????????????????????????????????????
ବରଗଡ଼ ଅଫିସ୍,୨୦।୪: ବରଗଡ଼ ସହର ଉପକଣ୍ଠ ଖେଦାପାଲି(ଟୁକୁର୍ଲା)ସ୍ଥିତ ନୂତନ ଜିଲା ମୁଖ୍ୟ ଡାକ୍ତରଖାନା ପରିସରରେ ହୋଇଥିବା କୋଭିଡ୍-୧୯ ହସପିଟାଲକୁ ସୋମବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଭିଡ଼ିଓ କନଫେରେନ୍ସିଂ ମାଧ୍ୟମରେ ଉଦ୍ଘାଟନ କରିଛନ୍ତି । ଏହି କୋଭିଡ୍-୧୯ ହସପିଟାଲଟି ୨୦୦ ଶଯ୍ୟା ବିଶିଷ୍ଟ ହୋଇଥିବାବେଳେ ସରକାରୀ ପଲିଟେକନିକ୍ କେନ୍ଦ୍ରରେ କୋଭିଡ୍ ସେବାକେନ୍ଦ୍ର ୧୦୦ ଶଯ୍ୟା ବିଶିଷ୍ଟ ଏବଂ ଜନନୀ ଓ ଶିଶୁ ଚିକିତ୍ସାଳୟ କୋଠାରେ କୋଭିଡ୍ ଚିକିତ୍ସାଳୟ ୧୦୦ ଶଯ୍ୟା ବିଶିଷ୍ଟ ହୋଇଛି । ଏଠାରେ ୮ଟି ଆଇସିୟୁ ମଧ୍ୟ ରହିଛି । ବରଗଡ଼ର ବିକାଶ ମଲ୍ଟି ସ୍ପେଶିଆଲିଟି ହସପିଟାଲ ଦ୍ୱାରା ଏହା ପରିଚାଳିତ ହେଉଥିବାବେଳେ ଭାରତୀୟ ତୈଳ ନିଗମ(ଆଇଓସିଏଲ) ଏଥିପାଇଁ ଆବଶ୍ୟକ ଅନୁଦାନ ଯୋଗାଇ ଦେଇଛି । ଏକ ସ୍ବତନ୍ତ୍ର ଆମ୍ବୁଲାନ୍ସ, ପାରା ମେଡ଼ିକାଲ ଷ୍ଟାଫ, ସମସ୍ତ ପ୍ରକାର ସୁରକ୍ଷା ଉପକରଣ, ବର୍ଜ୍ୟବସ୍ତୁ ପରିଚାଳନା, ଜରୁରୀକାଳୀନ ସେବା, ସଫେଇ ବ୍ୟବସ୍ଥା, ସୁରକ୍ଷା ବ୍ୟବସ୍ଥା, ପାଥୋଲ୍ୟାବ, ରେଡ଼ିଓଲୋଜି କେନ୍ଦ୍ର ଆଦି ସମସ୍ତ ପ୍ରକାର ସୁବିଧା ଥାଇ ଏହି କୋଭିଡ୍ ହସପିଟାଲ କେବଳ କରୋନା ରୋଗୀଙ୍କ ପାଇଁ ଲୋକାର୍ପିତ ହୋଇଛି । ଏଠାରେ ୨୪ଘଣ୍ଟିଆ ସ୍ବାସ୍ଥ୍ୟସେବାର ବ୍ୟବସ୍ଥା ରହିଛି । ଏକ ସଙ୍ଗରୋଧ ଜୋନ୍ ସହିତ ସଙ୍କଟକାଳୀନ ରୋଗୀଙ୍କ ପାଇଁ ଅଲଗା ବ୍ୟବସ୍ଥା କରାଯାଇଛି । ଲୋକାର୍ପଣ ଉତ୍ସବରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ, ପ୍ରହଲ୍ଲାଦ ଯୋଶୀ, ରାଜ୍ୟ ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରୀ ନବ କିଶୋର ଦାସ, ମୁଖ୍ୟ ଶାସନ ସଚିବ ଅସିତ୍ ତ୍ରିପାଠୀ, ୫-ଟି ସଚିବ ଭି.କେ ପାଣ୍ଡିଆନ ପ୍ରମୁଖ ଉପସ୍ଥିତ ଥିଲେ । ସେହିପରି ଲୋକାର୍ପଣ ସମୟରେ ବରଗଡ଼ କୋଭିଡ୍ ହସପିଟାଲରେ ବରଗଡ଼ ଜିଲାପାଳ ଜ୍ୟୋତିରଞ୍ଜନ ପ୍ରଧାନ, ଜିଲା ମୁଖ୍ୟ ଚିକିତ୍ସାଧିକାରୀ ବିଭୁତି ଭୂଷଣ ମେହେର, ଅତିରିକ୍ତ ଜିଲାପାଳ ମିର୍ଦ୍ଧା ଟପ୍ପୋ, ପ୍ରକଳ୍ପ ନିର୍ଦ୍ଦେଶକ କୃତିବାସ ରାଉତ, ଏସପି ପଦ୍ମିନୀ ସାହୁ, ବିକାଶ ଗ୍ରୁପର ଚେୟାରମ୍ୟାନ ଡି.ମୂରଲୀକ୍ରୀଷ୍ଣା ପ୍ରମୁଖ ଉପସ୍ଥିତ ରହିଥିଲେ।