କେସିଙ୍ଗା,୭।୬: କଳାହାଣ୍ଡି ଜିଲା ଥୁଆମୂଳ ରାମପୁର ଥାନା ଏଏସ୍ଆଇ ସୁମେଶ୍ୱର ବାଗ ଲାଞ୍ଚ ନେଉଥିବା ବେଳେ ଶନିବାର ଭିଜିଲାନ୍ସ ହାତରେ ଧରାପଡ଼ିଛନ୍ତି। ସୁମେଶ୍ୱର ରାୟଗଡ଼ା ଜିଲା ଅଧୀନ କାଶୀପୁର ଥାନା ଅନ୍ତର୍ଗତ ଚନ୍ଦ୍ରଗିରି ମାଲିଗାଁର ପବିତ୍ର ନାଏକଙ୍କଠାରୁ ୫୦ ହଜାର ଟଙ୍କା ଲାଞ୍ଚ ନେଉଥିବା ବେଳେ କଳାହାଣ୍ଡି ଜିଲା ଭିଜିଲାନ୍ସ ବିଭାଗ ତାଙ୍କୁ ଗିରଫ କରିଛି। ତାଙ୍କ ବାପାଙ୍କ ଗତ ଡିସେମ୍ବର ମାସରେ ବଜ୍ରପାତରେ ମୃତ୍ୟୁ ଘଟିଥିଲା। କ୍ଷତିପୂରଣ ବାବଦକୁ ରାଜ୍ୟ ସରକାରଙ୍କ ପକ୍ଷରୁ ତାଙ୍କୁ ୪ ଲକ୍ଷ ଟଙ୍କା ମିଳିଥିଲା। ପବିତ୍ର ବାପାଙ୍କ ୩ଟି ସ୍ତ୍ରୀ ହୋଇଥିବା ବେଳେ ୨ ଜଣ ଏହି ଟଙ୍କାଙ୍କୁ ବାଣ୍ଟି ନେଇଥିଲେ। ଟଙ୍କା ଭାଗ ବଣ୍ଟାକୁ ନେଇ ଘରେ କଳହ ଲାଗି ରହୁଥିଲା। ଏ ନେଇ ବାପାଙ୍କ ଅନ୍ୟ ଜଣେ ସ୍ତ୍ରୀ ଥୁଆମୂଳ ରାମପୁର ଥାନାରେ ଅଭିଯୋଗ କରିଥିଲେ।
ଏହି ଅଭିଯୋଗକୁ ଭିତ୍ତିକରି ଏଏସ୍ଆଇ ପବିତ୍ରକୁ ଡାକି ୫୦ ହଜାର ଦେବୁ ନଚେତ କୋର୍ଟକୁ ପଠାଇବି ବୋଲି ଧମକ ଦେଇ ମୋଟରସାଇକେଲ ରଖିଥିଲେ। ପବିତ୍ର କିଛି ଉପାୟ ନ ପାଇ କଳାହାଣ୍ଡି ଜିଲା ଭିଜିଲାନ୍ସର ଆଶ୍ରୟ ନେଇଥିଲେ।
ଭିଜିଲାନ୍ସ ଦ୍ୱାରା ପୂର୍ବ ଯୋଜନା ଅନୁସାରେ ପବିତ୍ର ଲାଞ୍ଚ ଟଙ୍କା ଦେଉଥିବା ସମୟରେ ଭବାନୀପାଟଣା ଭିଜିଲାନ୍ସ ଡିଏସ୍ପି ସତ୍ୟବାନ ମହାନନ୍ଦଙ୍କ ସମେତ ଅନ୍ୟାନ୍ୟ ଅଧିକାରୀ ଏଏସ୍ଆଇଙ୍କଠାରୁ ଟଙ୍କା ଜବତ କରିବା ସହ ଘଟଣାରେ ସାମିଲ ଥିବା ହୋମଗାର୍ଡ ରଘୁମଣି ବାଗଙ୍କୁ ମଧ୍ୟ ଗିରଫ କରିଛି।