ବୌଦ୍ଧ, ୪ା୫ (ସ୍ବ.ପ୍ର.) ରାଜ୍ୟ ବାହାରେ ରହୁଥିବା ପ୍ରବାସୀ ଶ୍ରମିକମାନେ ନିଜ ନିଜ ରାଜ୍ୟକୁ ଫେରିବା ଲାଗି ସରକାରଙ୍କ ପକ୍ଷରୁ ନିର୍ଦ୍ଦେଶନାମା ପ୍ରକାଶ ପାଇବା ପରେ ଏହା ଚିନ୍ତା ବଢାଇଛି। ପ୍ରତିଦିନ ଶହ ଶହ ଶ୍ରମିକ ବସ୍ ଯୋଗେ ଘରକୁ ବାହୁଡୁଛନ୍ତି। ଏହିକ୍ରମରେ ଗୁଜୁରାଟ ରାଜ୍ୟର ସୁରାଟରୁ ବହୁ ସଂଖ୍ୟକ ପ୍ରବାସୀ ଶ୍ରମିକ ବସ୍ ଯୋଗେ ଖୋର୍ଦ୍ଧା-ବଲାଙ୍ଗୀର ଜାତୀୟ ରାଜପଥ ଦେଇ ଗଞ୍ଜାମ ଜିଲାକୁ ଫେରୁଛନ୍ତି। ବୌଦ୍ଧ ଜିଲାର ମନମୁଣ୍ଡାରୁ ବଦଲା ପର୍ଯ୍ୟନ୍ତ ପ୍ରାୟ ୧୨୦ କିଲୋମିଟର ଜାତୀୟ ରାଜପଥ ଦେଇ ଏହି ବସ୍ଗୁଡିକ ଗଞ୍ଜାମ ଜିଲାକୁ ଯାତ୍ରା କରୁଛି। ହେଲେ ବସ୍ରୁ ଓହ୍ଲାଇ ଶ୍ରମିକମାନେ ବିଭିନ୍ନ ସ୍ଥାନରେ ଅଟକୁଛନ୍ତି। ବାଟରେ ଥିବା ପୋଖରୀ, ନଦୀ, ନଳକୂଅ ଆଦି ବ୍ୟବହାର କରୁଛନ୍ତି। ଏହା ସହିତ ହୋଟେଲଗୁଡିକରୁ ମଧ୍ୟ ଖାଦ୍ୟପଦାର୍ଥ ସଂଗ୍ରହ କରୁଥିବା ନଜରକୁ ଆସିଛି। ଏହାକୁ ନେଇ ବୌଦ୍ଧ ଜିଲାବାସୀ ଆତଙ୍କିତ ହୋଇପଡିଛନ୍ତି।