ଡାଙ୍କ ଆଜିମାବାଦସ୍ଥିତ ବାଗ୍ବୃନ୍ଦାବନ ବାସଭବନ, ସହଦେବଖୁଣ୍ଟାସ୍ଥିତ ଭାଇଙ୍କ ଘର, ବସ୍ତା ଥାନା ଅମର୍ଦ୍ଦାରୋଡ୍ର ସରିସାଠାରେ ଥିବା ପୈତୃକ ବାସଗୃହ, ଭୁବନେଶ୍ୱର ପଟିଆସ୍ଥିତ କୈଳାସ ଆପାର୍ଟମେଣ୍ଟରେ ଥିବା ନିଜସ୍ବ ଘର, ଅନୁଗୁଳ ଜିଲା ମିଶ୍ରପଡ଼ାସ୍ଥିତ ଶ୍ୱଶୁର ଘର, ବିଭାଗୀୟ ଡ୍ରେନେଜ୍ ଅଫିସ୍ ଏବଂ ତାଙ୍କ ସ୍ତ୍ରୀ ସୁପ୍ରଭା ମିଶ୍ରଙ୍କ ସୁନହଟ୍ସ୍ଥିତ ଶକୁନ୍ତଳା ଗାର୍ଲସ ହାଇସ୍କୁଲ ଅଫିସ୍ ଉପରେ ଚଢ଼ାଉ କରାଯାଇଥିଲା। ଚଢ଼ାଉ ବେଳେ ଜିଲାରେ ଥିବା ୯ଟି ପ୍ଲଟ୍ର କାଗଜପତ୍ର, ବିଭିନ୍ନ ବ୍ୟାଙ୍କରେ ଡିପୋଜିଟ୍ କରାଯାଇଥିବା ପାସ୍ବୁକ୍ରୁ ୪୪ଲକ୍ଷ ୩୯ହଜାର ଟଙ୍କା, ବୀମା ବଣ୍ଡ, ଲକରରୁ ନଗଦ ୧୭ଲକ୍ଷ ଟଙ୍କା, ଘରୁ ୧ଲକ୍ଷ ୬୪ହଜାର ଟଙ୍କା, ମାରୁତି ଏଷ୍ଟିଲୋ କାର୍, ଦୁଇଟି ଦାମୀ ବାଇକ୍, ୧୬ଲକ୍ଷ ୫ହଜାର ଟଙ୍କାର ସୁନାଗହଣା ଥିବା ଜଣାପଡିଥିଲା।
ଉଲ୍ଲେଖଯୋଗ୍ୟ, ବାଲେଶ୍ୱର ଡ୍ରେନେଜ୍ ଡିଭିଜନ ଅଧୀନ ବିଭିନ୍ନ ନାଳ, ଖାଲ ଓ ଅନ୍ୟାନ୍ୟ ଜଳ ନିଷ୍କାସନ ପଥ ଖନନ ଓ ନିର୍ମାଣ ପାଇଁ ଆସୁଥିବା କୋଟି କୋଟି ଟଙ୍କାକୁ ଦୁର୍ନୀତିପୂର୍ଣ୍ଣ ଉପାୟରେ ପୂର୍ବରୁ ଖର୍ଚ୍ଚ କରାଯାଉଥିଲା। ପୁରୁଣା ନାଳ ଉପରୁ ଘାସ ସଫା କରି ଖନନ ହୋଇଥିବା ଦର୍ଶାଯାଇ ମିଥ୍ୟା ବିଲ୍ ପ୍ରସ୍ତୁତ କରି ଟଙ୍କା ହଡ଼ପ କରାଯାଇଥିବା ତଥ୍ୟ ମିଳିଛି। ପୂର୍ବରୁ ଭିଜିଲାନ୍ସ ପକ୍ଷରୁ ଉକ୍ତ ବିଭାଗର ନିର୍ବାହୀ ଯନ୍ତ୍ରୀ, ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀ ଓ ଠିକାଦାରମାନଙ୍କ ଉପରେ ଚଢ଼ାଉ ହୋଇଥିଲା। ଏହାପରେ ମଧ୍ୟ ଦୁର୍ନୀତିରେ ଲିପ୍ତ ରହିଥିବା ଅଧିକାରୀ ସଚେତନ ନ ହେବାରୁ ଭିଜିଲାନ୍ସ ପକ୍ଷରୁ କାର୍ଯ୍ୟାନୁଷ୍ଠାନ ନିଆଯାଇଛି।