ନୟାଗଡ଼ ଅଫିସ,୧୨ା୧୨: ନୟାଗଡ଼ ଜିଲା ଗ୍ରାମ୍ୟ ଉନ୍ନୟନ ବିଭାଗ-୧ର ନିର୍ବାହୀ ଯନ୍ତ୍ରୀ ଶିଶିର ରଞ୍ଜନ ପୃଷ୍ଟି ଓ ସହକାରୀ ନିର୍ବାହୀ ଯନ୍ତ୍ରୀ ଗୋବିନ୍ଦ ଚନ୍ଦ୍ର ସାହୁ ବୁଧବାର ଅନୈତିକ ଉପାୟରେ ଟଙ୍କା ସଂଗ୍ରହ କରି ଭୁବନେଶ୍ୱର ଯାଉଥିବା ବେଳେ ଭିଜିଲାନ୍ସ ହାତରେ ଧରାପଡ଼ିଛନ୍ତି। ଭିଜିଲାନ୍ସ ଡିଏସ୍ପି ଶିଶିର ଭୋଇଙ୍କଠାରୁ ମିଳିଥିବା ସୂଚନା ଅନୁସାରେ, ଉପରୋକ୍ତ ୨ ବରିଷ୍ଠ ଯନ୍ତ୍ରୀ ଅନୈତିକ ଉପାୟରେ ଟଙ୍କା ସଂଗ୍ରହ କରି ଭୁବନେଶ୍ୱର ଯିବେ ବୋଲି ବିଶେଷ ସୂତ୍ରରୁ ଖବର ପାଇଥିଲେ। ପରେ ସେମାନଙ୍କ ଟିମ୍ ସନ୍ଧ୍ୟାରେ ନିର୍ବାହୀ ଯନ୍ତ୍ରୀଙ୍କ ବାସଭବନ ଆଗରେ ପଇଁତରା ମାରିଥିଲେ। ରାତ୍ର ୮ଟା ୨୦ ମିନିଟ ସମୟରେ ଉଭୟ ଏକ ବୋଲେରୋରେ କଲେଜ ରୋଡ଼ସ୍ଥିତ ବାସଭବନରୁ ବାହାରୁଥିବା ବେଳେ ଭିଜିଲାନ୍ସ ଟିମ୍ ସେମାନଙ୍କୁ ଗିରଫ କରିଥିଲା। ଶିଶିରଙ୍କଠାରୁ ୧ ଲକ୍ଷ ୧୯ ହଜାର ୯୦୦ ଟଙ୍କା ଓ ଗୋବିନ୍ଦଙ୍କଠାରୁ ୨୬ ହଜାର ୩୩୦ ଟଙ୍କା ଜବତ କରାଯାଇଥିଲା। ଉଭୟଙ୍କଠାରୁ ମୋଟ ୧ଲକ୍ଷ ୪୬ହଜାର ୨୩୦ ଟଙ୍କା ଜବତ ହୋଇଛି। ଏତେ ଟଙ୍କା କେଉଁଠାରୁ ଆଣିଛ ବୋଲି ପଚାରିବାରୁ ସେମାନେ ତଥ୍ୟ ଦେଇପାରି ନ ଥିଲେ। ଫଳରେ ଭିଜିଲାନ୍ସ ଟିମ୍ ଉଭୟଙ୍କୁ ପଚରାଉଚରା ପାଇଁ କାର୍ଯ୍ୟାଳୟକୁ ଆଣିଥିଲା। ଏ ନେଇ ଏକ ମାମଲା ରୁଜୁ କରାଯାଇ ଅଧିକ ତଦନ୍ତ କରାଯାଉଥିବା ନୟାଗଡ଼ ଭିଜିଲାନ୍ସ ଡିଏସ୍ପି ଭୋଇ ପ୍ରକାଶ କରିଛନ୍ତି। ଶିଶିରଙ୍କ ଘର ଗଞ୍ଜାମ ଜିଲା ଆସିକା ଅଞ୍ଚଳରେ ହୋଇଥିବାବେଳେ ଗୋବିନ୍ଦଙ୍କ ଘର କଟକ କିଶୋରନଗର ଅଞ୍ଚଳରେ।