ଭବାନୀପାଟଣା,୨୧।୧୨(ସ୍ବ.ପ୍ର.): ଭିଜିଲାନ୍ସ ଜାଲରେ କଳାହାଣ୍ଡି ଜିଲା କେଗାଁ ରେଞ୍ଜର କେଶବ ମାଝି। ଆୟବହିର୍ଭୂତ ସମ୍ପତ୍ତି ଠୁଳ ଅଭିଯୋଗରେ ବୁଧବାର ସକାଳେ କେସିଙ୍ଗା ଓମ ନଗରପଡାସ୍ଥିତ ବାସ ଭବନ, କେଗାଁ ସରକାରୀ କାର୍ଯ୍ୟାଳୟ, କ୍ୱାର୍ଟର ଓ ବ୍ରାହ୍ମଣୀର ପୈତୃକ ଘରେ ଏକକାଳିନ କୋରାପୁଟ ଓ କଳାହାଣ୍ଡି ଭିଜିଲାନ୍ସ ବିଭାଗ ଚଢ଼ାଉ କରିଛି।
ଚଢ଼ାଉ ସମୟରେ ରେଞ୍ଜର ମାଝି ଓ ତାଙ୍କ ପରିବାର ସଦସ୍ୟଙ୍କ ନାମରେ ବିଭିନ୍ନ ବ୍ୟାଙ୍କରେ ଖାତା ରହିବା ସହିତ ନଗଦ ୨ ଲକ୍ଷ ୭୮ ହଜାର ୬୪୦ ଟଙ୍କା ଜମା, ବ୍ୟାଙ୍କ ଓ ବୀମାରେ ୩୩ ଲକ୍ଷ ଟଙ୍କା ଜମା ଥିବା, ୨୦୨୦ରେ କେସିଙ୍ଗା ଓମ ନଗର ପଡ଼ାରେ ନିର୍ମିତ ୩ ମହଲା କୋଠା ଯାହାର ଦାମ ୧ କୋଟି ୧୮ ଲକ୍ଷରୁ ଊଦ୍ଧର୍ବ, କେସିଙ୍ଗା ସହର ଆଖପାଖରେ ୪ଟି ପ୍ଲଟ ରହିଥିବା ଜଣାପଡିଛି। ପ୍ଲଟଗୁଡିକ ହେଲା କେସିଙ୍ଗା ବ୍ରାହ୍ମଣୀରେ ୧ ଏକର.୬୬ ଡିସମିଲ ଓ ୧ ଏକର ୩୬ ଡିସମିଲ, କେସିଙ୍ଗା ସହରରେ ୧୧ ଡିସମିଲ, ବୋରିଙ୍ଗ ପଦରରେ ୬୨ ଡିସମିଲର ପ୍ଲଟ ରହିଥିବା ସୂଚନା ମିଳିଛି। ସେହିପରି ୪୭୭ ଗ୍ରାମ ସୁନା ଅଳଙ୍କାର, ୩୨୦ ଗ୍ରାମ ରୁପା, ୨ଟି ଚାରିଚକିଆ ଯାନ, ବୁଲେଟ ଆଦି ବହୁ ସାମଗ୍ରୀ ଠାବ ହୋଇଥିବା ଜଣାପଡିଛି। ଯାହାର ଆନୁମାନିକ ମୂଲ୍ୟ ୨.୪୫ କୋଟି ବୋଲି ସୂଚନା ମିଳିଛି। ଚଢ଼ାଉରେ ମାଲକାନଗିରି ଡିଏସ୍ପି ସୁଶାନ୍ତ ବିଶ୍ୱାଳ, ଭବାନୀପାଟଣା ଡିଏସ୍ପି ସଦାନନ୍ଦ ପାଣି, ନବରଙ୍ଗପୁର ଡିଏସ୍ପି କଳାବତୀ ବାଗ, ଇନ୍ସପେକ୍ଟର ସାବିତ୍ରୀ ପ୍ରଧାନ, ପ୍ରମିଳା ସୁନା, ଆଲୋକ ମହାପାତ୍ର ପ୍ରମୁଖ ୧୨ଜଣିଆ ଟିମ୍ ସାମିିଥିଲେ।